WƖAA DƖ-SUOMUŊ 13
13
Abɩram arɩ Lɔt pɔrɛ dɔŋɔ lɛ
1Ŋɩɩ nɛ Abɩram arɩ ʋ haala arɩ kʋŋkala ʋ sɩ kɛnɛ lɩɩ Ijipiti tinteeŋ lɛ a mʋ Nɛgɛf tinteeŋ. Lɔt to ba harɩŋ. 2Abɩram fa kɛŋ kɩaa kɩŋkɛŋ, pʋsʋŋ, warɩpʋla arɩ sɛlɩmɛ.
3Ŋɩɩ nɛ ʋ lɩɩ Nɛgɛf a dʋʋrɛ ŋɩɩ a kʋ yi Bɛtɛl, a kiele mʋ Bɛtɛl arɩ Aɩ pɛgɛ, lee-la ʋ lɛbɩŋ fa sɩ hɛ. 4Lee-la nɛ ʋ laa sɩpaaŋ saa Wɩɩsʋllɩ koruŋ a yɩrɛ La TƖƖNA yɩrɩŋ.
5Lɔt fa sɩɩ to Abɩram harɩŋ, ʋ ma fa kɛŋ ʋ tɩtɩa piesee, nɛsɩŋ, arɩ lɛŋŋɛɛ nɛ. 6Ama Abɩram arɩ Lɔt fa bɩra bɩ dɩ-bala wuo hɔŋ, bɛɛ wɩaa ba pʋsʋŋ yʋga, ka yaŋ bɩ yʋgɛ lee-la dɩ ba pʋsʋŋ didii. 7Ŋɩɩ nɛ Abɩram kʋdaaraa arɩ Lɔt kʋdaaraa yuyuo dɔŋɔ. Bʋa-la lɛ dɩ Kɛnaŋ tɩŋŋaa arɩ Pɛrɛs tɩŋŋaa nɛ fa hɔŋ nɩmɛ.
8Ŋɩɩ nɛ Abɩram bʋla pɩ Lɔt, “Mɩɩ sʋlʋŋ, la ŋaa naambiiriŋ nɛ, sɩ́ leŋe la yuyuo dɔŋɔ, dɩ la kʋdaaraa ma sɩ́ dɔŋɔ yuyuo. 9Tinteeŋ dee bɩ ŋɩɩ pɩnaa? Leŋ la pɔrɛ dɔŋɔ lɛ, dɩ ŋ nɛ jaŋ mʋ nadiiŋ, mɩ jaŋ mʋ nagʋa. Dɩ ŋ nɛ bɩra jaŋ mʋ nagʋa, mɩ jaŋ mʋ nadiiŋ.”
10Ŋɩɩ nɛ Lɔt bee na Jɔdaŋ fuonaaŋ kala dɩ ʋ pɩna a fɩɛlɛ woruŋ. Fuonaa-la pɩŋ ŋɩɩ nɛ a mʋ yi taŋ-la ba sɩɩ yɩrɛ Zʋaa. Ʋ fa kɛŋ lɩɩŋ kɩŋkɛŋ a nagɛ Ɛdɩŋ ŋmaŋkaaŋ a bɩra nagɛ Ijipiti tinteeŋ ma. (Bʋa-la lɛ dɩ La TƖƖNA fa ha bɩ tasɩ-la ba sɩɩ yɩrɛ Sodom arɩ Gomora cheye.) 11Ŋɩɩ nɛ Lɔt bagɩsɛ joŋ Jɔdaŋ fuonaa-la kala a mʋ hɔŋ wɩɩpɔsʋŋ dɩɩrɩŋ, ʋ dɩ Abɩram pɔrɛ dɔŋɔ lɛ. 12Ŋɩɩ nɛ Abɩram hɔŋ Kɛnaŋ tinteeŋ dundolo nyuŋ, ka Lɔt ma mʋ hɔŋ tabala-la sɩ hɛ fuonaaŋ lɛ a hɛ ʋ lɛbɩŋ kpagɛ tabal-la ba sɩɩ yɩrɛ Sodom. 13Ama Sodom nɩaa fa ŋaa nɩbɔmɔ nɛ a chaasa ŋaa wʋbɔŋŋɔɔ La TƖƖNA teeŋ.
14Abɩram arɩ Lɔt sɩ kɛrɛ dɔgɔ lɛ, Wɩa bʋla pɩ Abɩram, “Lee-la ŋ sɩ chɩna, kɛŋ ŋ nyuŋ je a beŋ taŋ-sɛsɩŋ, taŋ-bʋbʋɔŋ arɩ taŋ-nyuŋ. 15Lee-la kala ŋ sɩ na, mɩ jaŋ joŋo pɩŋ, ŋ dɩ ŋ doho nɩaa a kaa mʋ wuu. 16Mɩ jaŋ leŋ dɩ ŋ doho nɩaa nagɛ hagɩlɩ-biee. Dɩ nʋʋ nɛ jaŋ wuo dɩɩsɛ hagɩlɩ-bie, ʋ jaŋ wuo dɩɩsɛ ŋ doho nɩaa. 17Sii a vɛnɛ golli tintee-la, ʋ duomuŋ arɩ ʋ jalɩŋ. Ʋ nɛ mɩɩ chɛ mɩ joŋo pɩŋ.”
18Ŋɩɩ nɛ Abɩram churi ʋ lɛŋŋɛɛ a kaa mʋ hɔŋ taŋ-la ba sɩɩ yɩrɛ Hɛbʋrɔŋ lɛ a kpagɛ Mamɩrɛ tɩɩ-bala-la. Nɩmɛ nɛ ʋ saa Wɩɩsʋllɩ koruŋ a pɩ La TƖƖNA.
©Ghana Institute of Linguistics Literacy and Bible Translation 1984, 2014
