Mark 5
5
Jesus Wiċaṡa Waƞ Wak̇aƞ Ṡic̄a Ojula Ċa Aṗiye
(Matthew 8.28-34; Luke 8.26-39)
1Jesus e na ihakab-unpi ki Galilee ble ak̇otaƞhaƞ Geresenes mak̇oċe el ipi na 2Jesus wata etaƞ glic̄u haƞ el owiċaḣe etaƞ wiċaṡa waƞ wak̇an ṡic̄a yuha ċa hinaṗe ċa he el hi. 3Owiċaḣe el uƞ iciƞ, tuweni maza uƞ kaṡka okihi ṡni. 4Si na nape maza uƞ ṗaḣtapi kʹeyaṡ yupsapsake. Na ekta ik̇oyagyapi ki hena akablaska igluṡka he ki tuweni ayuṡtaƞkiya okihi ṡni lila waṡʹake heuƞ. 5Aƞpetu alataya owiċaḣe el na paha iyaza ṡic̄ahowawa omani na iƞyaƞ ogli uƞ kiigluksaksa.
6Kaiyuzeyataƞhaƞ Jesus waƞyaƞke hehaƞl iyayiƞ na Jesus iṫokab ċaƞkpe mak̇agle inajiƞ 7na hoṫaƞka leye, “Jesus, Wak̇aƞṫaƞka iyotaƞ waƞkatuya ċiƞc̄a, tok̇amayauƞ kta hwo? Wak̇aƞṫaƞka caje ki uƞ kakiṡmakiye ṡni yo.” 8Ecanl Jesus hekiye, “ Wak̇aƞ ṡic̄a, wiċaṡa ki le etaƞ hinaṗa yo.”
9Jesus wak̇an ṡica ki iyunġe, “Taku enic̄iyapi hwo?
“Wiċota emaċiyapelo. Lila uƞkotapelo.” 10Na Jesus lila iċekiye, wak̇aƞ ṡic̄a ki lena mak̇oċe ki letaƞ ḣeyab iyaye wiċaṡi ciƞpi ṡni.
11Kukuṡe ota hel ik̇aƞyela wokilehaƞpi. 12Yuƞk̇aƞ wak̇aƞ ṡic̄a ki Jesus iċekiya, “Kukuṡe ki el yeuƞyaƞpo. Mahel iwiċauƞkiyayapi ktelo.” 13Ċaƞke iyowiƞwiċakiye. Wak̇aƞ ṡic̄a ki wiċaṡa ki etaƞ hinaṗapi na kukuṡe koktaoṗawiƞġe nupa ṫaƞmahel iwiċayayapi. Kukuṡe ki naṗapi na maya waƞkatuya etaƞhaƞ ble el ohiƞḣpayapi na mnitʹapi.
14Wiċaṡa eya kukuṡe awaƞwiċayaƞkapi ki naṗapi na oṫuƞwahe na woju wiċaṡa tipi eċel oyakapi. Ċaƞke oyate ki taku tok̇a ki ekta waƞyaƞg hipi. 15Oyate ki Jesus el hipi na wiċaṡa waƞ wak̇aƞ ṡic̄a ota ik̇oyaka tk̇a kʹuƞ hel yaƞka ċa waƞyaƞkapi. Taƞyaƞ hakiṫuƞ na tawaċiƞ ki taƞyaƞ iyaye. Wiċaṡa ki k̇okipapi, 16heċel tona waƞyaƞkapi ki hena uƞma oyate ki owiċakiyakapi. Wiċaṡa wak̇an ṡic̄a eya ik̇oyake, na kukuṡe ki tokeṡke el tok̇api ki he oyakapi.
17Waƞċak mak̇oċe ki hetaƞ Jesus ḣeyab iyaye ṡipi.
18Ċaƞke Jesus wata ki ekta mahel k̇iyotake. Hehaƞl wiċaṡa waƞ wak̇aƞ ṡic̄a yuha tk̇a kʹuƞ he Jesus okiyakiƞ na iƞṡ-eya ya ċiƞ keye.
19Eyaṡ Jesus wic̄ala ṡni. Eye hekiye, “Tiyata gni na tiwahe niṫawa ki owiċakiyaka yo. Iṫaċaƞ ki tokel eċaniċiuƞ na tokel niċiyuwaṡte ki owiċakiyaka yo.”
20Heċel wiċaṡa ki he kigle, na ṫaoyate ki owiċakiyake, tohaƞyaƞ wowauƞṡila Wak̇aƞṫaƞka kiyuha ki.
