Marko 5
5
1Va duka lwangereka lundi lwenyanza, mkivala kya Vagadara. 2Lwa yika mu liato nonoho va vugana nomundu wa twula mbilindwa wa li nomwoyo mudamano, 3wa menya mu vilindwa; si ha veye nomundu kali mulala wa nyala kumboha, kali neminyororo. 4Ya bofwa hali kanyingi nevivya neminyororo, ya gudula minyororo, ya kalaga vivya. Si ha li nomundu wa nyala kumkiring'annya. 5Tsinyinga tsyosi ubudiku nombasu ya li mvigulu no mbilindwa na a hanzuka ni yikalaga namagina. 6Navutswa lwa ya lola Yesu na a kikiri ihale ya nyagula na a mu sigamira, 7na a hanzuka, na a vola, Ku veye ndi nive, Yesu Mwana wa Nyasaye Uveye Igulu wa Vyosi? Nkwisuhidza ku Nyasaye u ta nda mbidza mba. 8Kigira ya mbolera Twula ku mundu, ive mwoyo muda mano. 9Ya mteva Lieta lilyo ni bwaha? Na a mbolera Lieta lyange ni Legiona: kigira ku veye minyingi. 10Na a mgoonya munonono a ta gyi kunga mkivala nnba. 11Kva li ho himbi mkigulu kyayo kinene kyetsimbidzi ni tsyaya. 12Gya mu goonya ni gyi vola, U ku tume ku tsie ku tsimbidzi kwingire mutsyo. 13Ya gyi ha munwa. Myoyo midamano gya twula ni gyi ingira mu tsimbitsi: kyayo kyosi kya sulunguta tsimbiru ku kisulungutu ni ki tsia munyanza, (mbula tsya li tsielfu tsiviri) ni tsi kudzera munyanza. 14Navo va li avayi viruka, ni va vola amakuva mu lidala nomkivala. Ni va tsia kulola aga kola. 15Ni vadza ku Yesu ni va lola wamademone ga gumira zana wa li na legiona, ni ikaye ni yivika tsingubo na a homati; ni va tia. 16Navo va lolanga va va volera aga kolwa ku mundu wa amademone ga gumira, kandi amakuva getsimbidzi. 17Ni va tanga kumgoonya a twule mkivala kyavo. 18Lwa ya mala kwingira muliato, wamademone ga gumira ya mgoonya a ve halala naye. 19Navutswa Yesu ya mwambaka nnya na a mu volera, Tsia yengo wowo mu vandu vovo, u va volere vindu vinene ndi vyo Mwami a ku koleye nokukuvererera. 20Na a tsia na a tanga kwilwadza mu Dekapoli vindu vinene ndi vya Yesu ya mu kolera: na vandu vosi va genya.
21Yesu lwa ya li na a mala kwambuka ni liato kandi lwangereka lundi, kiduma kinene kya mu vungira; naye ya li na a va himbi nenyanza. 22Henza, yadza mulala ku vakulundu velivugana, lieta lilye lya langwa Jairo; lwa ya mu lola ya gwa ha virenge vivye, 23na a mu goonya munonono, na a vola, Mkana wange mkekeke a lenya kukudza: nku goonya, udze u vike kuye makono gogo, a honnywe, a ve mwoyo. 24Na a tsia halala naye; nekiduma kinene kya mu londa, ni va mu mina.
25Mkali mulala wa li na a lwala na a tadza masahi mihiga likumi negyiviri, 26wa vakumu vanyingi va kupidza kivi kinyingi, na a mala vyosi vya ya li navyo, na a vula kuhona, navutswa lukudzo lwa mu kira, 27lwa ya hulira amakuva ga Yesu, yadza inyima mu kiduma na a mu dira ku ingubo yeye. 28Kigira ya vola, Ni ndira ku ingubo yeye vutswa, nda honnywa. 29Nonoho litadza lyamasahi gege lya kalidzira; na a ma nya mu mubiri gwigwe u honnyeywi ulukudzo lwilwe. 30Nonoho na a manya mwene, tsingulu tsi twuli kuye ya girunkana mu kiduma, na a vola, Ibwaha u ndiye ku tsingubo tsyange? 31Avegidzwi veve va mu volera, U lolanga kiduma ni ki ku mina, kandi u vola, Wa ka ndira ni bwaha? 32Na a henza tsimbega tsyosi a lole u koli kindu yiki. 33Navutswa mukali ya tia na a degera na a manya kya a koleywi, yadza na a gwa hasi imbiri wewe na a mu volera gosi ageligali. 34Na a mu volera, Mkana wange, lisuuvira lilyo li ku honnyi; genda bulahi, u ve mulamu.
35Na a ki vola, avomkulundu welivugana vadza ni va vola, Mwana wowo u kudzi, u nyangidzira ki kandi Mwegidzi? 36Navutswa Yesu, lwa ya hulira likuva lya volwa, ya volera mkulundu welivugana, U ta tia mba, suuvira vutswa. 37Si ya leka mundu kumulonda navutswa Petro, na Yakobo, na Yohana amwavo Yakobo veng'rne. 38Va duka ha inyumba yomkulundu welivugana; na a lola kivihiri navanyingi va lira ni va syoma ligali. 39Lwa yingira, ya va volera, Kigira ki mu kolanga kivihiri na mu syoma? Mwana si a kudzi mba, navutswa a gonanga tsindolo. 40Va seka ni va mu kola kihenyahenye. Navutswa lwa ya va twulidza vosi, ya tsia halala na ise mwana na mama wewe nava ya li navo, ni yingira ho mwana ya li na a gona. 41Na a gumira mwana mkono gwigwe, na a mu volera, Talita kumi, livola lyago nokuvola, Mkana, nku volera, Vuka. 42Nonoho mkana ya singira na a genda; kigira ya duka mihiga likumi negyiviri. Nonoho va genya ligenya linene. 43Na a veganehidza ligali, va ta leka mundu kali mulala a manya yaga: na a va volera, a hebwe vyokulia.
©Bible Society of Kenya, 1967
