MATTHAI 13
13
Caangti Hehkung Oen Thuidoetna
(Mk. 4:1-9; Lk. 8:4-8)
1Te hin ah Jesuh lawng te im te a thawh taak tih Galili tuiliikeeng la cet; cang puei ham te ah te ngawl. 2Ahih aka veel thlaangping a yahawh aih dawngah Jesuh tah lowng khuila kuun tih ngawl; thlaangping hue tah tuilii-keeng ah pai u. 3Jesuh lawng thuidoetna awl oen ahimi te thaihu moen a thui pe.
“Voei khat ah caangti hehkung thlaang pakhat tah caangti heh hamla cet. 4Ahih lawng caangti te lo khuiah a heh vengah khatsut tah lawngpui ah tla tih va lawng a ruh boeih. 5Caangti khatsut tah lungrawng sawkah dilai ah tla, dilai apam dawngah kawlkalh ah caangti tah po. 6Tede khaw a ling hang atah caangpawk te khawling lawng a kaang, a yung te a dung la a thlak nawh dawngah kawlkalh ah yai tih reu. 7Caangti khatsut tah thliing tim ah tla, thliingkung tah roeng hang tih caang te malh a telh. 8Tede caangti khatsut tah laitheen dawngah tla tih a vui a thaih thaawn. Khatsut tah apueh yakhat, sawmruk, sawm thum toe la nawl.”
9Jesuh lawng, “Yaakna haa aka khueh lawng ya hawn seh” a tina.
Thuidoetna Awl kah A Mengtengna
(Mk. 4:10-12; Lk. 8:9-10)
10Tecoengah a hubang hue Jesuh tengla law u tih, “Thlaangping tengah awl na thui vengah n'tu hamla thuidoetna awl na hawna?” tila a doet u.
11Jesuh lawng, “Vaan ram kawng awlhuep mingna te nangmi tengah kan peek poen, tede ahimi tah ka pe thlan. 12A-u khaw aka khueh te tah a taawm pe vetih a ngoena lak ah a khueh tare ai; tede aka khueh nawh te tah a khueh duen te a lawh pe ai. 13Ahimi tengah awl ka thui vengah thuidoetna ka hawna he tah ahimi lawng a bueh u, tede hu u nawh, a hutung u, tede ya u nawh, yaakming khaw yaakming u nawh. 14Tedawngah Tawngha Isaiah lawng a thui oepsoeh awl te ahimi tengah soep. Te awl tah:
“He thlaang hue lawng a hutung tah
a hutung u de,
yaakming u nawh; a bueh tah
a bueh u de hu u nawh,#Isai 6:9-10
15Metihtiah a kawpoek biing sut tih
a haa a buem khoep u,
a mik te a yiin khoep u,
tih nawh kawinih ahimi mik lawng
a huh vetih
a haa lawng a yaak coengah
a thinkaw lawng a yaakming vetih
ka tengla va meel u ai,
ahimi te kai lawng ka hoeih sak sui
de” tila Pathen lawng a thui te ni.
16“Nangmi tah na yotheen phoeih. Na mik lawng a huh tih na haa lawng a yaak u. 17Atak tang kavan thui u, nangmi lawng na huh u he tawngha hue oen Pathen kah thlaang hue lawng huh ham a ngaih u tangkiik de hu u thai nawh; nangmi lawng na yaak te yaak ham a ngaih de ya u nawh,” a tina.
