LUKAS 1
1
LUKAS
Aeapome Allah Akot Atakam
1Teofilus akotnak! Owe tanane, Allah dawaut aemaarir pak, aeapomes. 2Wan owe, era bonaknak aemaarir pakam, era japen aemaarir pakam, aporaaris. Are, era atakam, wan owe akoretames. Me wan emes atakam jane ajies owe, era atakam aeapomes. 3Denom era bonak pakam, era japen pakam, aoorporkoromo. Emesare dere era atakam wora baeapomkoromtam, bimak binip atetaramo. 4Ere, era aememtamaarim atakam, atakamnak aporkoromtemarem.
Yohanes Owe Bwi Bakupimtaer Ipit ajisamesto aesimtame atakam
5Emesare. Era Yudea tapirmi ere, raja ipit juas Herodes aememen. Era baream Allah Tame pak baem ipitam juas Sakaria aememen. Me Sakaria ere Allah Tame pak baem saman juas Abia bajamkai ipitin. Aremoam juas Elisabet. Armat taot Harun wurpis. 6Allah era ipit aremom turunak aporen. Are Tuhan basakamtam atakamam, Tuhan, ji aeemis taka aren. 7Elisabetam peree taot aemapen. Emesare era ipit aremom jii apoken. Era ipit aremom emak fiak aemapemisen.
8,9Era bare ere, Sakaria, are takan Allah Tame pak baem owe, era pak baem afiesen. Me, Allah Tame pak baem owe, eka koser andaetaetiitetera ajiesen. Era pak, wan Allah Tame pak baem ipit, Tuhan tame bajii, wanam pinim akot pak jis bajaatam, aeremtaera ajiesen. Era bare, ere Sakaria aeremtaeresen. Emesare, armat ipit, era pak baem, Allah bipu aememen. 10Era pinim akot pak jis bajaatam jam ere, era owe tanane, atakam Allah bajanim, tasane aememesen. 11Emesare, Tuhan malaikat taka Sakaria bipu ajisomen. Are era pinim akot pak jis bajaatam joopu ajisomen. 12Me Sakaria era malaikat apore, wanam ajasipiemen. 13Era malaikat ere, atakam akoromen. “Sakaria! Ombare bas! Allah atakam ajanimaarim atakam jane ajim. Me woremo Elisabet wondep ajisipetiitem. Wonom armat ipit juas Yohanes aemtiitemarem. 14Wonom jak akot aememtemarem. Armat ipit ajisamesto, owe tananeam jak akot aememtemas. 15Tuhanam armat ipit juas aptam ipit aportem. Me armat ipit anggur bwiam, wan asesa bwiam, banda apoknak aememtem. Are arsoot jak bomon aemomjisto, Allah Jip, armat ipit aemomemkoromtem. 16Armat ipitam, Israel owe tanane, Tuhanpu aowaimtaertem. Tuhan ere, era owe aAllah. 17Armat ipit bonak ajartem. Me Tuhan ere, asep ajartem. Bonak ere, Elia, Allah Jipam, fiak pakam, aemomen. Emesare, Yohanes, Allah Jipam, era fiak pakam, aemomemtem. Armat ipit, era owe duturuam, era jiiam, bimak binip takan batetaram aememtamtem. Are era atakam baoo owe, turunak owe baemem bimak binip batetaram aememtamtem. Emes aemto ere, Tuhan aowe aobandae ajasosoemomtem.” Era malaikat emes atakam aesimen.
18Sakariarawa, atakam era malaikat akoromen. “Dere, era aesimtammanim atakam, atakamnak apaye, atakamnak apok apaye, baporkorom ere wama tamenem? Dere emak fiak ipit. Deremoam emak fiak taot.” Emes atakam aesimen. 19Me malaikat arawa, atep ajiten. “Dere Gabriel. Denom Allah karai baetam ipit. Armat Ipit, aatakam akot, wora baesimtam ataendaeman. 20Wonom baporey! Era aesimtammin atakam, asep bare, era atakam jipu aemtem. Wore ere, era atakam, atakamnak apok ajimarem. Emesare, wore okor aememtemarem. Wore atakam baemekore asan apok aememtemarem— era aesimtammim atakam era atakam jipu aemto bare ajiire.” Malaikat emes atakam aesimen.
21Era owe tananeam, Sakaria bajis, banamek tarainak asiromesen. Emesare, armat ipit Allah Tame bomon ajiikamisiemen. Era owerawa jinim aeesen. 22Armat ipit arawa, ajisen. Me, are atakam baemekore asan apoken. Era owe tananerawa, armat ipit, Allah Tame bomon, pak taka bambi apore aporesen. Armat ipitam, ban bambi ajiraomen. Are okor ipit aememen.
