MARKUS 12
12
Anggur kebun baetaa atakam
(Mat. 21:33-46; Luk. 20:9-19)
1Emesare. Yesus baetaa atakam era owe akoromen. “Jipit taka anggur kebun ajapomen. Ararawa tiri afojimapomen. Erarawa anggur bwi bafam jipa asisiapomen. Tameam oupnak aeapomen. Era tame anggur kebun banamek batai baemap asan. Anom era kebun, karai baetam owe aotasimtiitamen. ‘Tare deanggur kebun karai baetamani, dere wan anggur eek atetamtemin. Me wan ere, dos.’ Emes atakam aosimostamen. Ararawa, wan ju tapirmi aesosen. 2Erarawa, anggur eek bakokomtaa bwi aemansen. Kebun armat ipit arawa, wan karai baetam ipit taka, era kebun karai baetam owepu ambirimemomen. Era ipit, aanggur eek bamartaa ambirimemomen. 3Me, era karai baetam owerawa, era ipit ajipirtaeresen. Are era ipit wusup ates, wanam bambi ban taka afasimdaemesen. 4Kebun armat ipit arawa, wan karai baetam ipit era asan aombirimemomen. Me, kebun karai baetam owerawa, era ipit kuus atakamtiiesen. Are pota pak era ipit aemesen. 5Kebun armat ipit arawa, wan karai baetam ipit taka erapu aombirimemomen. Era karai baetam owerawa, era ipit atatiiesen. Kebun armat ipitam, wan karai baetam owe tanane erapu aombirimemomen. Era karai baetam owerawa, wan owe wusup ajapera ajiesen. Wan owe ere, atatiiesen.
6 Kebun armat ipit, wan ipit takakope aemomen. Era ipit ere, andepen. Are andep afaimomen. Armat ipitam, ‘Era owe detii atakam ji taka aetemas.’ Emes atakam aesimen. 7Me, era karai baetam owerawa, armamon atakam ajamkoramesen. ‘Ara aememar ipit, aritipit pak takes atoomemtem. De, batatiiamo! Dare aritipit pak takes batasimtaetamo.’ Emes atakam aesimesen. 8Erarawa, era ipit andep ajipirtaeres, wanam atatiiesen. Atatiies arawa, are era dambir ipit kebun dasman akoromosomesen.
9 Anggur kebun armat ipit arawa, wama tamen emto? Emesare, are era kebunpu aesostem, wanam era kebun karai baetam owe takes atatiitem. Ararawa, era kebun wan karai baetam owe aootasimtiitamtem. 10Tare Alkitab atakam baca baepor ape? Alkitabam: ‘Tame baeapom owe, eka taka pota apores, wanam era eka aeremtiies. Era ekarawa, tame bae eka anakotnak aemanse. 11Emesare, Tuhan era pak aeme. Dare era aeme pak akotnak apormarom.’ Alkitab emes atakam akorem.” Yesus emes atakam aesimen.
12Yesus era baetaa atakam akore ere, Are Yahudi agama kapar owe atakam akoromen. Era oweam emes aporesen. Ararawa, Yesus bajipirtaer aemporesen. Me, Are ombare era owe tanane baresen. Erarawa are Yesus beken ajiosesen.
Uang raja ipit batetam atakam
(Mat. 22:15-22; Luk. 20:20-26)
13Emesare, era owe, Parisi oweam, Herodes bajamkai oweam, Yesuspu ambirimemesen. Are, era owe, Armat Ipit jaos atakam apaye baempor ambirimemesen. 14Era oweam Yesus ambaromes, wanam atakam Armat Ipit akoromesen. “Guru! Wore turu Ipit apormarom. Wore owe era atakam akoremas ombare apok. Wore, ‘Wan owe juas aptam. Wan owe juas apok,’ emes bajie apok. Me, Wore Allah bokotpu atakam, atakamnak aememtamemarem. Emesare, dare Wora bajatepora. Owe raja Kaisar atakam asakamtame uang ara atetamtas, ere akot ape? 15Dare uang Kaisar batetam ape? Batetam bas ape? Wama tamenem?” Emes atakam aesimesen.
