MARKUS 8
8
Yesus amos owe 4.000 atetame atakam
(Mat. 15:32-39)
1Emesare. Asep barerawa, owe tananenak aojarisiemesen. Are amos apoken. Yesusam emes apore, wanam atakam abajamkai owe akoromen. 2“Dere ara owe tanane seisnak aoorpormin. Are bare bamintep takan aememmarom. Are amos apok aemapmas. 3Me wan owe aites asan setep apok. Erarawa dere era owe, amos banda apok aemosomtey, are waut damo tomor ajatostemas.” Emes atakam aesimen.
4Abajamkai owerawa, “Dare tame apok asan aememmarom. Owe, ara owe tanane amos bandatukuap ete asana taatas?” Emes atakam aesimesen.
5Me Yesus arawa, “Ara atoommakam amos jise wama tamenem?” Emes atakam aesimen. “Dare amos jise pomas ban jamnuk atoommarom.” Emes atakam aesimesen.
6Ararawa Armat Ipit era owe tanane baemap atakam asakamtamen. Are era amos jise poman ban jamnuk ataeren. Are terima kasih atakam Allah akorome, wanam amos jise akookomen. Akookomerawa, Are era amos abajamkai owe, era owe tanane sai basaietam atetamen. Erarawa sai asaietamesen. 7Are enamo kope bamintep atoompesen, Yesusam era enamo apore, wanam terima kasih atakam Allah aokoromen. Are abajamkai owe era enamo sai basaietam atakam asakamtamen. 8,9Era owe era amos andesen. Are jak andatukuapteteresen. Oweam 4.000 apayeen. Me Yesus bajamkai oweam era owe tanane andaeremtiies amos, ese poman ban jamnuk aoweapomesen. Yesusam era owe tanane baesos atakam aesimtamen. 10Armat Ipitam, abajamkai oweam, ti andaejuuesen. Are Dalmanuta tapirmi ajiritesen.
Parisi owe, Yesus, jinim bae pak baem, atakam ajanimes atakam
(Mat. 16:1-4)
11Parisi oweam Yesus ambaromesen. Are atakam Yesus ajamkoramesen. Are Armat Ipit baempor aren. “Yesus, Wore jinim bae pak paemey. Dare, Allah, afiak pak Wora batetam apaye bapor.” Emes atakam aesimesen. 12Yesus jak sake jeses daytu afeemen. “Ara ajaniemas owe jinim bae pak bapor atakam apa janimmanis? Atakamnak, Dere jinim bae pak ara owe baporomtam apok.” Emes atakam aesimen. 13Erarawa Yesus Parisi owe beken ajiosen. Are ti andaejuue, wanam poman ajiren.
Parisi owe anama Herodes aoemtas pak atakam
(Mat. 16:5-12)
14Emesare. Yesus bajamkai owe banda pak batoomjuu, bimak binip ajanimemesen. Are amos jise taka atoomjuusen. 15Yesusam ataane atakam era owe aweomen. “Tare Parisi owe aroti eek turuar. Tare Herodes aroti eek turuar.” Emes atakam aesimen.
16Erarawa Yesus bajamkai owe armamon atakam ajamkoramesen. “Armat Ipit dare banda pak batoomjuu apok apormar apeno. Erarawa Are emes atakam akorommaro.” Emes atakam aesimesen.
17Yesusam era atakam ajamkorames aporen. Ararawa, “Tare banda pak batoomjuu apok atakam ajamkorammakam wama tamenem? Tare waa ajiire aemansar tamsam apokane? Tare jane sake oweane? 18Tare banamek aptam. Me, tare baemepor asan apokane? Tare janemak aptam. Me, tare jane baemejie asan apokane? Tare bimak binip etejanimemekemane? 19Dere amos jise ban taka, era owe 5.000 akookomamtamo, era andaeremtiies amos aotaajanimekem, ese wama tamen oweapomekem?” Emes atakam aesimen.
“Dare era andaeremtiies amos, ese 12 aoweapomom.” Emes atakam aesimesen.
20“Dere amos jise poman ban jamnuk era owe 4.000 akookomamtamo, era andaeremtiies amos aotaajanimekem ese wama tamen oweapomekem?”
“Dare era andaeremtiies amos ese poman ban jamnuk aoweapomom.” Emes atakam aesimesen.
21Me Yesus arawa, “Emesare, ara akoremin atakam jane bajiekorom apokane?” Emes atakam aoesimen.
