Mat 3

Joon Nfoo Moo fekte kenəə ə Feyin

(Mak 1.1-8; Luk 3.1-18; Jn 1.19-28)

1Naa se lu əbchii fo, Joon Nfoo Moo ndu əbkwak ɛ Judea, è se fekte se ghele ge: 2Ghɛn kubsen tetem ə tɛn è fiile se ɛybame mbee bek ge əbliy ɛysak nə Feyine shi ɛ keghoo. 3Lu Joon wɛ wele ntum nə Feyine wɛ Ezaya nè suŋnen kum wen ge:

“Yio ka giɛ wele jaŋen ɛ əbkwak ge:

Siyse jii se Báàba

nɛyte kevəə jii se wen é ke yɛ nduu ɛ titiy!”

4Ndəy sɛ Joon nè maken nè lu nɛ ɛ́ baa nɛ̀ ɛyghuye nyam kesɛsɛye, gese teme kekuye guo se wen əmkeŋkeŋ. Ɛyyiɛ ə wene nè lu nguumese ghene fedioŋe. 5Ghele se lóò ɛ Jolesalem nɛ̀ se Judea, naa nɛ̀ se ntɛk sejim sɛ se nè báksen se jio Joldan, gwiye se yɛne Joon. 6Ghene nè lô se taŋle ɛychio ə ghen ge ghene lu nɛ ɛ́ nɛɛy mbee, nɛ Joon foo moo se ghene ɛ jio Joldan.

7Əb nɛ̂y yɛn ka ghele kenone Falisee nɛ̀ ghɛ́ kenone Saddusee gwiyen se ɛydio ge ɛ́ fó moo se ghene è me suuy se ghene ge: Ghone yiose, suuy ndɛ se ghɛn ge lòó ghɛn nyiŋ è boy se ngɛk sɛ Feyine shiin se mak se ghele? 8Ghɛn yɛ nɛɛy əbnəə əbjuŋe se din ge ghɛn kubsenmen tetem ə tɛn. 9Ghàà ghɛn yɛ kwaate ge lòó ghɛn yɛ suuy se ngeŋ ə sɛne ge: Ghɛs lu kɛse ghel ɛykfəə nə Ablaham. Mɛ suuy se ghɛn ge lòó Feyine bense ɛtiy ghin fɛn se ghon nə Ablaham. 10Njam se shi ɛyshaa fekak kebaaten ka ɛ́ sɛɛ fekak so kɛn ɛ ɛghaŋ. Naa fekak fekɛ fɛ fe koom wiy əmtam əmjuŋ lu nɛ ɛ́ gwɛl è kwaay. 11Mɛ foo nɛ lu moo se ghɛn se din ge ghɛn kubsenmen tetem ə tɛn, dî nɛ wel əblee nɛ̂y gwiy è yɛ foo nɛ lu Keyioy Kelanene gese nɛ̀ əbvəse se ghele. Wel nɛ̂ vine chia mɛ, nɛ chèmè lu kɛn guose ɛvəə nə wen fene mɛ báà se lu kekwɛnten ka lòó mɛ bɛɛy. 12Əb ki ɛyshɛn ə wen ɛ keghoo se fɛfte ɛsaŋ ə wen so ɛjim. Əb kuuy ɛsaŋ ə wen è vii se wen ə əbnwak, è me yɛs məyse ten è nyok se əbvəs wɛ əb baalen əbliy əbjim.

Joon fó moo se Jesus

(Mak 1.9-11; Luk 3.21-22)

13Se lu əbchii nɛ̂ fo Jesus me lòò ɛ Galilee è gwiy ɛ jio Joldan è yɛn Joon ge əb fó moo se yi. 14Joon me se tune, suuye ge: Kè lu se fo wɛ̀ moo san, wɛ̀ se suuye ge mɛ fó moo se wɛ̀ lɛɛy?

15Jesus fise nɛ lu ge: Nɛɛy ka mɛ kɛŋen se leenen bek ge lu ɛ jii nɛ̂ ghan yɛ ghɛsoo nɛɛy əbnəə wɛ Feyine kɛŋen. Joon me beeme. 16Jesus fii moo ɛ leghɛ è loo fəy se jio, ɛyyio dise, əb yɛn Keyioy ə Feyin nɛ ke səəke ka kenlal è guo ɛ wen əbghun. 17Giɛ səəke è gwiy ɛ ɛyyio ge: Vin lu wán ə wom wɛ mɛ koŋen, nɛ mɛ gese saŋle naa se ŋaŋ kum wen.

선택된 구절:

Mat 3: oku

하이라이트

복사