Ohuchaaka 12
12
Nasaae alaanga Abburamu
1 #
Biho 7:2,3; Abaib 11:8. Bulaanu, Omwaami yaboolera Abburamu ati, “Leha esyaalo syao, abeeho bao, edaala lya lataao, ochie mu syaalo si njia ohuhweekesa. 2Njia ohuhuberesa abeechuhulu baangi; bachia ohutulamo esyaalo sihoongo. Njia ohuhuberesa ehabi, mani hole eliita lyao libe ehunuufu. 3#Gal 3:8.Njia ohuberesa ehabi abo abahuba ehabi, haandi oyo ohubwaaba njia ohumubwaaba. Enja chohu syaalo choosi chichia ohunyoola ehabi ohubitira mu ewe.”
4Abburamu yachia yaahola koti Omwaami yamuboolera ohuhola; Loti yesi yachia nae. Abburamu yali neende emyaaka amahumi kataanu-na-kabiri neende kitaanu eky'obuhuluundu ebiha biyatulira mu Harani. 5Abburamu yabukula Sarai omuhasi wae, alala neende Loti omwaana wa mwaanang'ina, neende emyaandu kyaabwe kyoosi ki bali banyoola, neende abawaambe ba bali banyoola mu Harani, mani nibasiingira nibachia mu loba lya Kanani. Niboola mu Kanani, 6Abburamu yahalakania mu syaalo esyo yoola Abuundu Woolerefu alaangwa Sekemu, eyiri omusaala muhoongo kwa Moore. Esiha esyo, Abakanani nibo abali nibamenya mu syaalo esyo. 7#Biho 7:5; Gal 3:16.Omwaami yabonehera Abburamu yaamuboolera ati, “Njia ohuberesa eloba lino abeechuhulu bao.” Abburamu mani niyoombahira Omwaami alutaari abuundu yi yamuboneramo ao. 8Ebyo nibyawa, Abburamu yeehirira yaachia emwaalo w'esyaalo sy'ebigulu esiri ebukwe w'esiko sya Bbeteli mani yeemeha eyeema lyae akatikaati wa Bbeteli nisiri emuumbo nae Ai nisiri ebukwe. Abuundu ao wosi yoombahao alutaari, mani niyeenamirao Omwaami. 9Abburamu yemeeda ohukeenda n'achiira olwaande lw'emwaalo w'esyaalo sya Kanani.
Abburamu naali mu Misiri
10Bulaanu, enjala ya amaani yakwa mu syaalo sya Kanani, Abburamu yeehirira ohwemeeda emwaalo naachia Misiri ohweyikamayo. 11Abburamu niyali aambi ohuhalakania olwaaho yeengire mu Misiri, yaboolera Sarai omuhasi wae ati, “Manyire endi oli omuhasi oboneha bulai muno. 12Abamisiri nibanahubonaho, bachia ohumanya sa bati oli omuhasi waange. Mani bachia ohuunjita, naawe bahulehe obeeo omulamu. 13#Huc 20:2; 26:7.Baboolere oti oli mboocho yaange; mani hulwao, obulamu bwaange buchia ohuwona haandi bachia ohuunjira bulai.” 14Abburamu yeengira mu Misiri, Abamisiri baabona koti lu muhasi wae oyo yali naaboneha bulai muno. 15Abahunuufu baandi abomu dooho lya omutuki wa Misiri nibamubonaho, bamufumia muno eyiri omutuki wa Misiri koti lu omuhasi oyo yabonehana bulai muno, mani nibamuyira mu dooho ly'omutuki wa Misiri. 16Sarai yakera, omutuki wa Misiri yaayira Abburamu bulai muno. Omutuki wa Misiri yaaberesa Abburamu amakoondi, eng'oombe ndaawu, esuhiri esaacha, abawaambe basaacha, abawaambe bahasi, esuhiri ehasi, neende engamia.
17Nae olwohuba omutuki wa Misiri yayira Sarai omuhasi wa Abburamu yaaba omuhasi wae, Omwaami yaambia omutuki wa Misiri neende ab'enyuumba yae boosi obulwaae bubi. 18Omutuki wa Misiri yalaanga Abburamu yaamuteeba ati, “Wuholere siina syeene sino? Lwasiina otamboolere oti, wuno muhasi wao niye? 19Lwasiina wamboolera oti, ‘Wuno ni mboocho yaange niye,’ waakera ndaamuyira yaaba omuhasi waange? Mani bulaanu nguyo, yira omuhasi wao, mubukule mani mumbweere-eyi.” 20Omutuki wa Misiri yalagira abasaacha bae bagoobe Abburamu neende Saara omuhasi wae, alala neende buli siindu syae syoosi, batule mu syaalo syae.
©Bible Society of Kenya, 2019
©Bible Society of Uganda, 2019
