Lk. 6
6
Lireeba khuloondekhana ne Sabato
(Mat. 12.1-8; Mk. 2.23-28)
1 #
Likh. 23.25
Nga Yesu aba ne alikho akeenda mumikuunda kie ngano khu ndaalo eye Sabato, babeeka bewe basasula engaanu bakifuungila mu makhono ne balia. 2Balala khu Bafarisayo bareeba bali, “Sikila siina ne mukhola khu ndaalo eya Sabato nisio Lilaka liefwe likhafukiilila tawe?” 3#1 Sam. 21.1-6 Yesu abakobosia ali, “Se mwasomakho niko Daudi akhola nga niye nende nibo aba nabo ne baba ne njala tawe ku? 4#Bal. 24.9 Engila munju eya Wele abukula kimikaati kikiaba kiaanilwe khu Wele alia mala aelesia babaandu bewe bosi balia. Lilaka se lifukiilila omundu yesi yesi okhali Omusaayi khulia biaanilwe khu Wele tawe.” 5Nio Yesu ababoolela ali, “Omwana wo Mundu ali Omwami owe Sabato.”
Omundu owafwokoya kumukhono
(Mat. 12.9-14; Mk. 3.1-6)
6Khu Sabato ekiindi, Yesu engila mu sinakooki ekisia. Omundu owafwokoya kumukhono kumuseecha abamo. 7Baandiki ne Bafarisayo bamureka babone nanyala aonia khu ndaalo eye Sabato, nio banyoole sifuno sie khumusitaka. 8Ne kakhali Yesu amanya kamebaasio kabwe mala aboolela omundu owafwokoya kumukhono chana ali, “Yinyokha wiche wime ano.” Omundu chana enyokha emao. 9Nio Yesu abareeba ali, “Lilaka likhufukiilila khukhola kamalayi mu Sabato namwe khukhwonaka, khuonia bulamu, namwe khuburusiao?” 10Abaloleelela boosi mala aboolela omundu chana ali, “Kololosia kumukhono kwowo.” Akhola ario mala kumukhono kwewe kwaona. 11Baambwa lirima mala bareebana nisio banyala bakhola khu Yesu.
Yesu arobora barumwa ekhumi na babili
(Mat. 10.1-4; Mk. 3.13-19)
12Siise esio Yesu aniina khu sikulu khucha khusaba mala achiililila khusaba Wele siilo sioosi. 13Nga ne bwasia, alaanga babeeka bewe mala aroboramo ekhumi na babili abalaanga ali barumwa. 14Baba Simoni, (niye atiuukha ali Petero), ne Andereya wandaaye, Yakobo ne Yoana, Filipo ne Baturimayo, 15Matayo ne Tomasi, Yakobo okhwa Alufayo, ne Simoni, (owalaangwa Siloti), 16Yuda okhwa Yakobo, ne Yuda Isikarioti owecha aba omuchaami.
Yesu ekisia ne khuonia
(Mat. 4.23-25)
17Nga Yesu ekha ne barumwa khukhwama khu sikulu, eema asiangalaamwe ne babeeka bewe bakali. Babaandu bakali khukhwama mu Buyuda mwoosi, Yerusalemu ne mu ngoba che khu nyanja cha Tiro ne Sidoni babao. 18Baaba bechile khumuulila ne khuonisibwa bulwaale bwabwe. Abo babananisibwanga ne bisieeno bosi becha mala baonisibwa. 19Babaandu boosi bakhaka khumwiambakho, sikila bunyali bwamwamangakho ne khuonia boosi.
Busangaafu ne bubeeleli
(Mat. 5.1-12)
20Yesu asuta chimoni alola babeeka bewe mala aloma ali,
“Muli ne chikhabi muuli bataambi; sikila Bubwami bwa Wele buli bubwenywe.
21“Muli ne chikhabi muuli ne njala luno,
sikila mulikura!
“Muli ne chikhabi mulila luno, sikila mulichekha!
22 #
1 Pet. 4.14
“Muli ne chikhabi babaandu ne bamubiila, ne bamukhoma ne khumuloma enywe bali muli babi sikila Omwana wo Mundu!
23 #
2 Ke Ch. 36.16; Bikh. 7.52 Yekhoya ako ne kekholekha, mala mwitikite, sikila mwabikhilwa kumuruuru kwenywe kuli kumuboofu lukali mwikulu. Sikila ako niko bakuuka babwe bakholela bang'oosi.
24“Sili silaamo khwinywe muuli baiinda luno;
sikila mwamenya limenya lie bukoote!
25Sili silaamo khwinywe mu mwikuure luno,
sikila mulaba ne njala!
Sili silaamo khwinywe muchekha luno,
sikila mulasooma ne khulila!
26“Sili silaamo khwinywe babaandu boosi ne balomaloma kamalayi khwinywe; sikila kali ako ne kamene niko bakuuka benywe baboolela bario bang'oosi be bubeeyi.
