Lk. 8
8
Bakhasi ba basaanga mu milimo kia Yesu
1Enyuma we siise sitiiti Yesu abira mu ngoba ne mu birekere ne elwacha Elomo Endayi eye Bubwami bwa Wele, ne aba ne barumwa bewe ekhumi na babili, 2#Mat. 27.55-56; Mk. 15.40-41; Lk. 23.49 akhaba bakhasi balala babaonisibwa bulwaale ne khurusibwamo bisieeno baba naye. Nga Maria (owalaangwa Makatalena) niye bisieeno saba biaruramo; 3Yoanina mukha Kusa omukholi owo mukhoongo Herodi, ne Susana ne bakali babaandi barumikhiranga kimiaandu kiabwe khuyeeta Yesu ne babeeka bewe.
Lukano lwo omumiichi
(Mat. 13.1-9; Mk. 4.1-9)
4Babaandu bachiililila khukhwicha khu Yesu khukhwama mu ngoba chingali. Nga bakucha Yesu abakanila lukano luno ali, 5“Omumiichi mulala acha khumiicha bumiicho bwewe, ne nga aba ne alikho amiicha, bulala bwakwa khu ngila bwaswalwakililwa, mala chinyuni chabuboocha. 6Bulala bwakwa khu lwanda, nga bwamela, oli bulikho buchoa mala bwoma sikila bwataamba kameechi. 7Bulala bwakwa mu mawa, oli bwachoa kamawa kabuuna bwoma. 8Bubuundi bwakwa mu maloba kamalayi, bwachoa, mala buli lulala lwaama emia.” Nga aba naboola lino amaliilisia ali, “Oyo oli ne kamaru ke khuulila lekha aulile!”
Sifuno sie lukano luno
(Mat. 13.10-17; Mk. 4.10-12)
9Babeeka bewe bamureeba sifuno sie lukano luno, 10#Isa. 6.9-10 akobosia ali, “Khwinywe mwaelesibwa khumanya kakekisa ke Bubwami bwa Wele ne khu baandi kali mu ngano, nio bakhalola se balabona tawe, bakharekeeresia se bakhaulile tawe.
Yesu enoosia lukano lwo mumiichi
(Mat. 13.18-23; Mk. 4.13-20)
11“Sifuno sie lukano luno nisiesi. Bumiicho buli elomo eya Wele. 12Bumiicho bubwakwa khu ngila buli nga abo baulilanga elomo ne Sietani echa mala akibukula erura mu miooyo kiabwe nio bakhasuubila mala baonisibwe tawe. 13Ne bumiicho bubwakwa khu lwanda buli nga abo ba bakaanila burume bwa Wele mu busangaafu mala se bali ne lisuubila likali tawe, basuubila khu siise sitiiti oli siise sie kamakhako siola ne bakwa. 14Ne bumiicho bubwakwa mu mawa buli nga abo baulilanga burume bwa Wele ne kakhali bibiindu bikali bie mu limenya nga, liliembeelela, buiinda, ne limenya lie khukhwesangaasia babeene libakhola se baliinda lisuubila liabwe tawe. 15Ne kakhali bumiicho bubwakwa mwiloba lilayi buli nga abo baulilanga burume, babutiila lukali mu miooyo kimilayi kie buriaani, mala bekhaliilikha khukhwola nga baama kamatuunda.
Etaa niyo bafumalikhile mu sikono
(Mk. 4.21-25)
16 #
Mat. 5.15; Lk. 11.33 “Se aliio omundu oambianga etaa mala akifumalikhila mu sikono namwe akira aasi we sitanda tawe, ne kakhali akira khu siteetwe nio abo babengila mukari babone buwaanga.
17 #
Mat. 10.26; Lk. 12.2 “Sikila se siliio sisiindu sisiakukhuulilwa sikhalireerwa abuwaanga tawe; namwe sisiindu si siekisa sikhalimanyikha ne khureerwa abuwaanga tawe.
