Lk. 24
24
Lilamukha lia Yesu
(Mat. 28.1-10; Mk. 16.1-8; Yn. 20.1-10)
1Bakhasi bacha e siliindwa asibuyi mwichuma, basutile bibiindu biiunya bulayi chana nibio baba ne bang'oonile. 2Banyoola libaale liapiringisiibwe liarurire emuliango we siliindwa. 3Nga bengilamo se banyoolamo kumubili kwa Yesu tawe. 4Nga baba ne basiiuka, babona babaandu babili babemao befwarire chingubo ching'enang'ena lukali. 5Bakhasi abo baambwa buuri, benamikha bubweeni bwabwe bwetiila aasi, mala babaandu abo baabareeba bali, “Siina sikila ne muyiima omulamu mu bafu? 6#Mat. 16.21; 17.22-23; 20.18-19; Mk. 8.31; 9.31; 10.33-34; Lk. 9.22; 18.31-33 Se ali ano tawe, alamusiibwe. Khebulila niko aamuboolela enywe, ne asiili e Kalilaya ali, 7‘Omwana wo Mundu khukhwola aanwe khu baandu babooni, abaambwe khu musalaba, mala enyuma we chindaalo chitaru alamukhe.’ ”
8Bakhasi abo bakhebulila kamakhuwa ka Yesu, 9bakobola engo khukhwama e siliindwa mala baboolela babeeka ekhumi na mulala ne babaandi boosi bibiindu bino bioosi. 10Bakhasi abo ba baboolela barumwa bibiindu bino baba Maria Makatalena, Yoanina ne Maria maawe owa Yakobo, ne bakhasi babaandi. 11Ne kakhali barumwa bebaasia bali niko bakhasi bababoolele kali ka busa mala khusuubila tawe. 12Ne kakhali Petero enyokha mala atima acha e siliindwa enama mala abona esuuka eya katani yaulukuuswe, ne sisiindu se siabamo tawe. Mala akobola engo nauka busa kakekholeekhe.#24.12 Chibibilia chindala se chili ne lunyilili luno tawe.
Lukeendo lwe khucha Emau
(Mk. 16.12-13)
13Khu ndaalo eyo neng'ene baloondi ba Yesu babili baba balikho bacha mu sirekere sisialaangwa bali Emau, embi chi kilomita ekhumi na ndala khukhwama e Yerusalemu, 14ne baba balikho balomaloma ke bibiindu bioosi bibiaba ne biekholekhe. 15Nga baba ne balikho baapa embakha eyo, Yesu omwene echa aba siimbi mala akeenda nabo. 16Bamubona ne kakhali se bamumanya tawe. 17Yesu abareeba ali, “Mulikho mulomaloma siina nga mulakeendanga?”
Bema mala bubweeni bwabwe bwekesia bubeeleli. 18Mulala khu nibo owalaangwa Kilefasi amureeba ali, “Ewe weng'ene niwe omukeni mu Yerusalemu okhamanyile bibiindu bibiikholekhemo mu ndaalo ndiiti chibirire chino tawe?” 19Naye abareeba ali, “Biindu siina?” Bamukobosia bali, “Bibiindu bibiekholeekhe khu Yesu owa Nasareti.” Omundu yuno abele omung'oosi owe kamaani mu khukhola ne mu khuboola buli sisiindu ebweeni wa Wele ne babaandu boosi. 20Basaayi bakhulu ne babaami befwe bamuana akhalakilwe lifwa, mala abaambwa khu musalaba. 21Ne abele khweyikina khuli niye olionia Isiraeli! Luno eli endaalo eya khataru khukhwama nga kano ne kekholekha. 22Khutasa khwako bakhasi balala be kumukaanda kwefwe bakhuukisie, bachile makhelebeende khu siliindwa, 23ne se banyoolilemo kumubili kwewe tawe, bakoboole ne baboola bali, malaika ba babonekheele ne khubaboolela bali alamuukhe. 24Balala khwifwe bachiile khu siliindwa mala banyoola busa bulayi bwene nga bakhasi abo ne baboolile, ne kakhali se baboonekho Yesu omwene tawe.