Busiime khu basiku
(Mat. 5.38-48; 7.12)
27“Ne kakhali ese muboolela enywe mu mumbulilanga ndi: Siima basiku benywe, kholela kamalayi abo ba bamubiila, 28biita chikhabi abo bamulaama, sabila abo bamupia sibi, 29khuyo okhuupa luui muelesie lusaya luluundi lwosi akhuupe; ne oyo okhubukula likooti okhamukhiingilila khu khubukula akhaba lisiati liowo tawe. 30Buli mundu okhusaba muelesie, ne omundu obukula bibiowo okhamureeba tawe. 31#Mat. 7.12 Nono siosi siosi nisio mwenya babaandu bamukholele, mwesi bakholele murio.
32“Ne mwaba ne musiima ba bamusiima bong'ene aba mulanyoola muruuru siina? Sikila akhaba babooni basiima abo ba babasiima. 33Ne mwaba ne mukholela kamalayi abo bamukholelanga kamalayi bong'ene, aba mulanyoola muruuru siina? Sikila akhaba babooni bakholanga bario!
34“Ne mwaba ne mwekopia bakhamukoboselie bong'ene, aba mulanyoola siina? Akhaba babooni bakholanga bario! 35Khwako siima basiku benywe ne khubakholela kamalayi, yekopia ne mukheyikina khuruungwa tawe. Ne mukhola murio kumuruuru kwenywe kuliba kumuboofu mala muliba babaana ba Wele owe Angaaki Lukali; sikila ali omulayi khu baandu bakhapanga orio khu sikholwa siosi siosi silayi tawe ne babemani bosi. 36Ba be siisa, nga Raraawenywe owe mwikulu.
Khukhalakila babaandi
(Mat. 7.1-5)
37“Mukhakhalakila babaandi tawe, ne Wele se alamukhalakila enywe tawe, mukhabiiya babaandi tawe, ne Wele naye se alamubiiya enywe tawe; beela babaandi ne mwesi mulabeelwa. 38Elesia babaandi, ne Wele naye alamuelesia enywe. Ng'ali mulanyoola sikono sisichuule, nisio basiinyile ne khusisikha nabwila bichichukha aasi. Sikila sikono nisio muanilamo sisiene ne sisiene nisio mulinyoolelamo khukhwama khu Wele.”
39 #
Mat. 15.14
Yesu ababoolela lundi lukano luno, “Omubofu anyala arangirira omubofu okundi ku? Bombi se banyala bakwa mwiloo?” 40#Mat. 10.24-25; Yn. 13.16; 15.20 Oweyika se akhila omwekisia wewe tawe, ne buli omweyika ne ekisiibwe mubwichufu alaba nga omwekisia wewe. 41Siina sikila nobona kha khandu khakeekhe khaali mu moni eya wandaayo ne se onyala wabona sisosono siili mu moni mwowo tawe? 42Namwe onyala oriena khuboolela wandaayo oli, “Wandaayase, khola ese khurusie kha khandu khaali mu moni mwowo, ne ewe sobona sisosono siili mu moni mwowo wamwene tawe? Mubacha ewe, nyoa orusie sisosono siili mu moni mwowo ne nono olabona bulayi, nio orusie kha khandu khaali mu moni eya wandaayo.
Kumurongooro ne kamatuunda kaakwo
(Mat. 7.16-20; 12.33-35)
43“Kumurongooro kumulayi se kwaama kamatuunda kamabi tawe, namwe lundi kumurongooro kumubi se kwaama kamatuunda kamalayi tawe. 44#Mat. 12.33 Buli murongooro kumanyikhana khulwe kamatuunda kakwo. Sikila sonyala wabuta chinduli khukhwama khu binyenya tawe, namwe se babutaanga chisabibu khukhwama khu marakaru tawe. 45#Mat. 12.34 Omundu omulayi aananga kamalayi khukhwama mwibiikhilo lie kamalayi lili mu mwoyo kwewe; ne omundu omumayaanu aananga kamamayaanu khukhwama mwibiikhilo liewe limayaanu. Sikila kumunwa kwewe kulomaloma khukhwama khu makali ka kechula mu mwoyo mwewe.
Babombakhi babili be chinju
(Mat. 7.24-27)
46“Siina sikila ne mundanga muli, ‘Omwami, Omwami,’ ne se mukhola niko ese muboolela tawe? 47Buli mundu owichanga khwise mala aulila kamakhuwa kase mala akakhola, ndamwekesia enywe omundu oyo ali walukano siina: 48Ali nga omundu owayaba kumusiingi khu lwaanda ombakhakho enju yewe. Oli chinjichi chiichula, kameechi kakiatilakho, ne se yakwa tawe, sikila yaba yombakhwa bulayi. 49Ne oyo oulila elomo yase ne se akholakho siosi siosi tawe, ali nga omundu owombakha enju khu muyekhe busa, se ombakha khu musiingi tawe, nga chinjichi chechula, kameechi kakiatilakho mala yakwa khangu, ne likwa lienju eyo liaba liboofu po!”
©Bible Society of Kenya, 2019