18 #
Mat. 25.29; Lk. 19.26 “Nono ba meso mu ngila niyo murekeereseliamo, sikila khuyo oli nabio balimutasa bibiindi, ne kakhali oyo okhali nabio tawe, akhaba sitiiti nisio ebaasia ali, ali nasio, alinuulwa.”
Maawe ne bawandaaye ba Yesu
(Mat. 12.46-50; Mk. 3.31-35)
19Nio maawe ne bawandaaye ba Yesu beecha niio aba ne se banyala khumwolela tawe, sikila bukali bwe babaandu. 20Ne Yesu aboolelwa ali, “Maao ne bawandaayo bemile enje benya khukhubona ewe.”
21Yesu aabakobosia ali, “Maayi ne bawandaayase bali abo baulila elomo eya Wele ne khukitiila.”
Yesu ayenjeesia embembeesi
(Mat. 8.23-27; Mk. 4.35-41)
22Endaalo ndala Yesu acha khu liaaro ne babeeka bewe mala ababoolela ali, “Khwambukhe enyanja.” Nio barakikha lukeendo. 23Nga baba ne balikho bambukha liilo liaamba Yesu. Ekhuungu eye kamaani yaucha khu nyanja ne liliaaro liarakikha khukhwichula kameechi nio boosi baba mu butinyu. 24Babeeka bacha mala bamusiisimusia ne baloma bali, “Omwami, Omwami! Khwabuna!”
Yesu asisimukha mala ayibila ekhuungu ne bibuli bie kameechi biboofu mala biasila, enyanja yayenjeela lukali. 25Yesu abareeba ali, “Lisuubila lienywe lili waena?”
Bauka lundi baria, mala bareebana bali, “Omundu yuno naanu niye? Ayibila akhaba ekhuungu ne bibuli bie kameechi, mala bimuria!”
Yesu aonia omundu we bisieeno
(Mat. 8.28-34; Mk. 5.1-20)
26Yesu ne babeeka bewe boola mu sibala sie Bakerasi, sisialoleelelana ne sia Kalilaya. 27Nga Yesu arura mu liaaro, omundu ama mu lukoba owaba ne bisieeno amwakaanana khulwe siise sileeyi omundu chana oyo se efwaranga chingubo tawe. Lundi se amenyanga mungo tawe, amenyanga mu biliindwa. 28Nga abona Yesu ayokela lukali, akwa ebweeni wewe mala alomaloma mu mumilo kwe angaaki ali, “Ndi na siina ne nawe, Yesu, Mwana owa Wele owe Angaaki Lukali, unjenyakho siina? Khwikoonjelela okhambukuuma tawe!” 29Omundu oyo aloma ario sikila Yesu aba ayibiile sisieeno simulimo simururemo. (Sikila sisieeno esio siamulaasiaanga, akhaba babaandu ba bamuliindanga bamuboanga kiminyololo, ne bikoche, mala abikitulanga bioosi, ne sisieeno siamuyilanga mu siangalaamwe.)
30Nio Yesu amureeba ali, “Lisina liowo bali naanu?” Amukobosia ali, “Lechoni,” sikila bisieeno bikali biaba biamwingilamo. 31Mala biamwikoonjelela akhabiyiibila biacha mwiloo likhali ne sisiakamo tawe.
