MA-TAI 8
8
DSA̱̍NG DAE BIE̱̍T.
1Iei-su ròng mao bô li dù uèn lăo rò̤ng lăng dı̍.
2Li váng bàn vàng náo ndiăo mă ba̍e dı̍ nào, Sû nò vì̱n dsi ro zâeo ku̍ săeo sia̍o.
3Iei-su ín vèng ra̍i di̍ nào, ku̍ vì̱n mèng săeo sia̍o liao yo̤̍, ka̍i váng náo dı̍ dsîu shát dák săeo sia̍o liao.
4Iei-su lăng dı̍ nào, mèng mâe siáo si̍n niâng zâeo dù uèn ro, mâe băi zâeo dsá̱ng sĭ nguóng ndăn ndăng mèng, suo̍ng ka̍i lèk mâ̱n Mo-shi mbăi, lăng sa̍o di̍ kó dò̤ só.
5Iei-su dsít băi Gia-beh-len, li váng kuŏ̤n zâ ndiăo mă dà̱ng chiu dı̍ nào,
6Sû a váng rò̤ng yu̍ ku̍ bàn dâ̱n, dso̍ rà̱n nìn dĭu gie̱̍t de rae.
7Iei-su lăng dı̍ nào, ku̍ băi yŏ̤ dı̍.
8Kuò̤n zâ zăn nào, sû a mèng dà̱ng rà̱n ku̍, ku̍ mì ka̍m, mèng dseh nào ĭng za̍o ndiăo, váng rò̤ng yu̍ ku̍ dsîu ndĭ liao.
9I̍n uĕi ku̍ shĭ dù uèn kuô̤n, iei li bu kuĕn shĭ ku̍ kuô̤n, iáo váng dı̍ băi dı̍ dsîu băi, iáo váng dı̍ mă dı̍ dsîu mă, iáo dù ua̍e kó rĕ làeo dı̍ dsiû kó.
10Iei-su nyĭ za̍o ni dsi lo̤̍k, rò̤ng bu sĭ lăng di̍ nào, ku̍ lăng ka̍i su̍ nào dsı̍ng, dso̍ ndăeo I-seh-lieh ku̍ vĭ răn sĭn dsàn iàng ni ndu̍m.
11Ku̍ yu̍ lăng su̍ nào, sung du̍ng bŭng sung săi bŭng dù uèn lăe lâi mă, rò̤ng Ia-beh-la-han I-sa Ia-ko tsung dsâ ráng dsuái.
12Lèk bén bò̤ng da̍u dò̤k niáp dà̱ng láp uan báe wo̍k băi, dso̍ lia̍ng dı̍ lâi li gie̱̍t dâe rièk vàn.
13Iei-su lăng kuò̤n zâ nào, mèng da̍u băi yo̤̍, dsău dò̤k sĭn dsàn mèng uĕi mèng kó bàn liao, rá dı̍ váng rò̤ng yu̍ dı̍ dsîu ndĭ liao,
14Iei-su dà̱ng rà̱n Bi-deh yo̤ răn iá da̍e dı̍ bàn bíng rîam nìn dso̍.
15Iei-su dò̤ za vèng dı̍ bíng rîam dsîu ndĭ liao, dı̍ iei re̍n mă wŭ rĕ sa̍o dı̍.
16Dà̱ng liao lâi zám, li dù uèn dò̤ ba làeo bu dò̤k và̱ng dò mă dà̱ng Iei-su. Iei-su nào ĭng za̍o ndĭao niáp náng dù và̱ng wo̍k băi, iei yŏ̤ ndĭ liao sa̍o dù uèn bàn bíng.
17Iàng ni dsĭn hò za̍o I-sai-ia dı̍ nào, váng dı̍ dò̤ bíng ka̍i su̍, dăng gie̱̍t ka̍i su̍.
18Iei-su yo̤ răn dù uèn lăe uùm giăng di̍, dsîu mbăi tu dĭ kău dà̱ng báe wen băi.
19Li váng kó sĕ ndiăo mă nào, dsá̱ng sĕ mèng băi bò̤ng laeo, ku̍ lâi lăng mèng băi.
20Iei-su nào, váng li dsuóng, ròk mbĭn li ruòng, lèk dù uèn da̍u mì li lia̍ng kău kung kâu.
21Yu̍ li tu dĭ ndĭao lăng Iei-su nào, sû a dô ku̍ băi mók bó ku̍ koa̍n.
22Iei-su nào, dô bu dăe mók bu dâe sa̍o dı̍, mèng sĭ lăng ku̍ yo̤̍.
23Iei-su zên săng rù liao, tu dĭ sĭ lăng di̍.
24Lo̍ săng zâi re̍n rùm ndu̍m, ram dì duo̍p dsâ mì lăe lâi ku̍om liao ndăn rù, dsò̤ dı̍ Iei-su dsĭn nìn láp.
25Tu dĭ mă iáo di̍ si̍n nào, sû gĭu ka̍i du̍, ka̍i du̍ lâi dăe.
26Iei-su nào, ka̍i su̍ dù uèn sĭn dsàn na̍i, uĕi iàng mà lău? di̍ dsi re̍n mă viéh rùm rò̤ng ram dì duo̍p, săng zâi dsîu bà̱k bì̱ng ndu̍m liao.
27Sa̍o dù uèn dı̍ lo̤̍k liao nào, váng ni shĭ dù uèn iàng mà? rùm rò̤ng zâi iei nyĭ ı̍ dı̍ nào.
28Iei-su kău ku̍a zâi dà̱ng bò̤ng Keh-kah-sa, bùng suŏng uèn và̱ng dò sung biéng mó wo̍k mă ya̍k de rae, ko̍an mă mì li dù uèn ka̍m băi diào răn di̍ dó kua̍.
29Sa̍o di̍ wo̍k ia̍m nào, lèk Sâng-dî Iei-su ka̍i du̍ lăng mèng li iàng mà? ra̍ ví dà̱ng mèng mă zâeo ka̍i du̍ sû nı̍ép ní?
30Dso̍ lia̍ng kăi li lăe náng dù mŭ kĕn.
31Náng dù và̱ng chiu Iei-su nào, mèng nò lâi niáp du̍ dô du̍ dsít ndăeo náng dù mŭ.
32Iei-su nào băi yo̤̍, sa̍o dı̍ dsîu wo̍k mă dsít ndăeo náng dù mŭ, náng dù mŭ wŭ ra̍ du̍ng a̱̍k ròng bŏ, dso̍ ndăeo zâi du̍m dăe liao.
33Bu lâi mŭ iáu dsít băi dsŭ, aŏ náng rĕ ni rò̤ng rĕ dù uèn và̱ng dò, du̍ng lăng dù uèn ndăeo dsŭ nào.
34Liao dsŭ dù uèn du̍ng wo̍k mă răn Iei-su, chiu dı̍ bo̤̍k lia̍ng sa̍o dı̍.
maintained by the British and Foreign Bible Society
