Matio 10
10
Cecoc otarotakana e mitato acitc niciritci
(Natawapata kaie Mark 3.13-19; Luc 6.12-16)
1Cecoc ki wicamew owitcewakana e mitato acitc niciritci kitci pe natawapamikotc. Ki mirew mackawisiwiniw kitci kackitaritci e matceticohwaritci matci manitowa kaie kitci ki kikeharitci kaskina iriniwa ka akosiritci, kotc e itapineritci. 2Ekoni e icinikasorispana anihi otarotakana#10.2 otarotakana: Kekotc: onapotema. e mitato acitc niciritci: nictam anahwe Simo icinikasopan (Pien, arica e icinikatakaniwispan), kaie anihi ocima Atre. Kotak anahwe, Cak icinikasopan, kaie ocima, Jean (e niciritci anihi Zébédée okosa). 3Kotakihik: Pirip,#10.3 Pirip: Philippe Barthélemy, Toma#10.3 Toma: Thomas kaie Matio, anahwe ka natockakespan; minawatc Cak (Alphée okosa), acitc Thaddée; 4kiapatc kotak, Simo (“Anahwe aka ka naheritak kitci tiperimikotc kice okimawa” ka icinikatakaniwispan),#10.4 “Anahwe aka ka naheritak kitci tiperimikotc kice okimawa” ka icinikatakaniwispan: Mia itemakan e emitikociwictek: Simon le nationaliste. Nama ki otci mireritamotake anahwe Simo cota iriniwok kitci tiperimikotcik Romain kice okimawa. kaie Judas Iscariote, anahwe ke pakiterimatc Cecoca.
Cecoc e iciticohwatc owitcewakana kitci nta tipatcimoritci
(Natawapata kaie Mark 6.7-13; Luc 9.1-6)
5Cecoc ki iciticahwew anihi mitato acitc nicw iriniwa kitci pa tipatcimoritci, kirika ki witamawew ke itotiskeritci, e itatc: “Akawir nte pa icakw itekera ka ici taciketcik aniki aka ka cota iriniwitcik kaie akawir pitakekw otenaskak Samarie askik. 6Israël iriniwok kirawe natawapamakok, mia maritcenicak ka onicikik e iteritakositcik. 7Pa icaiekwe, ki ka kakeskwanawaw kitci aiteiekw: ‘Aci peconakoniw Kice Manito Okimawin!’ 8Kikehakok ka akositcik. Apitcipahakok ka nipotcik. Mirwatisihakok iriniwok ka omikiwapinetcik. Matceticohwakok matci manitowok. Nipara aci ki ki cawerimikowinawaw. Nipara kaie ki ka caweritcikanawaw. 9Akawir mawotcitakw coria, nama kaie osawo coria kekotc comarike. 10Akawir matcewitakw mackimotai, kaie kotak kipapakiwaniwaw. Akawir matcewitakw maskisin kaie askohon. Acteriw meka otamiro iriniw kitci acamakaniwitc.”
11“Takociniekwe otenak kekotc otenacik, nantowapamakw awik ke mireritak kitci pitakahitakw. Ekota neta omikiwamik ke ici tacikeiekw, nac kitci nakatamekw anihe otenaw. 12Pitakeiekwe mikiwamik, ki ka itawawok aniki neta ka taciketcik: ‘Pekaterimokw!’ 13Kecpin mireritakawe kitci tacikeiekw, tapwe kata pe otitikowok kitci pekaterimotcik. Kecpin aric aka mireritakawe, ki ka maninamowawok ka ki itekok kitci pekaterimotcik. 14Kecpin peikw mikiwamik kekotc ma otenak aka ici mireritakawe iriniwok kitci tacikeiekw kekotc aka wi natotakoiekwe, ki ka orowinawaw neta. Ki ka powiparitanawaw kimaskisiniwaw e mirikosiwok.#10.14 Ki ka powiparitanawaw kimaskisiniwaw e mirikosiwok: kitci kiskeritakik kecko kekociciriw kitci otitikotcik, osam aka e mireritcikaterik e aitotisketcik. 15Tapwe ohwe ka witamatakok: takociparike anihe ke kicikak kitci tipaskonikaniwok, aniki neta otenak ka taciketcik aka ke mireritakik kitci tacikeiekw kirawe wirawaw mictahi kata anwerimakaniwiwok patok aniki weckatc ka matci iriniwiwaspan ka tacikewaspan neta otenak Sodome kirika Gomorrhe.”
