Mateo 4
4
Abosiami ka Yesu
(Marko 1.12-13; Luka 4.1-13)
1Kɛkɛ nɛ Mumi ɔ ngɔ Yesu kɛ ho nga a nɔ ya konɛ abosiami ya ka lɛ. 2Nɛ benɛ e ha hwɔ nyɔ kɛ pia ligbi nyingmi eywiɛ ɔ, lɔ ɔ se ɔ hwɔ ye lɛ. 3Nɛ nya tsɔlɔ ɔ ba e ngɔ ba de lɛ ke: “Ke Mawu bi ji mo ɔ, de konɛ tɛ nɛ ɔmɛ nɛ plɛ abolo.” 4Se Yesu he nɔ ke: “A ngma ke: ‘Pi abolo kɛkɛ nɛ haa nɔmlɔ yi naa wa; se mohu munyu tsuaa munyu nɛ jee Mawu nya mi ɔ.’ ”
5Kɛkɛ nɛ Abosiami ɔ ngɔ lɛ kɛ ya ma klɔuklɔu ɔ mi, nɛ e kɛ lɛ ya da sɔlemi we ɔ yi mi ploplooplo, 6nɛ e de lɛ ke: “Ke Mawu bi ji mo ɔ, ngɔɔ o he ngɔ fia si; ejakaa pa ngma ke:
‘O he ɔ, Mawu ma fa e bɔfo ɔmɛ nɛ a maa hɛɛ mo
ngɛ a dɛ mi, konɛ o nane ko si tɛ ko.’ ”
7Yesu de lɛ ke: “A ngma ekohu ke: ‘Koo ka Nyɔmtsɛ o Mawu ɔ!’ ”
8Jeha nɛ ɔ bosiami ngɔ lɛ kɛ ho yoku kpetekpleenyɛ nɛ ya hiɔwe ko nɔ ya nɛ e ngɔ je mi matsɛ yemi hehi tsuo kɛ a nyami ɔmɛ ngɔ tsɔɔ lɛ; 9nɛ e de lɛ ke: “Ma ngɔ enɛ ɔmɛ tsuo ha mo, ke o kpla si nɛ o ja mi ɔ.” 10Kɛkɛ nɛ Yesu de lɛ ke: “Jee ye nɔ, Satan! ejakaa a ngma ke: ‘Nyɔmtsɛ, o Mawu ɔ, o ja, nɛ lɛ kɛkɛ o sɔmɔ!’ ”
11Keke nɛ abosiami si lɛ, nɛ oʼɛ, hiɔwe bɔfohi ba nɛ sa ba sɔmɔ lɛ.
Yesu je e nitsumi sisi ngɛ Galilea
(Marko 1.14-15; Luka 4.14-15)
12Benɛ Yesu nu kaa a nu Yohane ɔ, e pue nɔ kɛ ho Galilea ya; 13nɛ e je Nazaret kɛ ba hi Kapernaum nɛ ngɛ wo nya a, ngɛ Zebulon kɛ Naftali ni ɔmɛ a mi; 14konɛ gbalɔ Yesaia munyu ɔ nɛ ba mi ke:
15“Zebulon zugba a kɛ Naftali zugba a nɛ ngɛ wo
nya blɔ ɔ, ngɛ Yordan se ɔ, majemajali a
Galilea a,
16Ma nɛ hii si ngɛ diblii mi ɔ na la kpetekpleenyɛ,
nɛ ninɛmɛ nɛ hii si ngɛ gbenɔ zugba kɛ e hɔ́ ɔ
mi ɔ, la te si ha mɛ!”
17Kɛ je jamɛ a ligbi ɔ, Yesu bɔni fiɛmi nɛ e ke: “Nyɛɛ kpale kɛ je nyɛ blɔ yaya amɛ a nɔ. Nyɛ tsake nyɛ tsui, se hiɔwe matsɛ yemi ɔ su si haa.”
Yesu tsɛ wohɛli eywiɛ
(Marko 1.16-20; Luka 5.1-11)
18Se benɛ Yesu ngɛ si kpae ngɛ Galilea wo ɔ nya a, e na nyɛmimɛ enyɔ, Simon nɛ a tsɛɛ lɛ Petro, kɛ e nyɛmi Andrea nɛ a ngɛ hɛe ngɛ wo ɔ mi, ejakaa wohɛli ji mɛ. 19Nɛ e de mɛ ke: “Nyɛ ba nyɛɛ ye se nɛ ma pee nyɛ nimli a hɛli.” 20Nɛ amlɔ ɔ a si a ya amɛ, nɛ a ba nyɛɛ e se.
21Ne benɛ e je lejɛ ɔ kɛ yaa a, e na nyɛmimɛ kpa enyɔ kome, Zebedeo bi Yakobo kɛ e nyɛmi Yohane kɛ a tsɛ Zebedeo ngɛ lɛ mi nɛ a ngɛ a ya amɛ dlae; nɛ e tsɛ mɛ. 22Nɛ amlɔ ɔ mɛ hu a si lɛ ɔ kɛ a tsɛ ɔ nɛ a ba nyɛɛ e se.
Yesu nitsɔɔmi, e fiɛmi kɛ e nɔtsami
(Luka 6.17-19)
23Nɛ Yesu kpa Galilea tsuo, e tsɔɔ ni ngɛ a kpe he ɔmɛ, nɛ e fiɛ matsɛ yemi ɔ he Sane Kpakpa a tsɔɔ, nɛ e tsa hiɔ tsuaa hiɔ kɛ he hiami tsuaa he hiami ngɛ ma a mi. 24Nɛ e he sane gbɛ fia Siria tsuo, nɛ a kɛ nihi nɛ be saminya nɛ hiɔhi kɛ piimi slɔɔtohi hɛɛ mɛ kɛ nihi nɛ mumi yayamihi ngɛ a mi kɛ godotsɛmɛ kɛ nihi nɛ a gbɔjɔ ba e ngɔ nɛ e tsa mɛ. 25Nɛ nihi fuu je Galilea kɛ Decapoli kɛ Yerusalem kɛ Yudea kɛ Yordan se nyɛɛ e se.
Dangme New Testament © United Bible Societies, 1977.