Caangti Hehna Kawng Thuicaihna
(Mk. 4:13-20; Lk. 8:9-10)
18Tedawngah caangti hehkung thuidoetna awl thuicaihna he hutung u lang yaakming u lah. 19A-u khaw Vaan ram kawng awlthang a yaak de aka yaakming nawh te tah lawngpui ah aka tla caangti oen lo u. Ahimi thinkaw ah a heh u caangti te Seitan lawng law tih a rot pe. 20Lungrawng sawkah dilai apamna ah aka tla caangti tah Vaan ram kawng a yaak vengah awmngaihcala aka do koeloe thlaang oen lo u. 21Tede, ahimi kah thinkaw lungbui ah Vaan ram kawng a thlengyung a thlaak nawh dawngah asan hlang hing nawh. Tedawngah Vaan ram kawng dawngah thekha raina oen heemtekna soeprep a law vengah ahimi lawng kawlkalh ah a hoett pahoei. 22Thliing tim ah aka tla caangti thui-ngaihna tah Vaan ram kawng tah a yaak de dilai khawsakna dawngah lakueng tih dilai han bawilen ngaihna lawng akang ahalh khoep tih caangvui caangthaih aka thaawn nawh oen lo u. 23Laitheen dawngah aka tla caangti tah Vaan ram kawng te a yaak tih aka yaakming thlaang te a thuingaihna, ahimi tah a vui athaih thaawn tih apueh yakhat, apueh sawmruk, apueh sawmthum la thaawn.
Varaamcaang oen Thuidoetna
24Jesuh lawng ahimi tengah atloe thuidoetna pakhat a thui pe: “Vaan ram tah amah lo ah caangti theen aka heh thlaang pakhat oen lo u. 25Yiin at atah, thlaang boeih a ih coengah raal pakhat law tih caang tim ah varaamcaang a heh tih a ceh taak. 26Caangkung tah roeng tih avui arai hang atah varaamcaang khaw pho van. 27Lokhuehkung kah a tuihyoeihthlaang hue lawng a tengla law u tih, Bawipa! na lo khuiah caangti theen ni na heh de, ame kah varaamcaang he a po oh kai?” a tina u. 28Ahih lawngah, “Te ngoen tah raal thli lawng a heh ni,” a tina. Ahimi lawng, “Ka cet u silang varaamcaang te ka phuk u ai aw?” tila a doet u. 29Lokhuehkung lawng “Phuk u boel,” varaamcaang te na phuk u kawinih caangkung oen na phuk renten u hau ai” a tina. 30Caang ah tue a pha thlantoe caangkung oen varaamcaang te roeng haih hawn seh. Caang ah tue a pha vengah cang-aat hue te lamhala varaamcaang te phuk, tuum u langtah hai dawngah phuum uh, te coengah caang te aat uh! caawi u langtah ka thaidi khuiah sang uh, ka tina badai.” a tina.
Antammu oen Thuidoetna
(Mk. 4:30-32; Lk. 13:18-19)
31Jesuh lawng atloe thuidoetna pakhat ahimi tengah a thui pe: “Vaan ram tah he tila awm. Thlaang pakhat lawng antammu a lawh tih a lo khuiah a heh. 32Antammu tah amu-ati boeih lak ah a yiitkoek la awm. Tede po tih a roeng hang atah akung boeih lak ah aka bo koek la awm. Thingkung pakhat la pai, va thli law tih a beek dawngah bu a tuk.”
Tawlru oen Thuidoetna
(Lk. 13:20-21)
33Jesuh lawng ahimi tengah atloe thuidoetna pakhat a thui pe baal: “Vaan ram tah he tila awm. Hutaa pakhat lawng tawlru a lawh tih taa-eek hawl at dawng a phull atah a raawi sak boeih oen lo u” tila Jesuh lawng a tina.
Jesuh Lawng Thuidoetna A Hawna Kawng
(Mk. 4:33-34)
34Jesuh lawng he thaihu boeih thlaangping tengah a thui vengah thuidoetna a hawna. Thuidoetna hawna ohla n'tu khaw thui nawh. 35He tila a thui he tah Tawngha lawng,
“Ahimi tengah awl ka thui vengah
thuidoetna ka hawna ai;
Dilai a suen cuek kalawng
ming nooek nawh awlhuep te ka
thui ai,” tila a thui te
a soepna ham ni.#Saam 78:2
Varaamcaang oen Thuidoetna Kawng Thuicaihna
36Jesuh lawng thlaangping te a ceh taak tih im khuila a kuun vengah a hubang hue a tengla law u tih, “Lo khuikah varaamcaang thuidoetna te acaihla van thui lah” a tina u.
