लुका 18
18
विण देरमी नियाव केरनार एने रांडायेल ने किस्सो
1उवतो यीशु तान चेलाह ज्य हिकाड़नेन केरता एक किस्सो केयो, काय जेलेम विन्ता केऱ्या किरो एने ईमोत मा आरो: 2“एक गावा माय नियाव केरनार रेतालो, तो नाह ते बोगवानाह बितालो एने माणहान बी फिकेर नाह केरतालो। 3ताच गावा माय एक रांडायेल बायकु बी रेताली, ती तालताल आवीन केताली, ‘मार पोर गुनो लागाड़नारा हिऱ्यो रेन माहु वोचाड़।’ 4तो जुलूम दिह वोर तीन वात नाह मान्यो, पुण सेवली वार मोना माय विचार केरीन केयो, मी बोगवानाह नाह बित एने माणहान फिकेर बी नाह किरेत, 5तीबी ज्यी रांडायेल बायकु माहु दोम्या किरेह, तानकेरता मी ज्यीन फेसलो केरूह, इहकेरीन नाय केरूह ते ज्यी रांडायेल बायकु तालताल आवीन सेवली बुखेत मार नाका माय दोम केर देय।”
6मालीक केयो, “हुमलो, ज्यो अन्यायी नियाव केरनार काय किथे? 7तानकेरता बोगवानान निवाड़ेल माणहे रात दिह मोदेक ने केरता रेड्या केरतेह, बोगवान तान नियाव केरने वार लागाड़ी काय? 8मी तुमूह केथु, तो चालोच तान नियाव केरी। तीबी माणहान बिटोख जुलबुखे आवी, ते देरती पोर बुरहो केरनाराह देखी काय?”
फरिसी एने फालो उकालनारान किस्सो
9यीशु ताह जा आपणे उपेर बुरहो मेलताला काय आमु देरमी हेते, एने दिहराह नेचा सोमेजताला, ताह ज्यो किस्सो केयो: 10दुय एदमी मोंदिर माय विन्ता केरनेन केरता गीया; ता माय एक फरिसी एने दिहरो फालो उकालनार ईतो।
11 # 18:11 एखालोच सिटो उबरीन विन्ता किऱ्यो; थोड़ाक लेख माय उबरीनो एने सोताह विन्ता किऱ्यो। फरिसी उबरीन तान मोनाम इहकेरीन विन्ता केरने बाज गीयो, “एय बोगवान, मी तारो दन्यवाद केरथु काहाकाय मी दिहरा माणहान गेत लालची, ठेगारो, एने सिनाल्यो नाह सुतो, एने ज्या फालो उकालनारान गेत बी पापी नाह सुतो। 12मी एप्ता माय दुय वार उपास केरथु मी मारी आखी कामाईन दाहवो ईसो बी आपथु।”
13पुण फालो उकालनार सिटोच उबरीन हेरगान उगे बी नाह दिख्यो, पुण तो तान साती ठोक ठोकीन इहकेरीन केयो, एय बोगवान, मी पापी हे, मार पोर गीण केर! 14#मत्ती 23:12; लुका 14:11यीशु केयो, “मी तुमूह केथु काय फरिसी देरमी नाह ठेरानो, पुण फालो उकालनार बोगवानान ओंगाण देरमी ठेरानो एने तान गेर जात रिनो; काहाकाय जो आपणे आपाह मोठो मानी, तो आत्यो केराय जाय; एने जो आपणे आपाह आत्यो मानी तो मोठो केराय जाय।”
यीशु सोराह बोरकेत आपणे
(मत्ती 19:13-15; मरकुस 10:13-16)
15थोड़ाक माणहे तान सोराह यीशु फाय लावणे बाज गीया काय तो सोरा पोर आथ मेली; पुण चेला देखीन ताह दोपकाड्या। 16यीशु सोराह आहने हादिन केयो, “सोराह मार फाय आवणे दिवो एने ताह मा रूको, काहाकाय बोगवानान राज सोरान हारकोस हे। 17मी तुमूह खेरीच केथु काय जो बोगवानान राजाह सोरान गेत नाय माने तो ता राज माय केदी माय नाय रिगी।”
मालदार माणुह एने जेलेमकी जीवाय
(मत्ती 19:16-30; मरकुस 10:17-31)
18एक यहुदि आदिकारी यीशुह फुशो, “एय हाजा गुरू, जेलेमक्यो जीवाय ने आदिकारी बोणनेन केरता मी काय केरू?”