32Abwenao liabao lituuli liboofu lie chingurwe chaaya mu maayo mwe sikulu, mala bisieeno biamwikoonjelela abilekhuule bingile mu ngurwe. Mala abielesia kumunwa. 33Nio bisieeno chana biarura mu mundu biengila mu ngurwe ne lituuli lioosi liasalamata liekha eluongwa mala liakwa mu nyanja liafwilamo. 34Nga babaayi babona kakaba ne kekholekhe, belukha bacha mu lukoba ne mu birekere ne baboolela babaandu. 35Mala babaandu barura bacha khulola liliaba ne likholekhe, ne boola khu Yesu mala banyoola omundu niye bisieeno biaba ne biruriremo ekhaale mu bikele bia Yesu, efwarire chingubo mala kamebaasio kewe kakoboole abweene, mala boosi barangararwa ne khuria. 36Ne abo bababona liliaba ne likholekhe baboolela babaandu nga omundu oyo ne aonisiibwe. 37Nio babaandu boosi be mu sibala sie Bakerasi baambwa buuri bukali po, mala basaaya Yesu arekukhe arure mu sibala siabwe. Khwako Yesu aniina mu liaaro arekukha. 38Omundu chana niye bisieeno biaba ne bimururiremo ekoonjelela Yesu amue kumunwa ache naye; ne kakhali Yesu amukaania naloma ali, 39“Kobola engo oboolele babaandu niko Wele akhukholeele.” Nio arekukha acha aboola mu lukoba mwosi niko Yesu amukholeele.
Omukhaana owa Yairo no mukhasi owatiila khu ngubo eya Yesu
(Mat. 9.18-26; Mk. 5.21-43)
40Nga Yesu ne akobola sikelekha sisiindi sie nyanja, babaandu bakali bamwakaanila, sikila boosi baba bamulindiilile. 41Ne omundu olaangwa Yairo owaba omuliindi owe sinakooki, akwa mu bikele bia Yesu, amwikoonjelela ache mungo mwewe. 42Sikila aba no mukhaana omuteelwa owaba ne bukhulu bwe kimiiko embi ekhumi na kibili mala aba alikho afwa.
Nga Yesu ne aba ne alikho acha, babaandu bamukhumakho buli lubeka. 43Mu baandu abo abamo omukhasi owaba ne kibeeni khulwe kimiiko ekhumi na kibili, omusilikhi se abao owanyala khumuonia tawe. Arumikhira bioosi nibio aba nabio khu basilikhi ne se banyala khumuonia tawe, 44echela enyuma wa Yesu mala aatiila khu ngubo yewe, ne ekibeeni yiima. 45Nio Yesu areeba ali, “Naanu oundiililekho?” Buli mundu ekaana, mala Petero amuboolela ali, “Omwami, babaandu bakali bakhukhumilekho!”
46Yesu aloma ali, “Aliio omundu oundililekho, sikila neulile kamaani kanduriremo.” 47Nga omukhasi chana abona ali sanyala khwikisa tawe, echa ne alikho aaterema mala aakwa ebweeni wa Yesu aboola mu moni che babaandu boosi sikilile ne amutilakho lundi nga aonile abwene ne abwene. 48Nio Yesu amuboolela ali, “Mwana wase, lisuubila liowo liakhuoniisie. Cha ne kumuleembe.” 49Nga Yesu aaba nasilomaloma kano, omundu omurumwa khukhwama wo muliindi owe sinakooki chana ola naboolela Yairo ali, “Omukhaana wowo afwiile, okhachiililila khunaania Omwekisia tawe.”
50Yesu nga aulila kano aboolela Yairo ali, “Okharia tawe suubila mala alaona.”
51Nga ola munju eya Yairo se afukiilila omundu yesi yesi khukhwingila ne naye munju tawe, nakhali Petero, Yoana, ne Yakobo, ne raraawe ne maawe wo mwana chana. 52Mala yaba babaandu boosi balikho bamulila ne khukhwesasaara, Yesu ababoolela ali, “Mukhalila tawe, sikila se afwiile tawe ne kakhali alikho akona.”
53Boosi bamuchekha sikila baba bamanyile bali omukhaana aba afwiile. 54Nio Yesu amutiila kumukhono amulaanga ali, “Mwana wase sisimukha!” 55Omwana chana alamukha abwene na bwene, mala Yesu aboola bamuelesie siakhulia alie. 56Nio basaasi bewe bauka, ne kakhali Yesu arusia lilaka ali bakhaboolelakho omundu yesi yesi kakekholeekhe kano tawe.
©Bible Society of Kenya, 2019