Yesus arawa, era owe pir aees aporen. Ararawa, “Tare Dere wama tamen empormankum? Emesare, uang perak taka Dera tetamani. Dere era uang bapora.” Emes atakam aesimen. 16Erarawa, are uang Yesus atetamesen. Armat Ipit arawa, era owe ajateporen. “Ara aemapomes gambar ta bim? Ara waoam, ta ipit juasem?” Emes atakam aesimen. Era owerawa, “Are Kaisar bi. Are Kaisar juas.” Emes atakam aesimesen.
17Yesus arawa, “Emesare, tare Kaisar pak, Kaisar atetamay. Tare Allah pak, Allah atetamay.” Emes atakam aesimen. Erarawa era owe Armat Ipit akore atakam jinim bay aeesen.
Dambir owe ajaorwasittas atakam
(Mat. 22:23-33; Luk. 20:27-40)
18Emesare. Saduki oweam Yesus ambaromesen. Saduki owe abimak binip ere, “Dambir owe bajaorwasit apok,” emes bimak binip atetaramemas. Erarawa, Armat Ipit aojateporesen. 19“Guru! Musa emes basakamtam atakam aeapomtamero. ‘Petae aptam ipit dambir jii apok aemto, areot era dambir aemto ipit aremo botaetto. Ararawa, jii arepot bafimtamto.’ Musa emes atakam aeapomen. 20Emesare, jipit taka oorey jii poman ban jamnuken. Me biiti ipit petae ajiemen. Me, armat ipit jii bafim apok dambir aemen. 21Abeak ipitam, dambir aeme ipit aremo aotaeten. Me, anom jii bafim apok dambir aemen. Wan beak ipitam emes taka aemen. 22Erarawa, era oorey poman ban jamnuk takes dambir aemesen. Jii bafim tamen apoken. Asep arawa, era taotam dambir aemen. 23Emesare, era owe poman ban jamnuk era taot taka ajiema ajaiesen. Me, dambir aemes owe ajaorwasittas bare, era taot ere, ta ipit aremo emapto?” Emes atakam aesimesen.
24Yesus arawa, “Tare Alkitab atakam tamsam apok. Tare Allah afiak pak tamsam apok. Erarawa tare bimak binip jiiti aememmakam. 25Dambir aemtas owe ajaorwasittas, oorey petae bojiem apok aemtemas. Tapesam oorey bojuut apok aemaptemas. Me, are Surga oup malaikat owe emes tamen aememtemas. 26Era dambir aemtas owe ajaorwasittas atakam akoremakam are. Emesare, bonaknak, Musa era fa aptam wus kari jisimak jee aptam, atakam aeapome. Armat ipit Allah akorome atakam aeapome. Era atakam ere, ‘Dere Abraham aAllah. Denom Ishak aAllah. Denom Yakob aAllah.’ Allah emes atakam aesime. Tare era atakam baca emeeekem apeno. 27Emesare, Allah, dambir owe aAllah apok. Me, Are jatiaptam owe aAllah. Me, tare bimak binip jiitinak owe aememekem.” Yesus emes atakam aesimen.
Daytinak basakamtam atakam
(Mat. 22:34-40; Luk. 10:25-28)
28Emesare. Musa Basakamtam Atakam baememtam ipit taka era asan amberemen. Are era owe atakam ajamkorames jane ajien. Are Yesus era owe atep ajite atakam akotnak aporen. Erarawa are Armat Ipit ajateporen. “Musa Basakamtam atakam tanane ataetiitamero. Me, daytinak basakamtam atakam, ere ete atakamum?” Emes atakam aesimen.
29Yesus arawa, “Daytinak basakamtam atakam arare: ‘Israel owee! Ara atakam jane fero. Tuhan daAllah. Are Tuhan taka arare. 30Emesare, woTuhan Allah daytinak afaimkoromey. Wore wojak aptamam, wobimak binip aptamam, wofiak pak aptamam, Armat Ipit afaimkoromey.’ Allah emes atakam aesime. 31Me wan daytu basakamtam atakam ere, emes are: ‘Wojoo owe bafaimjiimey— wodamo afaimemarem emes tamen awara.’ Allah emes atakam akoren.” Yesus emes atakam aesimen.