Jairus Ċuƞwiƞtku Ki E na Wiƞyaƞ Waƞ Jesus Ṫaogle Ki Epaṫaƞpi
(Matthew 9.18-26; Luke 8.40-56)
21Ake Jesus wata waƞ ogna iyotakiƞ na Galilee ble ki iyuweġe. 22Owaċekiye el iṫaċaƞ waƞ Jairus eċiyapi, ċa hi, na Jesus waƞyaƞke, na iṫokab iḣpeicʹiye 23na Jesus pipiya iwaċiƞye, “Miċuƞkṡi cikʹala ki lila wayazaƞ, na tʹa kiyela ċa eyapaṫaƞ ki akisni na ni kte,” eye.
24Na hehaƞl Jesus kiċi iyaye. Ċa oyate ota k̇o ihakab yapi. Jesus paok̇aƞ ṡniyaƞ aye.
25He wiƞyaƞ waƞ we hiyu woyazaƞ wan waniyetu wikc̄emna waƞji ak̄e nupa wahehaƞyaƞ yuha. 26Maza ska ota yuha ki iyuha wapiya wiċaṡa ki awiċayusote eyaṡ tuweni aṗiya okihi ṡni. 27Wiƞyaƞ ki le Jesus onaḣʹuƞ ċa wicota ahi ki ohan hi, 28na le iyukc̄aƞ, “Ṫaogle ki ewapaṫaƞ haƞtaƞs asnimayiƞ kte sec̄e.”
29Ċa iyayiƞ na ṫaogle ki epaṫaƞ, yuƞk̇aƞ we hiyu waƞ he waƞċagna akisni na ṫaƞmahel akisni ki he akibleze. 30Waƞċagna, Jesus ṫawowaṡʹake ki huƞḣ iyaye ki slolkiye. Jesus iwiċayuƞġe, “Tuwe ċa miṫaogle ki epaṫaƞ hwo?” eye.
31Ihakab-unpi ki ayuptapi, “Oyate ki nipakiyuoṫapi ċa takuwe heha hwo?”
32Eyaṡ Jesus nahanḣci tuwa heċuƞ ki ole. 33Wiƞyaƞ ki slolkiye ċa Jesus iṫokab ċaƞċaƞyela, ċaƞkpe ṗamagle inajiƞ na Jesus taku ki iyuha okiyake. 34Jesus leye, “Miċuƞkṡi, wowicala luha ki un ċa asniniye, ċa ċaƞte waṡteya gla yo, wana nitaƞyaƞ yelo.”
35Jesus heya ki walehaƞl Jairus ti etaƞhaƞ hipi, na heyapi, “Iṫaċaƞ ki hehaƞyaƞ naġiyeye ṡni yo, niċuƞwiƞtku ki tʹelo,” ekiyapi.
36Eyaṡ Jesus el ewiċatuƞwe ṡni, eyaṡ owiċakiyake, “Wak̇okiṗapi ṡni yo, e eye wic̄alapo,” ewiċakiye. 37Hetaƞhaƞ tuweni kiċi yekiye ṡni, e eye Peter e na James e na James suƞkaku waƞ John e, henakec̄a ob iyaye. 38Jairus ti el wana ipi, yuƞk̇aƞ Jesus wiċaċeya ċa naḣʹuƞ. Nakuƞ lila wiċahoṫaƞiƞ na iċiyumnahe sʹe ṡkaƞpi ċa waƞyaƞke. 39Jesus tima iyayiƞ na hewiċakiye, “Takuwe leċeḣc̄i yaṡkaƞpi hwo? Takuwe yaċeyapi hwo? Wak̇aƞyeja ki le tʹe ṡni tk̇a iṡtima ḣpaye,” ewiċakiye.
40Eyaṡ, Jesus aiḣatʹapi ċa iyuha ṫaƞkal iyayewiċaye, na huƞku na atkuku ki, na ṫawouƞspewiċakiye ki hena iwiċac̄u, na wak̇aƞyeja waƞ ḣpaye el tima iyayapi. 41Jesus wak̇aƞyeja ki nape el oyuspiƞ na hekiye, “Wiƞċiƞc̄ala! Kikta yo, eṗelo,” ekiye.
42Wiƞċiƞc̄ala ki kikta, na waƞċag mani. Wiƞċiƞc̄ala ki waniyetu ak̄enupa. Iyuha lila waeċuƞ ki le inihaƞpi. 43Eyaṡ Jesus taku eċuƞ ki le oyake ṡni wiċaṡi, na heye, “Takuƞl yutiƞ kta kʹupo,” ewiċakiye.
© American Bible Society