37Jesuh lawng, “Caangti theen aka heh tah Thlaanghing Capa ni; 38Lo tah he dilai ni; caangti theen tah Vaan ram aka paang thlaang hue ni; varaamcaang tah Seitan kah thlaang hue ni; 39Varaamcaang aka heh raal tah Seitan ni; caang ah tue tah dilai a boetna; caangaatkung tah vanthlaang hue ni. 40Varaamcaang te a caawi tih hai dawng a phuum angla dilai aboet tue atah te tila awm van ai. 41Thlaanghing Capa lawng vanthlaang thli te avan tuih vetih thawlhna ben la thlaang aka ceh sak boeih oen thaihu the aka sai boeih te amah Ram khuiah a caawi sak vetih, 42Vanthlaang lawng ahimi te haialh dawngah a phuum ai, te huen ah rap vetih a naw a rueng u ai. 43Tevengah thlaangdoeng thli tah ana pa Pathen kah Ram ah khaw angla see u ai. Tedawngah yaakna haa aka khueh lawng ya u lah!” a tina.
Kaawn Thuhna oen Thuidoetna
44“Vaan ram tah he oen lo u. Thlaang pakhat lawng lo ah khawh-arang a thuh te a huh. Ahih lawng atheenla a up koep tih awmngaihla im la cet. A khueh thaihu boeih te a yoeih coengah meel koep tih te kah lohuen te a lai.
Latha oen Thuidoetna
45“Tecoengah Vaan ram tah he oen lo u. Thlaang pakhat lawng latha theen a tlap, 46A hih lawng latha theen te a huh vengah cet tih a khueh thaihu boeih te a yoeih coengah te kah latha te a lai.
Lok oen Thuidoetna
47“Tecoengah Vaan ram tah he oen lo u. Tui aka hawi khatsut hue lawng tuilii khuiah lok te a heeng u tih nga phun soeprep te a tuuk u. 48Lok dawngah nga a be atah lan la a doek u tih nga te pekbo hamla ngawl u: nga atheen te busui dawngah a sang u tih nga athe te tah a voeih u. 49Dilai aboet tue atah he tila awm van ai: vanthlaang lawng law vetih thlaang theen timkah thlaangthe te a tuek coengah, 50Ahimi te haialh dawngah a phuum ai. Te huen ah ahimi lawng rap vetih a naw a rueng u ai,” tila a thui pe u.
Awltak Athaai oen Aruem
51Jesuh lawng, “He thaihu boeih he na yaakming u aw?” tila ahimi te a doet. Ahimi lawngah, “Oeih! ka yaakming u poen” a tina.
52Tedawngah Jesuh lawng, “Phung-awl cangpueikung timkah thlaang pakhat, Vaan ram ah hubang pakhat la aka awm tah kaawn a khuehna im khui-kah thaihu aruem oen athaai aka sat oen lo u,” a tina.
Nazaret ah Jesuh Hinyah U Nawh
(Mk. 6:1-6; Lk. 4:16-30)
53Jesuh lawng thuidoetna he a thui boeih coengah, te huen te a ceh taak tih, 54Amah awmna Nazaret la meel koep. Sinakok ah a cang puei tih ahih kah awl aka ya thlaang boeih a kawpoek rai u. “He ang cuihna he me kah a huh kai? He ang kawpoekraina he metila a sai thai kai?” tila te doet u patoeng. 55“Ahih he lettama capa nawh aw? Meri he ahih kah a manu nawh aw? Jeem, Josep, Simon oen Judah he ahih kah a manau thli nawh aw? 56He kah aka awm he a ngannu thli nawh aw? He ang thaihu boeih he me kah a dang kai?” ti u. 57Tedawngah ahimi lawng Jesuh te hinyah u nawh. Jesuh lawng ahimi te, “Tawngha tah amah awmna khawpui oen a imkhuikaw nawh atah huen tloe boeih ah a hinyah u,” a tina.
58Metihtiah ahimi lawng oengna a khueh nawh dawngah Jesuh lawng te huen ah kawpoekraina yahawh sai nawh.
Matu Chin New Testament © Bible Society of Myanmar, 2006.