25Nio Yesu ababoolela ali, “Enywe muli basilu sina? Muli kalaa khusuubila buli sisiindu nisio bang'oosi baloma! 26Se lienyekha Kristo anyaasibwe mu biindu bino bioosi, mala engile mu luyali lwewe tawe ku?” 27Nio Yesu abenooselia kakewe koosi kakaba ne kaboolwa mu maandiko, khurakikhira khu Musa ne bang'oosi boosi.
28Ne nga boola siimbi a sirekere nisio baba ne balikho bachamo Yesu ekholesia nga owenya khubirao; 29ne kakhali bamukhayilakho ne baloma bali, “Enyanga yakwile mala sisiilima silikho sitiila kona ano nafwe.” Nio acha nabo. 30Ekhala a sialwa khulia nabo, abukula kumukaati mala apa orio; mala akumesulamo abaelesia. 31Nio chimoni chabwe chekukha, bamanya bali ali Yesu niye. Mala atambao. 32Bareebana bali, “Kimiooyo kiefwe se kiyilenge nga alomalomenge nafwe khu muila nakhwinooselia kamaandiko?”
33Benyokha khangu bakobola e Yerusalemu, mala banyoola babeeka ekhumi na mulala bebuusiisie alala ne babaandi nibo baba nabo, 34mala baababoolela bali, “Ng'ali Omwami aalamukhe! Aama khubonekhela Simoni!”
35Babili abo babenooselia kakekholeekhe khu muila, lundi nga bamanyile bali Yesu niye namalile khubaelesia kumukaati.
Yesu abonekhela babeeka bewe
(Mat. 28.16-20; Mk. 16.14-18; Yn. 20.19-23; Bikh. 1.6-8)
36Nga babili abo baba ne basibaboolela kano, Yesu omwene eema akari wabwe ababoolela ali, “kumuleembe kube nanywe.”
37Besiindukha lundi baria lukali mala bebaasia bali baboone simakoombe. 38Ne kakhali ababoolela ali, “Siina sikila ne mwesiindukha mala nemuayaaya mu miooyo kienywe. 39Lola kamakhono kase ne bikele, mala mumanye muli niise samwene. Ndilekho mala mu manye, sikila simakoombe se sili ne kumubili ne bikuumba nga mubona ese nendi nabio tawe.”
40Oli ababoolela kano, abekesia kamakhono kewe ne bikele.#24.40 Chibibilia chindala se chili ne lunyilili luno tawe. 41Kakhaba kario se basuubila tawe sikila liliekhoya ne liuka, nio abareeba ali, “Mulikho ne siakhulia siosi siosi?” 42Bamuelesia sitonye sie ng'eeni endeekhe, 43niyo abukula mala alia mu moni chabwe.
44Nio ababoolela ali, “Kano kali kamakhuwa kase niko nalomaloma khwinywe nga naba ne siili nanywe, ndi, buli siindu sisiaandikwa khwise mu Lilaka lia Musa ne mu maandiko ke bang'oosi ne chinyimbo khukhwola kechusibwe.”
45Nio ekula kamebaasio kabwe bamanye kamaandiko, 46mala ababoolela ali, “Kaandikwa kali, Kristo khukhwola anyaasibwe mala alamusibwe mu bafu enyuma we chindaalo chitaru, 47mala mu lisina liewe burume khu liekanila ne khubeelwa khwe bubwoni bwilwachibwe khu kholo choosi, khurakikhira mu Yerusalemu. 48Enywe muli baloli be bibiindu bino. 49#Bikh. 1.4 Ne lola ese samwene ndamurumira enywe nisio Paapa wase asuubisia. Ne khukhwola mu lindiilile mu lukoba nabwila nga kamaani khukhwama mwikulu ne kamwichakho.”
Yesu abukulwa khucha mwikulu
(Mk. 16.19-20; Bikh. 1.9-11)
50 #
Bikh. 1.9-11
Nio abaraangirira abarusia enje we lukoba boola e Betania, mala asuta kamakhono kewe ababiita chikhabi. 51Nga aba nasibabiita chikhabi, abukhana nabo mala abukulwa khucha mwikulu. 52Bamusaaya mala bakobola Yerusalemu ne liliekhoya likali, 53mala siise siabwe sioosi bachiililila khuba mu lukaangu ne khu khupila Wele orio.
©Bible Society of Kenya, 2019