Yesus banamek kapie ipit, Betsaida tapirmi, banamek awaramemomtame atakam
22Emesare. Are Betsaida tapirmi asetesen. Oweam banamek kapie ipit Yesuspu atoomtinesen. Are Yesus atakam fiak ajanimesen. “Wore ara banamek kapie ipit damo ban pakurumey.” Emes atakam aesimesen. 23Yesus arawa, era banamek kapie ipit tamepem ban akimome ajanetomasen. Are besa era ipit banamek ajiapomen. Are era ipit ajateporen. “Wobanamek baware ape?” Emes atakam aesimen.
24Era ipit jimas awasien. Banamek andieporen. Are atakam akoren. “Dere owe ajarmas apormin. Ara owe, ere wus tamen awar.” Emes atakam aesimen.
25Yesusam ban era ipit banamekpu aotaapomen. Erarawa, era ipit aporkoromen. Abanamek awaremen. Are pak takes akot aporen. 26Yesusam atakam era ipit asakamtamen. “Wore tamey! Wokota botawejar bas.” Emes atakam aesimen.
Petrus, Yesus Allah Aeremtaere Ipit atakam afasime atakam
(Mat. 16:13-20; Luk. 9:18-21)
27Emesare. Yesus anama abajamkai owe Kaisarea Filipi dasman samaniin samaniin aesosesen. Era waut Yesus abajamkai owe ajateporen. “Dere ta ipitim? Owe wama tamen atakam koremas?” Emes atakam aesimen.
28Abajamkai owerawa, “Wan owe atakam Wore Yohanes Owe Bwi Bakupimtaer Ipit. Wan owe ere, Wore Elia. Wan owe ere, Wore Allah atakam bakoretam ipit taka.” Emes atakam aesimesen.
29Yesusam, “Tare ere, wama bimak binip tetarammakam? Dere ta ipitim?” Emes atakam aesimen.
Me Petrusam atep ajiten. “Wore Allah Aeremtaere Ipit, Worare.” Emes atakam aesimen.
30Me Yesus arawa, atakam fiak era owe asakamtamen. “Emes atakam owe baesimtam bas.” Emes atakam aesimen.
Yesus dambir atemto atakam
(Mat. 16:21-28; Luk. 9:22-27)
31Yesusam atakam abajamkai owe aememtamen. “Asamot Anakot Ajaoreme Ipit bajirisem daytu aememtem. Me duturu oweam, me Allah Tame pak baem owe daytuam, me Musa Basakamtam Atakam baememtam oweam, Armat Ipit awotapemtemas. Oweam Armat Ipit atatiitemas. Atatiitas arawa, bare bamintep Armat Ipit ajaorwasittem.” Emes atakam aesimen. 32Emesare, Yesus emes atakam basonak akoren. Petrus arawa, Yesus damo akemtaeren, wanam Armat Ipit ajatemotaeren. “Wore emes bas.” Emes atakam aesimen.
33Yesus arawa, aowaiomen. Are wan abajamkai owe aorome ajasisiompiren, wanam Petrus ajatemotaeren. “Bii Kapar Ipit! Wore te! Debipu baemem bas. Era bimak binip atetarammarem ere, asamot bambi bimak binip taka. Ere Allah bimak binip jipu apok.” Emes atakam aesimen.
34Emesare, Yesus era owe tananeam, abajamkai oweam ajaten. Are atakam era owe akoromen. “Owe Dera bajamkai jak aseseromemtas, are aapak bimak binip bajanimomem bas. Anom asalib bataatetertas. Wanam Dera bajamkaiaartanis. 35Owe, adamo bajorem jak aseseromemtas, are bajorem apoknak aemtemas. Wan owe ere, karai Dera aetamtemanis. Are ara Allah Akot Atakam owe aememtamtemas. Era owe dambir emes pak baem damon atemtas, are ajoremtemas. 36Owe ara aemansa tapirmi pak takes ataatkoromtas apaye, me, bajorem apok aemtas apaye, ere are asan akot baemeemap asan apok. 37Owe, jiine bae pak, jipit taka aememayes pak jow baemeuumamtaer asan apoknak. 38Era ajaniemes owe, Allah awotapemmas. Are jokoman owe. Emesare, era owe damke Dera baemem apaye, are deatakam damke baemem apaye, ere Asamot Anakot Ajaorome Ipit era oweam damke akamemomtem. Armat Ipit andaeto bare are. Era bare Armat Ipit, Aritipit afiak pak aptam andaetem. Are turunak malaikat owe takan andaetemas.” Yesus emes atakam aesimen.
@LAI 1994
