Matayo 28
28
1Ku lisabato lwa lyenya kufwa lwa bwenya kukya kuduka ku lidiku lyokutanga iisidza, Maria Magdalene na Maria wundi vadza kulola kilindwa. 2Henza, lya li lidegera linene lyekivala; kigira ingelosi wo Mwami yika ni yadza na a gomagominya ligina, ni yikala ku. 3Ligondo lilye lya li kuli luheni, netsingubo tsitsye tsya li tsindavu kuli likonza: 4kigira ubutihidzi bwitwe avalindi va degera ni va gwa kuli avakudzu. 5Ingelosi ya tivula na a volera avakali, Mu ta tia mba, mwinye; kigira mmanya mwenya Yesu wa bambwa. 6Si a veye hano mba; kigira u simuguki, kuli wa ya vola. Hambi mu lole ho Mwami ya gona. 7Mu tsie bwa ngu mu volere avegidzwi veve, U simuguki mu vakudzi; kandi henza yimira imbiri wenyu kutsia Galilaya; mu la mu lola yo: henza mmali kumu volera. 8Ni va twula mu kilindwa nobutii nobuyanzi bunene, ni va nyagula kuvolera avegidzwi veve. 9Henza, lwa va tsia Yesu mwene ya vugana navo na a vola, Mu sa ngale. Ni vadza ni va gumira virenge vivye ni va mu sigamira. 10Yesu ya va volera, Mu ta tia mba: mu tsie mu volere avamitu vange va twule va tsie Galilaya, va la ndolera yo. 11Navo lwa va li ni va genda ku inzira, henza, avalala ku vasikari va duka mu lidala, ni va volera avasalisi vanene amakuva gosi aga kolwa. 12Lwa va vugana halala navaku lundu ni va kola kyina, va ha avasikari tsishilling tsinyingi, 13ni va vola, Voli he, Avegidzwi veve vadza ubudiku ni va mwiva lwa kwa li kugona tsindolo. 14Amakuva yaga ni ga duka mu matu gomunyampara, ku la mu goonya, mwinye mu ta henda mwoyo mba. 15Va manya ni va vugula tsishilling, ni va kola kuli vegidzwa: namakuva yaga ga landa mu Vayuda kali kuduka lero.
16Kunangwa avegidzwi likumi na mulala va tsia Galilaya, kuduka mu kigulu kya Yesu ya va laga. 17Lwa va mu lola va mu sigamira; navutswa avalala va hayahayidza. 18Yesu yadza na a volerana navo, na a vola, Mbebeywi tsingulu tsyosi mu ligulu nomu lirova. 19Kigira yaga mu tsie kukola avegidzwi ku tsihiri tsyosi, mu va batidze mu lieta lya Dada, nomu lyo Mwana, nomu Iva Roho Mtakatifu: 20mu vegidze kugumira vyosi vya nda mu laga: kandi, henza, inze mbeye haiala nemwinye madiku gosi, kali kuduka ku kiheri kyenyinga.
©Bible Society of Kenya, 1967
