Yn. 3
3
Yesu ne Nikodemu
1Abao omwimeelesi owe Bayaudi owalaangwa Nikodemu. Aba owe kumukaanda kwe Bafarisayo. 2Siilo silala aacha khu Yesu mala amuboolela ali, “Rabii khumanyile khuli ewe oli omwekisia owarumwa ne Wele. Se aliio omundu onyala khukhola kamayia niko ewe olakholanga Wele nakhali naye tawe.”
3Yesu amukobosia ali, “Ng'ali khuboolela ewe ndi, se aliio omundu onyala abona Bubwami bwa Wele nakhasaalilwe khabili tawe.”
4Nikodemu amureeba ali, “Omundu omukhulu anyala asaalwa lundi ariena? Ng'ali sanyala engila munda mwa maawe asaalwa lwa khabili tawe!”
5Yesu amukobosia ali, “Ng'ali khuboolela ewe ndi, se aliio onyala engila mu Bwami bwa Wele nakhasaalilwe khubirira mu meechi ne Roho tawe. 6Sisaalwa mu mubili siama khu mubili, ne sisaalwa mu roho sili sia Roho. 7Okhesiindukha tawe sikila nakhubooleele ndi khukhwola mweesi musaalwe lukhola khabili. 8Ekhuungu euchanga niio yenyile; ewe oulila busa luyoka nilwo ekhola ne se omanya niio yaama namwe niio elikho echa tawe. Kali busa kario khu buli mundu osaalwa mu Roho.”
9Nikodemu amureeba ali, “Kano kanyalikhana kariena?”
10Yesu aamukobosia ali, “Ewe oli omwekisia omanyikhaane mu Isiraeli, mala se omanyile kano tawe? 11Ng'ali khuboolela ewe ndi, khulomalomanga nilio khumanyile lundi khuboolanga niko khuboone, ne kakhali se aliio khwinywe owenya khufukiilila burume bwefwe tawe. 12Namubooleele enywe ke bibiindu bie khu sibala sino ne kakhali se musuubila ese tawe, nono mulasuubila muriena ne muboolela ke bibiindu bie mwikulu? 13Mbao omundu yesi yesi owaniina mwikulu tawe ne akhali Omwana wo Mundu owekha khukhwama mwikulu.
14 #
Khub. 21.9
“Nga Musa ne asuta endemu eye kumukasa khu murongooro mu sichiimi, mu ngila ng'eneyo khukhwola Omwana wo Mundu yesi asutwe angaaki, 15nio buli yesi yesi osuubila mu niye abe ne bulamu bwa mindali. 16Sikila Wele aasiima sibala lukali mala aana Omwana wewe Omuteelwa, nio yesi yesi osuubila mu niye akhafwa tawe, ne kakhali abe ne bulamu bwa mindali. 17Sikila Wele se aaruma Omwana wewe mu sibala khuuba Omukhalaki wasio tawe, ne kakhali abe Omuonia wasio.
18“Yesi yesi oosuubila mu Mwana se akhalakilwa tawe, ne oyo okhasuubila tawe, aakhalakilwa khale, sikila se asuubila mu Mwana omuteelwa owa Wele tawe. 19Ne bukhalaki buli buri: Buwaanga bwecha mu sibala, ne babaandu basiima sisiilima khukhila buwaanga sikila bikholwa biabwe bili bimayaanu. 20Abo boosi bakhola bibiindu bimayaanu babiila buwaanga mala se bacha mu buwaanga tawe, sikila se benya bikholwa biabwe bimayaanu bibonekhe tawe. 21Ne kakhali abo bakhola kaali ng'ali beecha mu buwaanga nio buwaanga bwoole khukhwekesia buli, niko bakholile kali ke buriaani khu Wele.”
Yesu ne Yoana
22Enyuma wa kano, Yesu ne babeeka bewe bacha mu ngoongo che Buyuda, amenyayo nabo khu siise sisiimbi ne abatiisia babaandu. 23Yoana yesi abatiisilianga abuundu bali Anoni, embi ne sirekere sia Salimu, sikila kameechi kabao abwenao kamakali. Babaandu bamuchichangakho nababatiisia. 24#Mat. 14.3; Mk. 6.17; Lk. 3.19-20 (Siise esio Yoana abeele akhareebwa mu siboe tawe.)
25Balala khu beeka ba Yoana barakikha khuyingana no mundu we siyuda khu makhuwa ke kumwiima kwe khusaaba. 26Nio bacha khu Yoana bamuboolela bali, “Omwekisia, okhebulila omundu owaba ne nawe e bukwe we luluuchi lwa Yoritani, niye walomaloma khu kewe? Lola luno yesi alikho abatiisia, mala buli mundu alikho amuloondakho.” 27Yoana aabakobosia ali, “Se aliio omundu onyala aaba ne sisiindu siosi siosi Wele ne akhamueleesie tawe. 28#Yn. 1.20 Enywe mwabeene muli baloli base nga naloma ndi, ‘Ese se ndi Kristo tawe, ne kakhali narumwa ebweeni wewe.’ 29Niye baakhiile niye omwene mwea; ne omusaale emangao arekeeresia, mala asangaala ne aulila kumumilo kwoyo niye baakhiile. Busangaafu bwase seesi bwichusibwa burio. 30Khukhwola niye atase khuuba omukali ne ese ndase khuuba omutiiti.”
Oyo Owicha khukhwama Mwikulu
31Oyo owicha khukhwama mwikulu ali omukali khukhila boosi. Oyo owama mu sibala ali owe sibala mala alomaloma kamakhuwa ke sibala, ne kakhali owicha khukhwama mwikulu ali angaaki wa boosi. 32Alomanga niko aboone ne khuulila, ne se aliio ofukiilila burume bwewe tawe. 33Ne kakhali omundu yesi yesi ofukiilila burume bwewe aandalasia ne nakano ali Wele wa ng'ali. 34Omundu niye Wele arumire aboolanga kamakhuwa ka Wele, sikila Wele amuelesianga Roho wewe mubwichufu. 35#Mat. 11.27; Lk. 10.22 Paapa asiima Omwana wewe lundi ara buli sisiindu mu bunyali bwewe. 36Omundu yesi yesi osuubila mu Mwana ali ne bulamu bwa mindali. Ne yesi yesi okharia Omwana, se aliba ne bulamu bwa mindali tawe, ne kakhali alimenya aasi we siiukuumo sia Wele.
©Bible Society of Kenya, 2019
