Akisy. 14
14
Akikamaro ka aiuno a Lot
1Alorwa a ŋulu araakar Amurapel erwosit ŋolo a Sinar, #14:1 Sinar iŋes Babilon torae Arioc erwosit ŋolo a Elasar torae Kedorilaomer erwosit ŋolo a Elam ka torae Tidal erwosit ŋolo Agoim; 2apotu ŋirwosi ŋuluomwon ŋul kiiryakin ka ŋirwosi lu ŋikan: Bera erwosit ŋolo a Sodoma, Birisa erwosit ŋolo a Gomora, Sinab erwosit ŋolo ka Adama ka Semebar erwosit ŋolo a Seboim ta erwosit ŋolo a Bela (iŋes Soar). 3Tocunakis ŋirwosi ŋulukan ŋul ŋajorei kec nakadipaalat ŋina a Sidim (iŋes Anam ŋina Atwan.) 4Epukat sek Kedorilaomer ŋirwosi ŋul ŋikaru ŋitomon ka ŋiarei, ani edoli ekaru ŋolo a ŋiuni, toŋero ikes iŋes.
5Ani edoli ekaru ŋolo a ŋitomon ka ŋiomwon, tocunak Kedorilaomer ŋirwosi ŋulu ariito ka iŋes, kisiiryakis ka toreut ŋituŋa lu: Ŋirepaim alo Asiterosakaranain, Ŋisusim alo Am, Ŋiemim alo Sapekiriasaim 6ka Ŋiorit alomukura a ŋulu a Seir, todolo tari Eliparan neni idunyasi ka aloŋisat. 7Toboŋut a nen potu Enimisapat (iŋes Kades), kisiiryata ka toreut Ŋimalek anakwap kec a daadaŋ ka Ŋiamori ŋulu eboiyete alo Asason-Tamar. 8Tonyout ŋirwosi lu: Ŋolo a Sodoma, Gomora, Adama ka Seboim ta Bela (iŋes Soar). Kisiiryakis anakadipaalat a ŋina a Sidim 9Kedorilaomer erwosit ŋolo a Elam, Tidal erwosit ŋolo a Agoim ka Amurapel erwosit ŋolo a Sinar ta Arioc erwosit ŋolo a Elasar. Kiiryakin ŋirwosi ŋuluomwon ŋul ka ŋulukan. 10Eleleba ŋikuco ŋulu abokere ibore ŋini esibit eminae nakadipaalat ŋina a Sidim. Ani ebwaŋasi ŋajorei a ŋirwosi a lu: Ŋolo a Sodoma ka ŋolo a Gomora, kimasanakin ŋice kec lokuco ŋul, tosodo ŋuluce toema kidiama ŋimukura. 11Tolemasi ŋimoe kec ŋiboro daadaŋ ka akimuj daadaŋ alo Sodoma ka Gomora, ido torotokis. 12Torikosi ikes tari Lot lokoku alokaato ka Aburam ŋolo eboi alo Sodoma, torotokinioto kaapei ka ŋiboro keŋ.
13Bu etuŋanan epei ŋolo kebucun alojie a ŋol, tolimok Aburam ŋolo arae Eburaniyat ŋakiro a ejie. Alomit Aburam diyete ŋikuyono ŋulu a Mamure a ŋolo arae Emorait, torae daŋ lokaato a Esikol ka Aner; ariito ŋuluarei ŋul ka Aburam. 14Ani iirari Aburam atemar ariko ŋimoe lokoku alokaato keŋ, ya ŋikilyok ŋamiae ŋauni ka ŋitomon ka ŋikanikauni ŋulu etatamitae epite ŋolojiet, ŋulu arae ŋiyeneta keŋ; toloto kiwuapakis ŋimoe ŋul, todolo tari Dan. 15Ani ewari, totyak Aburam ŋajorei keŋ, aŋuna ka akisiryakin ŋimoe nakwaare. Toruko iŋes ka ŋiketiyak keŋ kisiiryakis ŋimoe kirita todolo tari Oba, Kuju Damasko. 16Kinyaku Aburam ŋiboro daadaŋ ŋulu aŋatarito ŋimoe, kinyaku tari Lot lokoku alokaato keŋ ka ŋiboro keŋ ka ŋaberu ta ŋituŋa ŋuluce daŋ.
Kiterereŋ Melekisedek Aburam
(Ŋibur. 7:1-2)
17Ani eboŋuni Aburam alojie a ŋolo elounia Kedorilaomer ka ŋirwosi ŋulu arukitotor iŋes alojie, tolot erwosit ŋolo a Sodoma akisiryam Aburam anakadipaalat a ŋina a Sape (iŋes akadipaalat ŋina a ŋirwosi). 18Yau Melekisedek ŋolo arae erwosit ŋolo a Salem ŋamugati ka epiini; arae daŋ Melekisedek esacaradoti ŋolo ka Akuj a ŋina alokidiama nooi.
19Ikiterereŋ Melekisedek Aburam tema,
“Ikiterereŋ iyoŋ Aburam Akuj ŋina alokidiama nooi,
ŋina asubi nakuj ka akwap;
20Erereŋ Akuj ŋina alokidiama nooi,
ŋina abu tobuko ŋimoe kon, ido ibu iyoŋ kilou ikes.”
Inak Aburam iŋes atutubet apei anatomon aloboro a daadaŋ a ŋulu enyakuni iŋes.
21Tolimok erwosit ŋolo a Sodoma Aburam tema, “Inakinae iyoŋ ayoŋ ŋituŋa kaŋ daadaŋ, ya ŋiboro toruwor ŋulu kon.” 22Nai tolimok Aburam erwosit ŋolo a Sodoma ŋol tema, “Adau ayoŋ akikoŋ neni ke Ekapolon ka Akuj a ŋina alokidiama nooi a ŋina asubi nakuj ka akwap, 23atemar nyayai ayoŋ tari eusi, kori arukan ŋina ka amukat, kori ibore daadaŋ ŋini erae ŋini kon, ikotere acepaki nyitema iyoŋ, ‘Etabar ayoŋ Aburam.’ 24Mam ibore ayai ayoŋ mati ŋini adaut ŋisorok lu akinyam ka ŋini elemarito ŋikilyok ŋulu ikirukorit ka ayoŋ lu: Aner, Esikol ka Mamure. Kimyek ŋikilyok ŋul yaa ŋiboro ŋulu adaut ikes atyakar.”
Ngakarimojong Interconfessional Bible © Bible Society of Uganda, 2008.