23Emesare. Armat ipit ere Allah Tame pak baem aemkorome bare aemansen. Ararawa, atame aesosen. 24Asep barerawa, aremo Elisabet jak asiapen. Elisabetam pir ban taka tasan basojis apoken. Are atakam akoren. 25“Emesare, Tuhan emes asan akot atetaman. Erarawa owe bifane dera bofeomem apok aemtemanis.” Emes atakam aesimen.
Malaikat Yesus ajisamesto aesimtame atakam
26Emesare. Elisabet pir poman ban taka jak aptam aemapen. Allah malaikat juas Gabriel Galilea tapirmi kota juas Nasaret ambirimemomen. 27Are tamane ban amsam apok taot juas Mariapu, ataendaemen. Armat taot owe juas Yusuf bajuut aemapen. Me Yusuf, Daut wurpisin. 28Me malaikatam Maria tame ajiie, wanam atakam akoromen. “Selamat! Wore Tuhan afaimomemman taot worare. Armat Ipitam asan akot wora aemman.” Emes atakam aesimen. 29Armat taot ere, emes atakam jane ajie, wanam bimak binip arke atetaramen. “Emes selamat atakam wama tamenem?” Emes bimak binip atetaramen. 30Me malaikat arawa, atakam armat taot aokoromen. “Maria! Ombare bas! Allah wora afaimomemman. 31Wonom jak asiaptemarem. Wonom oorey jii ajisipetiitemarem. Wonom era jii juas Yesus aemtiitemarem. 32Armat Ipit juas aptam ipitnak aememtem. Owe, Armat Ipit, atakam akoretemas. ‘Are oupnak Allah Andep.’ Emes atakam aesimtemas. Bonaknak ere, Armat Ipit arerokor, Daut, raja ipit aememe. Tuhan Allah, Armat Ipit emes tamen raja ipit ataemomtem. 33Armat Ipit Yakub wurpis aomepaartem. Are era owe aomepto bakari apok aemtem.” Emes atakam aesimen.
34Me Mariaam, atakam era malaikat akoromen. “Me era akoremarem atakam wama tamenem? Dere oorey apok.” Emes atakam aesimen. 35Me malaikat arawa, atep ajiten. “Allah Jip wora andaeomemteman. Era oupnak Allah afiak pak wora aemomemteman. Emesare, era ajisipetiitem jii, jii turunak aememtem. Oweam atakam akoretemas, ‘Era jii Allah Andep.’ Emes atakam aesimtemas. 36Wonom baporey! Me worsoot Elisabet emak fiak taot. Me, are jii jipit jak bomon asinta. Owe era taot peree taot atakam akoreaaris. Me, are pir poman ban taka jak aptam aemapa. 37Allah ere, era pakiin pakiin takes aoemomemkorommar. Are baem apok pak, ere apoknak.” Era malaikat emes atakam aesimen. 38Mariarawa, atakam akoromen. “Emesare! Dere Tuhan abambi karai baetam taot aemapey. Era atakam akoremarem pak, baemto.” Emes atakam aesimen. Erarawa malaikat Maria beken ajiosen.
Maria Sakaria anama Elisabet tame jaki ajite atakam
39Emesare. Asep barerawa, Maria awasiten. Are Yudea tapirmi fami kota taka ametejaremen. 40Era asan ere, are Sakaria tame ajiie, wanam selamat atakam Elisabet akoromen. 41Elisabet Maria selamat atakam jane ajie, ajak bomon jii ajamsendinikien. Allah Jipam Elisabet aemomemkoromen. 42Elisabet arawa, atakam daytinak Maria akoromen. “Allah asan akotnak wora aemman. Are wan tapes takes asan akot kope emes aemum. Are era ajisipetiitem jii, asan akotnak aemtem. 43Me deTuhan arsoot andaeomemman. Emesare jinim aemin. 44Wonom, ‘selamat,’ emes atakam aesimmanim ere, dejak bomon jii, jak akot aemansem. Erarawa are aojamsedinikimara. 45Me Tuhan atakam wora aesimtamen atakam, era atakam jipu taka aemtem. Wonom emes atakam eemnak ambesemkoromem. Erarawa wore jak akot aememmarem.” Elisabet emes atakam aesimen.
Maria, Tuhan tere aeome atakam
46Emesare, Maria atakam akoren:
“Tuhan, ere daytinak.
47Allah dera Bajortaer Ipit. Emesare dejak akotnak.
48Armat Ipit ere, akarai baetam taot kope, banamek ataiome.
Waa bare ajiire aemansar ere, asamot siin asiekaiaartas owe, dere asan akot taot, atakam akoreaartemas.
49Era fiaknak Allah, daytinak pak aemen.
Are Turunak.
50Armat Ipit, eemnak aambesemkorommas owe, soro ajiomem— asamot siin asiekaitas owe are.
51Armat Ipit, afiaknak pak aporomtame.