Ke ici nekatcitakaniwok
(Natawapata kaie Mark 13.9-13; Luc 21.12-17)
16“Natotamokw! E iciticohotakok kitci pa tipatcimoekw, mia maritcenicak e pimotetcik nte e ici taritci mahikana ki ka iteritakosinawaw.#10.16 Wi itetake: Ki ka iciticohotinawaw ke ici tatcik iriniwok ke wi matci totatakok, ke wi akohitakok. Aiekwamisikw#10.16 Aiekwamisikw: Peikon kata ki ici nisitotakon: e asitci kakitaweritakik. tca, mia kinepikok e aiekwamisitcik kitci itotiskeiekw. Pekatisikw kaie, mia omemewok e asitci pekatisitcik. 17Aiekwamictowakok atita iriniwok. Ki ka meka iciwirikowawok tipaskonike irinik kitci tipaskonikoiekw, kaie ki ka pasakactehikowawok otaiamihe mikiwamiwak. 18Osam e nosanehwiekw, ki ka iciwirikowinawaw okimawok kirika kice okimawok ka ici taciketcik, kitci ki tca tipatcimoctawekok aniheriw ka ici kiskeritamekw, kirika kaie wirawaw kotakihik iriniwok aka ka cota iriniwitcik kitci tipatcimoctawaiekok. 19Iciwirikoiekwe tipaskonikewikamikok, akawir arimeritamokw e mamitoneritamekw ke ki iteiekw, kaie ke ici aiarimweiekw. Ki ka mirikowinawaw mia ke aiteiekw ani apitc. 20Namaiew ni kirawaw tipirawe ke aiarimweiekw. Kotawiwaw Omiro Manitoma ki ka mirikowaw aniheriw mia ke aiteiekw.”
21“Atita iriniwok kata pakiterimewok tipirawe octesiwawa kitci nipahakaniwiritci. Peikon atita ke totawatcik tipirawe onitcaniciwawa. Matci atita awacak kata wepakonewok onikihikowawa, nac kata itotiskewok kitci nipahakaniwiritci. 22Kaskina awik ki ka cikerimikowaw, osam e nosanehwiekw. Aric anahwe mocak ke sokikapowitc, aka ke pakiteritak e asperimototawitc nac kaskina ke ickwaparinik, kata akwacimakaniwiw. 23Kecpin nekatcihikoiekwe peikw otenak, ocimokw, kotak otenak icakw. Tapwe ohwe ka witamatakok: nama moci ki ka ickwa tipatcimonawaw Mirwatcimowin kaskina otenaskak Israël askik epwamoci takocik anahwe Ka ki pe iriniwihitisotc.”#10.23 Ka ki pe iriniwihitisotc: Arimomitiso ota Cecoc.
24“Nama otci peikw ka kiskinohamasotc kirawe kicteritakosiw patok anihi ka kiskinohamakotc. Nama kaie otci peikw arotakan kirawe kicteritakosiw patok anihi ka tiperimikotc. 25Tipi iteritakoniw anahwe ka kiskinohamasotc nikotin kitci iteritakositc mia anihi ka kiskinohamakotc, peikon anahwe arotakan kitci iteritakositc mia anihi ka tiperimikotc. Nin, mia ka tiperitak e peikotenwesinaniwok nit iteritakosin. Ni ki marerimikowin ka icinikatikoian ‘Béelzébul, anahwe ka tiperimatc matci manitowa.’ Kirawaw tca ka tiperimitakok, kirawe awocamec ki ka marerimikowinawaw!”
Anahwe ka acterik kitci koctakaniwitc
(Natawapata kaie Luc 12.2-7)
26“Aka koctakok iriniwok ka cikerimitakok. Kaskina ka katakaniwok kata nokotakaniwon, kaie kaskina aka ka kiskeritcikatek kata kiskeritakon. 27Anihe ka ititakok nte e ici kiski tipiskak, wawitamokw e waseak e kicikak kaskina awik kitci petak. Kaie kekocic kimotc e petakeiekw, tepitepwekw okitc mikiwamik e wawitamekw. 28Aka koctakw awik ke ki nipahitakw. Kackitaw meka kitci nipatatc owiawiriw iriniwa, nama aric ki nipahew otcitcakociriw. Kirawe ki ta koctawaw Kice Manito. Enko na ke ki iterimatc awiriw ke apitc niporitena owiawirik kaie otcitcakocirik itekera nete atamaskamikok. 29Ki kiskeritenawaw e atawaniwok nicw pirecicak, peikw comarike itakitakosiwok, taina? Nama aric otci peikw neta e tacitcik kata pakicin motcik askik aka kitci kiskeritak Kotawiwaw Kice Manito. 30Kirawaw tca, e apitc miro kiskerimitakw kaie e apitc miro nakatawerimitakw, wawatc kiskeritam tan e tatinik kirisisiwariw. 31Akawir tca koctatcikw. Tato nta e taciekw kirawe kicteritakosiw patok pirecicak e mitcetitcik!”
