Yoana 11
11
Akitu a Losaro
1Adeaka itwaan ni anyaritae Losaro ni alomit Betania. Arai Betania ere lo alomito Mariam ka Marita nakaatokeng. ( 2Arai Mariam ngina nakolong ewasakini Ekapolon Yesu akimiet nakakukunyon nakejen, sodi kisuta a ngitim keng, arai lokaatokeng Losaro adeaka.) 3#Luk 10:38-39 Sodi apot ngikaitotoi keng tomeasi itwaan nia Yesu tama, “Ekapolon, edeak lopae kon lo imina iyong.” #Yoa 12:3
4Ani iirari Yesu ngakiro nguna, tolim tama, “Meere edeke a Losaro lo etoanea ngesi, erai lo ipuruunere Akuj, erai edeke ngolo eanyunea Lokookeng a Akuj ekipur.”
5Amina Yesu Marita ka nakaatokeng ta Losaro. 6Nakaneni ani iirari ngesi atamar edeak Losaro, abu toper neni ngirwa ngiarei. 7Sodi ani ekisidi tolimok ngirukitos keng tama, “Potu atobongosi nakwap a Yudea.”
8Tolimokis ngirukitos keng tamasi, “Eketataman, ngoon ngirwa lupei lugu, asakete ngitunga kaina akimas iyong a ngamoru, isaki tokona iyong nabo alosit inaa?”
9Tatachak Yesu tama, “Erai ngisaa a apaaran ngitomon ka ngiarei, kori ai? Ani elosi itwaan naparan, nyibusokin ngesi, kainyo itee akicha a akwap kana. 10Nakaneni ani elosi itwaan nakwaare, ibusokin kainyo emam akicha anikeng.” 11Tolim Yesu nguna ani erumor kiatak tama, “Ejotoe lopae yok Losaro, nakaneni alosi ayong etekienyu ngesi.”
12Tatachut ngirukitos keng tamasi, “Ekapolon, ani kejotoe ngesi ejoker.”
13Nakaneni eruoro Yesu atamar atoana Losaro dio tamasi kesi kori ejotoe. 14Sodi tolimok Yesu kesi ngakiro na ileerete tama, “Atoana Losaro. 15Nakaneni alakara ayong kotere esi anipakirukitor ayong ka ngesi, sodi tonupeta esi. Potu apana nikeng.”
16Sodi tolimok Tomas (lo enyaritae emuut) ngirukitos luche tama, “Potu daang erukosi ka Eketataman sodi atotoaketa ka ngesi aapei!”
Yesu ngesi erai ayarun ka akiyar
17Na adolunio Yesu, torukou Losaro kenuk keper naliel ngirwa nguomwon. 18Aapi Betania asibit ngakilomitae ngauni alo Yerusalem, 19aponito ngitunga a Yudea lukaalak akisililing Marita ka Mariam totikokis ngitai kotere akitu alokaatokech.
20Na eirarea Marita atamar ebunit Yesu, tolot kisiriamia ngesi, nakaneni kidong Mariam kai. 21Tolimok Marita Yesu tama, “Ekapolon, arai toyei iyong nege, peketoanit lokaatokang! 22Nakaneni ayeni ayong atamar tani tokona dang, kiinakini Akuj iyong ibore daang ni ilipi iyong.”
23Tolimok Yesu ngesi tama, “Eyaruni lokaatokon.”
24Tatachak Marita ngesi tama, “Ayeni ayong atamar eyaruni akolongit na esal.”
25Tolimok Yesu ngesi tama, “Ayong ngesi arai ayarun ka akiyar, itwaan cha daang ni eyari tonupite ngakiro kang, nyetoani jik, 26nakaneni itwaan cha daang ni eyari katonupite ayong, nyetoani jik. Inupit iyong ngakiro nugu a?”
27Tatachak tama, “Ee, Ekapolon, anupit ayong atamar iyong irai Kiristo, Lokookeng a Akuj, lokolong abeyo ebuni nakwap.”
Akikalounet a Yesu
28Na arumorea Marita alimun nguna, tobongo dio tanyara nakaatokeng Mariam nikeng bon tolimok tama, “Eyei Eketataman nege kingita iyong.” 29Na eirarea Mariam nguna, tonyou atipei tolot kisiriamia ngesi. ( 30Aringa Yesu nyenanguna nadakar, aringa eyei ni esiriamea Marita ngesi.) 31Nakaneni ngitunga lu arukito ka Mariam isililingete etikokinito etau, apot kingolikis eger lo apudorea ngesi nikalapatan atipei. Kiwapakis ngesi ebaasi kori elosi ngesi akigoro analiel.