Are era amba aemetemtemmas owe, apatakumosome.
52Armat Ipit era basakamtam atakam fiak owe ajumdaeme.
Are era juas apok owe oup atemetetaapome.
53Armat Ipit, era jak batukuap apok owe, akot pak jak atukumapome.
Are era pak daytu owe, bambi ambirimemome.
54,55Abrahamam, era arurupisam, darfaisomar. Allah, soro era owe baemomaar, ataaji aee.
Armat Ipit era ataaji aee atakam bimak binip ajanimommar.
Emesare, Are Israel abambi karai baetam owe, pi ajateme.”
Maria emes atakam aesimen. 56Emesare, Maria, Elisabet tame pir bamintep takan aemapes, wanam atame aofasien.
Yohanes Owe Bwi Bakupimtaer Ipit ajisamse atakam
57Emesare. Elisabet jak bapeap bare aemansen. Are jipitkor ajisipetiien. 58Tuhan era taot seekot aoorporen. Atame setep oweam, ajoo oweam, emes atakam jane ajiesen. Are era taot jak akot takan aemapesen. 59Era jii ajisipetiierawa, ise poman ban bamintep aemansen. Wanam era owe era jii tamane pitini basakamosom Yahudi owe pak tai baem ajinaoesen. Are era jii juas Sakaria, aritipit ajuas baem, aemesen. 60Arsoot ere, atakam akoromen. “Emes bas! Ajuas Yohanes baemamesto.” Emes atakam aesimen. 61Era owerawa, “Wojoo owe ere, emes juas apoknak.” Emes atakam aesimesen. 62Era owerawa, ban era jii aritipit ajiraomesen. Ere era jii juas baem bajatepor aren. 63Armat ipit arawa, batu tulis atakam ajanime, wanam emes atakam aeapomen. “Ajuas Yohanes!” Emes atakam aesimen. Emesare, era owe takes jinim aeesen. 64Me Sakariaam akoman atakam ametepaken. Erarawa are Allah tere aeomen. 65Me atame setep owe takes ombare aememesen. Era Yudea tapirmi famipu aemapes owe takesam emes atakam taka aokoresen. 66Emes atakam jane ajies owe takesam, era atakam bimak binip daytu atetaramesen. Anom atakam akoresen. “Ara jii, wama jii ememto?” Emes atakam aesimesen. Are, Tuhan, asan akot era jii aeme apores aren.
Sakaria, Tuhan tere aeome atakam
67Emesare. Allah Jip era jii aritipit juas Sakaria aemomemkoromen. Me Sakariarawa, Allah atakam akoren:
68“Dere Israel owe aTuhan Allah tere aeommin.
Armat Ipit, aowe, takan aememim.
Are aowe ajortaereme.
69Armat Ipit, fiaknak Bajortaer Ipit ataendaemtamaro.
Era Ipit, akarai baetam ipit juas Daut Wurpis.
70Bonaknak ere, Armat Ipit emes atakam aatakam bakoretam owe akoromen.
Era owerawa, era atakam, wan owe aokoretamesen.
71Armat Ipit, dajii owe akumimosomtem, wanam dara ajortaertemaro.
Are, dare, dabifane afeomemmaroas owe afiak pak, asurumtamtemaro.
Are emes ataaji aeen.
72Armat Ipit, darfaisomar soro bajiomem, atakam akoromen.
Are era aee ataaji akot, bimak binip atoomem.
73Are ataaji darerokor juas Abraham fiaknak aeen.
74Era ataaji ere, Are, dare, dajii owe afiak pak asurumtamtemaro. Ere dare, ombare jak apok karai, armat ipit aetamtemarom.
75Emesamare, dare owe turunakam, owe akotam, aememtemarom, wanam abipu karai aetamaartemarom.
76DeTii! Owe, wore era oupnak Allah atakam bakoretam ipit baemem, atakam akoretemas.
Wonom, Tuhan abai asan bakenemapom, bonak ajartemarem.
77Wore, bimak binip, Tuhan aowe atetamtemarem.
‘Tuhan dara ajortaertemaro,’ emes bimak binip era owe atetamtemarem.
Era bajortaer pak, ere dadosa bimak binip bajanimemtam are.
78Allah asoro pak, ere daytinak. Emesare Armat Ipit era pak takes aemtem.
DaBajortaer Ipit ere, era jee tamen are. Are era oup dadamopu akondaetem
79Are sarenak, era jiiti bomon aemapmas owe, asaramapomtem. Era owe dambir ombare owe erare.
Are era ji baem jak baemem aporomtamtemaro.”
Sakaria emes atakam aesimen.
80Emesare. Era jii sira awotemen. Are jak fiak aememen. Are era owe apok asan aemapaarir— era Israel owe bipu ajiseme bare ajiire.
@LAI 1994