19यीशु ताह केयो, “तु माहु हाजो काहा किथे? बोगवानाह सोड़ीन दिहरो कुणीच हाजो नाह। 20तु कायदाह ते जाणेह: ‘सिनालो मा किरहे, खुन मा किरहे, एने चोरी मा किरहे, कुणीन बी जुठो पुरावो मा दिहे, तारा आबाख एने तारी आईख ने मान मिलजे।’”
21यहुदि आदिकारी यीशुह केयो, “मी ते ज्या उकुमाह आत्योच रेन मानते आयेल हे।”
22ज्य होमलीन यीशु आदिकारीह केयो, “तुवाह एक वात एवी केरनु हे, तारो आखो काय वेचीन गेरब्याह वाट दे; एने तुवाह हेरगा माय मालदेन जुड़ी, एने आवीन मार पासाण चाल।” 23आदिकारी ज्य होमलीन जुलूम नाराज एय गीयो, काहाकाय तो मोटलो मालदार ईतो।
24यीशु ताह देखीन केयो, “मालदाराह बोगवानान राज माय जाणेन जुलूम केठीण हे! 25उटड़ाह हुईन डोसाम रेन जाणे केठीण हे, तिहेस केरीन मालदाराह बोगवानान राज माय जाणे केठीण हे।”
26होमेलनारे फुशा, ते ओवतो कुणान सुटकारो एय?
27यीशु जापाप आप्यो, “ज्य माणहान केरता केठीण हे, तो बोगवानान केरता केठीण नाह सोतो।”
28तेवी पतरस केयो, “देख, आमु ते आखो काय सोड़ीन तार पासाण आव लागेल हेते।”
29मी तुमूह खेरीच केथु, बोगवानान राज ने केरता आपणो गेर, नाहते बायकुह, नाहते बाहख, नाहते आईख आबाख, नाहते आपणा सोराह सोड़ देना एती; 30ताह ज्यी टेम माय वोदार नाय जुड़ी, पुण आवणारा कालाम जेलेमक्यी जीवाय जुड़ी।
तान मोतीन बाराम यीशुन तिसरी जाणाव
(मत्ती 20:17-19; मरकुस 10:32-34)
31ओवतो यीशु बारा चेलाह आंगे ली जाईन केयो, “हुमलो, आपु यरूशलेम माय जातेह, एने जोल्युक वातु माणहान सोरान केरता जाणकारान उगे रेन लेखाय जायेल हे, ती आखी पुरी एय। 32माणहान सोराह बिगेर यहुदिन आथाम होप देती, एने ता तान मोजाक उड़ावती; एने तान ईजुत लेती, एने ता पोर थुपती, 33उंजु ताह चापका केरीन देती, एने मार टाकती; पुण तो तीसरे दिह जीवतो एय जाय।”
34पुण चेला ज्यी वातीह नाह सोमेजना; एने जी वात ताह रेन लिकीन रेनी, एने ज्यी वात यीशु कियेल ती तान सोमेज माय नाह आवी।
यीशु आंदला बिखारीह देखतो केरने
(मत्ती 20:29-34; मरकुस 10:46-52)
35जेवी यीशु यरीहोन आहने पोचनो, ते एक आंदलो सेड़कीन दिड़े बोहीन बिख मांगतालो। 36एने माणहान चालनेन गेगदो होमलीन तो फुशो, “ज्य काय एणे बाजरिनोह?”
37माणहे आंदलाह केया, “यीशु नासरी जाणे बाजरिनोह।”
38तेवी आंदलो आयड़ीन केयो, “एय यीशु दाऊदान सोरा, मार पोर गीण केर!”
39जा ओंगाण जाताला, ता आंदलाह दोपकावताला काय ठावको रे; पुण तो उंजु जोरेस आयेड़ने बाज गीयो, “एय दाऊदान सोरा, मार पोर गीण केर!”
40तेवी यीशु उबरीन उकुम आप्यो आंदलाह मार फाय लावो, एने जेवी तो आहने आवो ते यीशु आंदलाह फुशो, 41“तु काय हुदेह काय मी तार केरता केरू?”
“एय मालीक, ज्य काय मी पोशो देखणे बाज जाव।”
42यीशु ताह केयो, “देखणे बाज्जा; तारो बुरहो तुवाह हुदार दियेल हे।”
43तेवी तो चालोच देखणे बाज गीयो एने बोगवानान बोड़ाय किरते लेन यीशुन पासाण चाल पोड़नो; एने आखा माणहे देखीन बोगवानान बोड़ाय केऱ्या।
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
