Yoana 16
16
1“Kalimok esi ngakiro nugu sodi nyiwolioreta esi ananupit kus. 2Kitwarakinio esi anakais a Atuk. Nabo enangi ngirwa lu itamea itwaan daang nikiari esi atamar kori asubakinit Akuj etich lotiajokon. 3Kisubeta esi ngitunga ngakiro nguna kainyo eringa kesi nyeyena Apakang kori ayong. 4Nakaneni kalimok ayong esi nguna sodi ani na enangeta ngirwa lu kisubeta kesi esi ngakiro nguna, toyeneta esi atamar abu kolong sek ayong katolimok.
Etich a Etau a Akuj
“Pekalimokini ayong esi nguna kolong anakisiakinet kainyo aringa ngoni kirukit. 5Nakaneni alosi tokona ayong ni eyei lokolong kameuni ayong, nakaneni emam tani ipei kus ni kengisi ayong atamar aliwae alosi ayong. 6Kona tokona kalimokinea ayong esi nugu, ialolongo esi noi. 7Nakaneni kalimokinit ngakiro na iteni dir atamar ejok anikus alosi ayong, kainyo ani pekalot ayong, nyebuni Ekengarakinan nikus. Nakaneni ani kalot ayong, ameuni ayong ngesi nikus. 8Ani kebu ngesi, idodikini ngitunga a akwap atamar ichwangakinito kesi ngakiro a akisech, ka ngakiro na eteniyete ta ngakiro a eriras a Akuj. 9Ichwangakinito kesi ngakiro a akisech kainyo nyenupito ngakiro kang, 10ichwangakinete kesi ngakiro na eteniyete kainyo alosi ayong nika Apakang, nakaneni nyikingolikinete esi ayong nabo jik, 11ichwangakinito kesi ngakiro a eriras kainyo erirae kolong ekapolon a akwap kana.
12“Eringa eya nakaalak asaki ayong alimokin esi, nakaneni alalaketa tokona noi nyitamunete daang. 13Na ebunio Etau a Akuj lo idodiuni ngakiro na iteni a Akuj, kiteyenuni ngesi esi ngakiro daang na iteni. Nyiruoro ngesi naeraakasi ngakeng a ilope, kilimokini esi na eira ngesi, nabo kilimokini esi ngakiro na eponito. 14Kepuruuni ngesi ayong, kainyo iropori ngesi ngakiro naeraakasi ngakang kitolimok esi. 15Ibore daang ni etingit Apa erai ikang, ngesi kalimokinitor atamar iropori Etau a Akuj ngakiro na eraakasi ngakang kitelimok esi.
Asinyit ka alakara
16“Eringa cha mono wadiochichi ani erumor nyikingolikinete esi ayong nabo jik, nabo ani ekisidi cha wadio kingolikis esi ayong.”
17Kingitanaros ngirukitos keng ngiche make tamasi, “Ekoe! Nyo tokona eger a ngakiro kanu? Anukiro nugu ebala ngesi eringa cha mono wadiochichi ani erumor nyikingolik ngoni ngesi, nabo ani ekisidi cha wadiochichi engolikisi ngoni ngesi. Nabo dang ebala ngesi, ‘Erai ni alosio ayong nika Apa.’ 18Nyo tokona eger a ibore be ‘eringa cha mono wadiochichi’ kaen? Kikuruwosi ngakiro na iruoro ngesi!”
19Toyen Yesu atamar asakete kesi akingit ngesi ngakiro, dio tolimok tama, “Abala tete ayong, ‘Eringa cha mono wadiochichi ani erumor nyikingolikinete esi ayong, nabo ani ekisidi cha wadiochichi kingolikinete esi ayong.’ Ngakiro nugu kesi ingitanarosi esi a? 20Kalimokinit esi ngakiro na iteni dir atamar ikalounete esi tosutonokis, nakaneni elakarosi ngitunga a akwap, emini esi esinyoi, esi nakaneni ibelo asinyit kus toliwor alakara. 21Na apikinea aberu akidoun, ialolongi ngesi kainyo adol esaa lo a ariaba, na idounio ngesi ikoku, imuriakini ngesi ariaba keng, elakar ngesi kainyo edou ikoku apudu nikalapatan. 22Ikote ngakiro neni anikus, ialolongete esi tokona, nakaneni kaanyuni ayong esi nabo, sodi talakaros ngitai kus noi, alakara ngina, emam itwaan epedori alemar anikus.
23“Naenangea akolongit ngina, emam ibore kilipete esi ayong. Kalimokinit ngakiro na iteni dir atamar, kiinakini esi Apa ibore daang ni ilipete esi ilimito ekiro kang. 24Emam ibore ilipasi esi ilimito ekiro kang tanang tokona, kilipas nakaneni ianyunete sodi kitemokin alakara kus.
Akipiyor ngakiro a akwap
25“Kalimok tokona ayong esi ngakiro nugu a ngakisikwaanet, nakaneni edoli ngirwa lu nyikiruoror ayong ka esi a ngakisikwaanet, nakaneni kalimokini ayong esi ngakiro ka Apa na ileerete. 26Na enangea ngirwa ngulu, ilipete esi ngesi ilimito ekiro kang, nyalimuni ayong atamar elipi ayong ngesi ibore kotere esi. 27Kainyo Apa alope ngesi kimina esi. Kimina ngesi esi kainyo kiminasi esi ayong, nabo inupa esi atamar abuni ayong ani a Akuj. 28Abuni ayong ani ka Apa abu nakwap, nakaneni aisikini tokona ayong akwap atolot nika Apa.”
29Sodi tolimokis ngirukitos keng ngesi tamasi, “Abe iruoro bo tokona iyong ngakiro na ileerete, nyiruoro a ngakisikwaanet. 30Kiyeni tokona sua atamar iyeni iyong ngakiro daang. Emam tani ibore ejoikinitor itwaan kingisi iyong akiroit. Kitunup sua ibore ngini atamar ibunit iyong ani a Akuj.”
31Kingit Yesu tama, “Inupa esi tokona a? 32Abala ayong esi a! Enangi esaa, anang tani tokona esaa lo ialarotor esi, itwaan daang elosi nawi keng, kimiekis ayong bon, nakaneni nyedongi ayong bon kainyo kirukit ayong ka Apakang. 33Kalimok ayong esi nugu sodi kisileta ani irauneta esi ngipei ka ayong. Kiboliatar esi ngitunga a akwap. Nakaneni totitinyoketa! Epiu ayong ngakiro a akwap!”
BIBLE SOCIETY OF KENYA (c) 1999
