YOHANA 3
3
1Yaali ho mwimiliri mulala Muyuda uwalangwa Nikodemo, uwikiduma cha Vafarisayo. 2Lidiku lilala yaza ku Yeso vudiku, namuvolera, “Rabi, kumanyi ivi oveeye mwigizi watura ku Nyasaye, kigira avulaho mundu unyala kokora vilolekizu via okolaa yivi, Nyasaye nataveeye harara naye.”
3Yeso yamutivulira, “Ngovolera agiligali, mundu navula kwivulwa vuhia, sianyala kolola Uvwami vwa Nyasaye mba.”
4Nikodemo yamuteeva, “Mundu anyala ndi kwivulwa vuhia naveeye muhindira? Anyala kwingira munda mwa mama weve haali kaviri, yiivulwi kandi?”
5Yeso yamutivulira, “Ngovolera agiligali, mundu natiivulwa liivulwa lia amazi ni lia Roho, sianyala kwingira mu Vwami vwa Nyasaye mba.
6Chu muviri gwivulaa nichumuviri ni charoho yivulaa ni cha Roho. 7Utagenya kigira ngovoleeye ndi gakuduukiraa wivulwi kaviri, 8imbuza ihuuzaa hoosi hiyaanzaa; na ivi uhulira vuzwa lifuuma liayo, navuzwa siumanyi wa itulaa nu wizizaa mba. Nindio gaveeye kandi ku mundu woosi uwivulwa kutura ku roho.”
9Nikodemo yamuteeva, “Vindu yivi vinyala kunyalika kuli ndi?”
10Yeso yamutivulira, “Ivi oveeye mwigizi munene mu Isiraeli na siumanyi vindu yivi? 11Ngovolera ligali, kunyi komolomaa ku aga kumanyi kandi kololekizaa aga kwalola, navuzwa munyi simuyaanzaa kuvugilira amakuva gililolekiza lietu mba. 12Niiva inze mali kumuvolera ivindu viu mu lirova navuzwa munyi simusuuvira, munyala kusuuvira ndi niiva ndamuvolera ivindu viu mwigulu? 13Siaveeyeho nu mundu uwaazia kuduuka mwigulu, natali Mwana wa Adamu uwiika kutura mwigulu.”
14Kuli Musa yaginga igulu enzoka yu Mugasa mwigendanyama, nindio Mwana wa Adamu aligingwa igulu ku musalaba. 15Kunangwa mundu woosi usuviraa muye aduuki kuva ni livamwoyo ilitahera mba. 16Nyasaye yayanza avandu vu mu kivala, kali nahaana Mwana weve umuderwa, kunangwa ku vosi umusuuvira atadiva mba, navuzwa aduuki kuva ni livamwoyo ilitahera mba. 17Nyasaye siyatuma Mwana weve kuuza mu kivala kukalagira avumukivala, navuzwa kohonyia avumukivala.
18Uyu usuviraa Mwana si alakalagirwa; navuzwa yavo vatamusuuvira vamali kukalagirwa, kigira si vasuuvira Mwana muderwa wa Nyasaye mba. 19Likalagwa liene ni yili: Uvulavu vumali kuuza mu kivala, navuzwa avandu vayaanza kisundi kuvita uvulavu kigira vikolwa viavo viveeye vidamanu. 20Mundu woosi okola uvudamanu adunyiraa uvulavu, kandi sianyala kuuza ku vulavu mba, kigira siyenya vikolwa vivie vidamanu vimanyikane havulavu mba. 21Navuzwa olondaa agiligali yazaa ku vulavu, kunangwa vikolwa vivie viloleke vikoleywi mu liitia Nyasaye.
Lilolekiza lia Yohana Mubatizi ku Yeso
22Inyima wa yaga, Yeso harara na aviigi veve vazia mu kivala chi Ivuyuda. Yamenya yo harara navo ku ing'inga nabatizaa avandu. 23Yohana kandi yaali nabatizaa avandu mu Ayinoni, ahimbi Salimu, kigira amazi manyingi gaali ahene yaho. Avandu vazia kuye, naye yavabatiza. 24Ing'inga yeyo Yohana yaali nakiri kovofwa Muvuhambe.
25Amahangari malulu gatulira hagati ha valala ku aviigi va Yohana nu Muyuda mulala#3:25 Muyuda mulala: Vitabu vilala viveeye na Avayuda valala. ku makuva gu kwisaava#3:25 Kwisaava: Mwima gwi lisuuvira lia Vayuda kuva munifu kali chukulia nikitaliivwa, kandi lwu mundu atulaa mu chiitu. kolondekana ni miima ji lisuuvira liavo. 26Kunangwa aviigi yava vazia ku Yohana nivamuvoolera, “Mwigizi, wizulizaa mundu waali harara niivi ku lovega lwa ivugwi wu mugera gwa Jorodani, uwa ivi walolekiza amakuva gi iliiza lilie? Henza, kalunu abatizaa, na avandu vosi vazizaa kuye!”
27Yohana yavavolera, “Mundu sianyala kuva ni kindu nataheeveywi na Nyasaye mba. 28Munyi aveene muveeye avalolekizi vange ku aga ndavoora ndi, ‘Inzi simbeeye Mesia, navuzwa ndatumwa na Nyasaye kwimilira imbiri weve!’ 29Oyo oveeye nu Mwiha osereywi niye mwami we keserero. Navuzwa mulina wu mwami we keserero, usingira nukuhuliriza, asangalaa ligali lwa ahuliraa mwami wekeserero namolomaa. Kigira yaga uvuyanzi yivwo nivwo vwa inzi mbeeye navwo; kandi vuduukiziywi. 30Gaduukanaa oyo ameede koneneha ninzi gandukira ngeehe.”
Uyu uzaa kutura mwigulu
31Uyu uza kutura mwigulu aveeye munene kuvita vosi; uyu uza kutura mu kivala aveeye wikivala, kandi amolomaa vindu vie kivala. Navuzwa uyu uzaa kutura mwigulu nu munene kuvita vosi. 32Oyo ovola aga yalora na aga yahulira, navuzwa sihaveeyeho nu mundu uvugilira amakuva geege. 33Navuzwa mundu woosi uvugilira lilolekiza lilie umali kuviika muhuri gwi livugilira lilie ku yaga ndi, Nyasaye aveeye wiligali. 34Uyu wa Nyasaye yatuma amolomaa amakuva ga Nyasaye, kigira Nyasaye amuhezaa uvudukiru vwa Roho weve vugira kegero. 35Baba ayaanza Mwana weve kandi umali kuviika vindu viosi hasi hu vunyali vwivwe. 36Uyu usuviraa Mwana wa Nyasaye, aveeye ni livamwoyo litahera mba. Navuzwa uyu utatiza Mwana wa Nyasaye, sialilola livamwoyo kigira amaduywa ga Nyasaye galamenya kuye.
Yeso Yamoloma nu mukali Musamaria
©Bible Society of Kenya, 2019