32Musa Basakamtam Atakam baememtam ipit arawa, atakam Yesus akoromen. “Ara akoremarem atakam ere akot. Are atakamnak. Emesare, Tuhan taka, ere Allah. Wan Allah apok. 33Oweam ajak aptamam, abimak binip aptamam, afiak pak aptamam, Allah bafaimkoromtas. Are ajoo owe bafaimjiimtas— are damo amba afaimemas emes tamen awara. Are takes, ere atakamnak. Owe ara asakamtame atakam amnuk ji bae, ere akotnak. Owe, pak Allah jis bajaatam apaye, pak Allah bataetiitam apaye, ere akotnak kopeepe.” Emes atakam aesimen.
34Emesare, Yesus era ipit akore atakam, akotnak aporen. Ararawa, “Wore Allah aobaomep ipit baemem setepnak.” Emes atakam aesimen. Era bare ajiire, owe Yesus bojatepor apok. Are ombare aememesen.
Allah Aeremtaere Ipit atakam
(Mat. 22:41-46; Luk. 20:41-44)
35Emesare. Yesus Allah Tame bomon atakam aememtamen. “Musa Basakamtam Atakam aememtamemas oweam, ‘Allah Aeremtaere Ipit, ere Daut wurpis ipit.’ Emes atakam aesimemas. Emes atakam akoremas ere, wama tamenem? 36Bonaknak ere, Allah Jip, atakam bimak binip Daut atetame. Daut arawa, emes atakam akore:
‘Tuhan, atakam deTuhan akorome: “Wore debo poman aemapey— Dere wojii owe akumimosomkoromtey bare ajiire.” Tuhan emes atakam akore.’ Daut emes atakam aesimen. 37Emesare, Daut, Allah Aeremtaere Ipit, atakam akore, ‘Are deTuhan.’ Emes atakam aesimen. Erarawa, Allah Aeremtaere Ipit, Daut wurpis ipit aememe, ere wama tamenem?” Yesus emes atakam aesimen.
Musa Basakamtam Atakam baememtam owe atakam
(Mat. 23:1-36; Luk. 20:45-47)
Era owe tanane, Yesus akore atakam jane ajies, are jak akot aememesen.
38Emesare, Yesus wan atakamam aememtamen. “Tare Musa Basakamtam Atakam baememtam owe turuar. Are baju jirao ajiimomemas, wanam pasar asan atawejaremas. Owe, ‘Selamato’ ara bajie jak aseseromemas. 39Yahudi Owe samayen tame bomonam, pakambwi tame bomonam, bonak owe baemap asan jak aseseromemas. 40Tano tapes potet atutumemas, wanam aapak takes wosom aetaetemas. Emesare, atakam Allah ajanimtas, atakam jiraonak ajanimemas. Me, ere ir pitin atakam taka. Emesare, Allah era owe daytu ajurusumtem.” Yesus emes atakam aesimen.
Tano taot Allah Tame uang atetame atakam
(Luk. 21:1-4)
41Emesare. Yesus, Allah Tame uang bataapom asan, bimin ajiapen. Owe tanane uang era asan ataapomes aporen. Uang daytu owe, uang daytu era asan ataapomes aporen. 42Pak apok tano taotam ajinisen. Are uang sen kope jamnuk era Allah Tame uang bataapom asan aoweapomen. Era uang sen, harga kopenaken. 43,44Yesusam abajamkai owe ajaten. Are atakam era owe akoromen. “Atakamnak, era owe tanane uang daytu. Are wan uang era uang asan ataapomares. Ara aemema tano taot, ere pak apok. Are auang takes era asan ataapomar. Ere aapak bajitin uang takes arare. Emesare, era taot uang daytu emes era asan ataapomar. Wan owe takes uang janderes emes ataapomares.” Emes atakam aesimen.
@LAI 1994