E nosanehwakaniwitc Cecoc kekotc e wepakonakaniwitc
(Natawapata kaie Luc 12.8-9)
32“Kecpin awik aka cakwerimote kitci witak e nosanehwitc, kotakihik iriniwok e petakik, kaie nin ni ka tipatcimowan Notawi e petak, wakwek ka taciketc, nin e tiperimak anahwe iriniw. 33Kecpin aric awik itete aka e kiskerimitc, kotakihik iriniwok e petakik, kaie nin ni ka itwan, e petak Notawi wakwek, ‘Nama ni kiskerimaw anahwe iriniw.’”
Wetci ki pe icatc Cecoc
(Natawapata kaie Luc 12.51-53; 14.26-27)
34“Akawir iteritamokw, wetci ki pe icaian ota askik, pekateritamowin kitci petaian.#10.34 pekateritamowin kitci petaian: Pot wi itemakanotake: kitci ki miroparihitotcik kaskina iriniwok ota askik ka taciketcik. Nama! Ni ki pe ican kitci papikanitotcik iriniwok.#10.34 kitci papikaninitotcik iriniwok: Pot wi itemakanotake: Nin otci kata matciparihitonaniwon. Ni ki pe ican kitci kiskeritakik iriniwok ke apitc nosanehwiwakwen kekotc nama, tan pitoc e ici mirwacinik kaie e ici maratanik. 35Ni ki pe ican kitci matciparihitotcik iriniw kirika otawiwa, minawatc ickwecic kirika okawiwa, matci kaie iskwew kirika osikosa. 36Atita kata cikerimikowok tipirawe otcirowemakaniwawa, osam e nosanehwitcik.”
37“Awik kirawe ka sakihatc otawiwa kekotc ma okawiwa patok nin e asitci sakihitc, nama tipi iteritakosiw nitirinim kitci iterimak. Anahwe awik kaie kirawe ka sakihatc okosa kekotc ma otanisa patok nin e asitci sakihitc, kaie wir nama tipi iteritakosiw nitirinim kitci ki iterimak. 38Peikon anahwe aka ka miwiratc otcipaiatikoma e tca nosanehwitc, nama tipi iteritakosiw nitirinim kitci ki iterimak. 39Anahwe tepirak ka iteritak kitci kanaweritak ota askik opimatisiwin, kata onitaw. Aric anahwe ke pakiteritak opimatisiwin nin e nosanehwitc, kata mirakaniwiw kitci kiwe pimatisitc.”
Ke cawerimakaniwitcik
(Natawapata kaie Mark 9.41)
40“Kotc ko awik e miro mihitakw, kaie nin ni miro mihikw. Anahwe tca ka miro mihitc, miro mihew kaie anihi ka ki pe iciticohwitc. 41Anahwe ka miro mihatc iriniwa ka pe nikan tipatcimoritci, osam e nikan tipatcimoritci, kata pe otitiko aniheriw ka ki ici kackitamatisotc, mia kaskina ka nikan tipatcimotcik e ici kackitamatisotcik. Anahwe kaie ka miro mihatc iriniwa mocak ka nosanehwaritci Kice Manitowa, osam mocak e nosanehwaritci Kice Manitowa, kata pe otitiko aniheriw ka ki kackitamatisotc, mia kaskina mocak ka nosanehwatcik Kice Manitowa e ici kackitamatisotcik. 42Tapwe ohwe ka witamatakok: anahwe ka minihatc peikw e taciritci nitirinima aka e kicteritakosiritci, wawatc tepirak peikwo orakan nipiriw e mirwakaminik, osam niwitcewakana e iteritakosiritci, kata pe otitiko aniheriw ka ki ici kackitamatisotc.”
Canadian Bible Society, 2014