32Todol Mariam ni ayei Yesu napei engolikinea, kibusokin diyete ngakejen keng tama, “Ekapolon, arai toyei ngoon iyong nege, peketoanit lokaatokang!”
33Kingolik Yesu ngesi igoro, kingolik tani eger lo egorotor ngitunga lu ewapito ngesi, toriabakin Yesu kialolong noi. 34Kingit kesi tama, “Aliwae inukakinito esi ngesi?”
Tatachut tamasi, “Ekapolon, bua taanyunga.”
35Kikalou Yesu. 36Tamasi ngitunga, “Taanyungasi mono esi eger lokeminar ngesi!”
37Nakaneni apot epewae kech tamasi, “Ekoe! Abe angaari bo ngoon ngakonyen a emuduk. Peadikino ngesi iratakini akitu a Losaro a?”
Akiteyaruno a Losaro
38Tolot Yesu naliel erubakinit ialolongi. Arai aliel ataaba na abokitae tarapakinae amoru nakituk. 39Todungok Yesu kesi tama, “Tolemasi amoru!”
Tatachu Marita nakaatokeng kangolo atoanit tama, “Ekapolon, iwuaruni niabosan kainyo aper tokona naliel ngirwa nguomwon!”
40Tolimok Yesu ngesi tama, “Pekalimokinit tete ayong iyong atamar ani kinup, ingolikini apolou a Akuj a?” 41Apot tolemasi amoru, tokienyia Yesu kidiama tama, “Apa, kabuakinit ayong iyong alakara ani kipupio iyong ayong. 42Ayeni atamar kipupi iyong ayong ngirwa daang. Nakaneni alimunit nugu kotere ngitunga lugu, sodi tonupeta kesi atamar iyong kimeuni ayong.” 43Alimunet nguna, kirema tanyara tama, “Losaro, topud nikalapatan!” 44Topud ekatoan ngolo nikalapatan, einikinitae ngakan keng ka ngakejen ngiworui lu aliel, nabo abutarit eworu ereet keng. Tolimok Yesu kesi tama, “Talachasi kimiekis tolot.”
Alokito ngitunga Yesu
(Matayo 26:1-5; Mariko 14:1-2; Luka 22:1-2)
45Na engolikineta ngitunga lukaalak luaponito nia Mariam na asubi Yesu, apot tonupa. 46Nakaneni tolot epewae kech nia Ngiparisayo alimokin na asubi Yesu. 47Sodi tochunakinos Ngimurok Luapolok a akai a Akuj ta Ngiparisayo Natuk tamasi, “Ekoe, kikoni ai? Kingolikisi mono esi ngakitoodikinet nakailiilok esubi itwaan en! 48Ani kiisik ngoni ngesi esubi nugu, enupete ngitunga daang ngakiro keng, sodi epote Ngiroma kinyasut akai a Akuj ka ngitunga a akwap yok!”
49Tolim epei kech lo enyaritae Kayapa, lo arai Emuron Loapolon ekaru ngolo tama, “Ibangaaka mono esi a? 50Nyiyenete esi atamar ejoikinit itwaan ipei etoani kotere ngitunga luche sodi nyinyasunotor ngitunga a akwap daang a?” 51Nakaneni, peeruoro ngesi ngakiro na eraakasi ngakeng a ilope. Kona araakar ngesi Emuron Loapolon ekaru ngolo, adwari ngesi atamar etoani Yesu kotere Ngiyaudi, 52meere kotere Ngiyaudi make, nakaneni echunakini wapei ngide a Akuj daang lu ialara taraut ngipei.
53Akolongit napei ngina jik, totuko ngikapolok a Ngiyaudi eger lo eareta Yesu. 54Sodi abu Yesu nyelot ileere anakwap a Yudea, nakaneni torotok kaneni tolot nakwap na ayei diyete ariet, sodi tanang lore lo anyaritae Epiraim, kiboikinos ka ngirukitos keng neni.
55Nakaneni aapikinit ngirwa a esukukuu a Ngiyaudi alo a Adeparet. Torotokis ngikaalak anamanat toloto Yerusalem akitosega loger a etal a Musa, eringa akolongit a esukukuu nyenanga. 56Asakete kesi Yesu, ani na eriamitotor kesi kai a Akuj, kingitanaros make ebalasi, “Esibit esi kwaai? Ebuni ngesi Losukukuu kori emam?” 57Adungunito Ngimurok Luapolok a akai a Akuj ta Ngiparisayo akiroit atamar, ani keyei itwaan ni eyeni ni eyei Yesu, ejoikinit elimori sodi kirumuneta kesi ngesi.
BIBLE SOCIETY OF KENYA (c) 1999
