Mɔl 2
2
1Ɛnee kɛ Nyamenle zile bɔle anwuma nee aze, nee ninyɛne mɔɔ wɔ nu la amuala la ɛne. 2#Hib 4.4 Kenle nsuu ne azo, Nyamenle wiele ye gyima ne yɛ bɔkɔɔ na ɔliele ye ɛnwomenle wɔ kenle nsuu ne azo, na ɔyele ɔ sa ɔvile gyima mɔɔ yeyɛ la amuala anwo. 3#Ade 20.11 Yemɔti Nyamenle yilale kenle ne mɔɔ tɔ zolɛ nsuu ne la azo, na ɔyɛle ye kenle nwuanzanwuanza, ɔboalekɛ kenle zɔhane a ɔvale ɔliele ye ɛnwomenle, ɔyele ɔ sa wɔ gyima mɔɔ ɔbɔ ewiade la ɔyɛle la anwo a. 4Ɛnee kɛ Nyamenle zile bɔle anwuma nee aze la ɛne.
Yidɛn tola ne
Mekɛ mɔɔ Ɛdɛnkɛma Nyamenle bɔle anwuma nee azɛlɛ ye la, 5ɛnee baka biala ɛngyi azɛlɛ ye azo, yɛɛ ndile biala ɛtɛfifile, ɔluakɛ ɛnee Ɛdɛnkɛma Nyamenle ɛtɛmanle ezule ɛtɛtɔle azɛlɛ ye azo, yɛɛ ɛnee sonla ɛnle zolɛ na yeazo zolɛ ɛya. 6Noko ɛnee nzule vi azɛlɛ bo finde bu azɛlɛ ne azo amuala tɛloo.
7 #
1 Kɔl 15.45
Na Ɛdɛnkɛma Nyamenle vale ndɛtɛlɛ nwonle sonla na ɔliele ngoane ɛnwomenle ɔguale ɔ bonyi nu, na sonla nyianle ngoane.
8Akee Ɛdɛnkɛma Nyamenle hyele tola wɔ Yidɛn, wɔ aduduleɛ nehane, na ɔmanle sonla ne mɔɔ yebɔ la dɛnlanle ɛkɛ. 9#Yek 2.7; 22.2,14 Na Ɛdɛnkɛma Nyamenle manle mbaka kɔsɔɔti mɔɔ le ngɛnlɛma nee mɔɔ bɛdi a ɔyɛ boɛ la fifile; ɔmanle ngoane baka ne yɛɛ baka ne mɔɔ maa ɛkola ɛnwu kpalɛ nee ɛtane la ɔdaye bɛfifile tola ne anu.
10Azule la Yidɛn na ɔse ɔdoɔloa tola ne anu. Azule ne dwu tola ne anu a, ɔkpakye nna. 11Bɛfɛlɛ azule ne asa ɛhane ne mɔɔ lumua la Paehyɔn; ɔse ɔdua Havelaa azɛlɛ ne mɔɔ ezukoa nvutuke wɔ zolɛ la azo. 12Ɛkɛ ne azɛlɛ ne azo ezukoa nvutuke ne le tagyee. Baka evuanlɛ bie mɔɔ bɛfɛlɛ ye “Bedɛleɔn” nee bolɛ bie mɔɔ sonle bolɛ, mɔɔ bɛfɛlɛ ye “Ɔnekese” la wɔ ɛkɛ ne azɛlɛ ne azo. 13Azule ne asa ɛhane ne mɔɔ tɔ zolɛ nwiɔ la, bɛfɛlɛ ye Gaehyɔn; ɔse ɔdua Kɛhye (Sudan) azɛlɛ ne azo. 14Mɔɔ tɔ zolɛ nsa la, bɛfɛlɛ ye Taegelese; ɔse ɔdua Aselea maanle ne aduduleɛ, yɛɛ mɔɔ tɔ zolɛ nna la, bɛfɛlɛ ye Yufileti.
15Ɛdɛnkɛma Nyamenle manle sonla hɔdɛnlanle Yidɛn tola ne anu kɛ ɔyɛ nu egyinli na ɔziezie ɛkɛ. 16Ɔzele ye kɛ, “Ɛkola ɛdi bakama biala mɔɔ wɔ tola ye anu la bie, 17na kpalɛ nee ɛtane ɛnwunlɛ baka ne, yemɔ mmadi ye ma ne bie, ɔluakɛ kenle ko ne mɔɔ ɛkɛli bie la, ɛbawu.”
18Akee Ɛdɛnkɛma Nyamenle zele kɛ, “Ɔnle kpalɛ kɛ menwɔmaa sonla angomekye kɛdɛnla; mebabɔ ye ɛsaso boavolɛ meamaa ye.” 19Yemɔti Ɛdɛnkɛma Nyamenle vale ndɛtɛlɛ yɛle ɛbɔ nu nane kɔsɔɔti nee nloma mɔɔ tu dua anwomanyunlu la amuala bie. Ɔvale bɛ ɔrɛlɛle sonla kɛ ɔtoto bɛ aluma, na duma biala mɔɔ sonla vale donle abɔdeɛ ko biala la, yemɔ a bɛvale bɛvɛlɛle ye a. 20Sonla totonle nyɛmoa ne mɔ aluma ngoko ngoko, ɔtotonle nloma mɔɔ tu dua anwomanyunlu la aluma yɛɛ ɔtotonle nanemgbole mɔɔ wɔ ɛbɔ nu la aluma. Na ɔdaye sonla ɛdeɛ, yeannyia ye ɛsaso boavolɛ biala.
21Yemɔti Ɛdɛnkɛma Nyamenle manle sonla lafele kpole bie na ɔyele ɔ nvenle foa bowule ko na ɔvale nwonane ɔduale ɔ bo zo ne. 22Ɛdɛnkɛma Nyamenle vale bowule ne mɔɔ ɔyele la ɔyɛle sonla raalɛ na ɔvale ye ɔrɛlɛle nrenya ne. 23Na nrenya ne zele kɛ,
Ɛhye le me mbowule nu bowule,
ɔle me nwonane nu nwonane;
bɛbavɛlɛ ye “Raalɛ”,
ɔboalekɛ ɔvi sonla nrenya nu a ɔrale a.
24 #
Mat 19.5; Mak 10.7; Ɛfɛ 5.31 Yemɔti a nrenya fi ɔ ze nee ɔ nli anwo na ɔfa ɔ nwo ɔbɔ ɔ ye anwo kyengye, na bɛ mu nwiɔ bɛbɔ nu bɛyɛ nwonane ko a.
25Ɛnee nrenya ne nee ɔ ye ne lɛ bɛ nwo zɔ, noko bɛnze nwolɛ nyiane.
Bible in Nzema © Bible Society of Ghana, 1998.
