Maqtaeq 7
7
Aqcawq-anr Yarkhaq Taqdar
Lk 6:37-42
1“Aqcawq, nawmaf-anr yarkhaq maqya darni, nawmaf khawf aqcawq-anr yarkhaq taqdar. 2Aqjeq mirnae aernar-aq, nawmaf, aqcawq-anr yarkhaq dar-eu lof-aer, aqcawq khawf, nawmaf-anr darlar taef-a. Nawmaf, aqcawq-anr paeqnaeq savnaeq-euq lof-aer, aqcawq khawf, nawmaf-anr paeqkhof savkhof naeqlaf taef-a. 3Aqjeq mirnae, nawq-euq myavnuiv-euq lafkhoer, pyaqdmq anr-eu gar maq sharsawx-aer, nawq-euq aqyuif aqnyir-euq myavnuiv-euq lafkhoer anr-eu myavpawf-anr hawluf-eu le? 4Nawr, yawqha-euq myavnuiv-euq lafkhoer pyaqdmq anrluf-eu khawf, nawq-euq aqyuif aqnyir-anr, ‘Ngar, nawq-euq myavnuiv-euq lafkhoer anr-eu myavpawf paevdovnaeq nyar’ laer, aqjox-aer aernaeq nya-eu le? 5Yawmuiq janrgeuf-eu tsawrhaq-or! Nawq-euq myavnuiv-anr anr-eu pyaqdmq jeqhu ngawqdzae-awq. Khoernar-aq, nawq-euq aqyuif aqnyir-euq myavnuiv-euq lafkhoer anr-eu myavpawf aqjox-aer paevdov-eu paq nga laer, nawq-anr mawrduqlar taef-a.
6“Yawshawr jeq aqkuiq-anr taq bifnaeq. Arcar carkhawf-euq saer khawf, aqzaf-euq maeqshi taq dzaenaeq. Maqngeur nar-aq, aqyawfmaf, aqkuir nae nawqpanq-awr, ghofdmr dzaelar-awr nawmaf-anr kawfpav kawfshav lar-eu baw-mr.
Shar-awr, Pov-awr, Khov-awq
Lk 11:9-13
7“Shar-awq, shar nar-aq za taef-a. Pov-awq, pov nar-aq mawrle taef-a. Khov-awq, khov nar-aq nawmaf-anr pannaeqlaf taef-a. 8Aqjeq mirnae aernar-aq, kharshar-eu tsawrhaq-aq za-awr, pov-eu tsawrhaq ya’mawr-eu uqtaf, larghov-anr khov-eu tsawrhaq-anr khawf pannaeq taef-a.
9Nawmaf-euq lafkhoer, yawqha-euq zaq kaqmur shar-eu gar, aqyawf-anr khaqlo bifnaeq-eu aqsur ghaq jawr-eu le? 10Maqngeur nar-aq, ngaqshaq shar-eu gar aqyawf-anr arlawr nyaef naeq-eu tiqghaqnav jawr ma laq? 11Nawmaf, tsawrdoer pyeuf-eu khawf, yawqha-euq zaq-anr yawmuiq jeq bif-eu siqnya-eu mae. Khoernav maqtser, mq-euq khoertav jawr-eu nawmaf-euq Aqda-aq, aqyawf-anr kharshar-eu tsawrhaq-anr yawmuiq jeq arnavni par bifnaeq nmr-mq? 12Khoermirnae, aqcawq nae nawmaf-anr kharbi janrnaeq mawf-eu lof-aer, nawmaf, aqcawq-anr khoerlof-aer janrnaeq-awq. Aqjeq mirnae aernar-aq, heu-aq, zanrdawq hawr-eu Miqyaer gharduq ngaeqdan-eu deuq-euq dawq-anr tsaq-eu mae.
Ghovkhaeq Yawsuf
Lk 13:24
13“Nawmaf, ghovkhaeq yawsuf-anr urler-awq. Aqjeq mirnae aernar-aq, cawv-ir-eu paw ir-eu garma-aq, jerloni ghae-awr, ghovkhaeq ghawqloeni danr-eu mirnae, urler-eu tsawrhaq ghawqmya’ni jawr-eu mae. 14Aerkhawf, daef-eu jeq jav-eu gar le-eu garma-aq, shaq-awr, ghovkhaeq khawf yawsuf mirnae, povmawr-awr urler-eu tsawrhaq yawcuiv mae.
Arbawr Hawr-eu Arsiq
Lk 6:43-45
15“Nawmaf, Miqyaer gharduq ngaeqdan-eu jaqmyawf deuq-anr yanr-awq. Aqyawfmaf, lafnyir paw yawrzaq-euq bawkhov tsanrkaq taq-awr, lafkhoer paw-aq, zawr zir-eu khaqyaer pyeuf-awr nawmaf jawr-eu gar lar-eu mae. 16Aqyawf maf-euq arsiq-anr haw nar-aq, aqyawf maf-anr siqnya taef-a. Aqgan bawduv-anr nae aqgaf arsiq yapyav mae lor? Aqgan arbawq-anr siqguq arsiq yapyav mae laq? 17Khoerlof-aer durni, arbawr yawmuiq dawqtawvluf arsiq yawmuiq siqle-awr, maqmuiq-eu arbawr-aq, maqmuiq-eu arsiq siqle-eu mae. 18Arbawr yawmuiq-anr nae maqmuiq-eu arsiq maq siqle nya-aer, maqmuiq-eu arbawr-anr nae arsiq yawmuiq maq siqle nya-a. 19Arsiq yawmuiq maq siqle-eu arbawr yawqbawr navluf-anr turdzae-awr, miqdzaq-anr bafpuiv taef-a. 20Khoermirnae, tsawrhaq khoerdeuq-euq arsiq-anr haw nar-aq, aqyawf maf-anr siqnya taef-a.
Ngar, Nawmaf-anr Maqsiq
Lk 13:25-27
21“Ngaq-anr, ‘Sanqpaq-or! Sanqpaq-or’ laer kharkur-eu tsawrhaq yawqghaq navluf-aer, mqtav mirkhanq-anr ya urler-eu maqngeur-a. Mq-euq khoertav jawr-eu ngaqDa nuima tsaqni mr-eu tsawrhaq deuq taef-aer ya urler-eu mae. 22Khoerngae nan, tsawrhaq ghawqmya’ni, ngaq-anr heulof-aer aerlar taef-a, ‘Sanqpaq-or! Sanqpaq-or! Nga’maf, nawq-euq tsawrmyanr-anr ghoe-awr Miqyaer gharduq ngaeqdan-awr, nawq-euq tsawrmyanr-anr ghoe-awr naef-anr taedov-euq uqtaf, nawq-euq tsawrmyanr-anr ghoe-awr zanqler paq-aer ghae-eu ghawqmya jeq mr-euq maqngeur-a lor?’ 23Khoerngae, ngar, aqyawf maf-anr heulof-aer aernaeq ma, ‘Zanrdawq-anr leur-eu jeq mr-eu tsawrhaq-or! Ngar, nawmaf-anr maq siqnya nya. Ngar jawr-eu gar nae dov-ir-awq.’
Nymr Tsov-eu Nyiq Jeq
Lk 6:47-49
24“Khoermirnae, ngar maeq-eu dawq heudeuq gaq-awr mrcaw-eu aqsur ghaq maqkaq, khaqlo-euq khoertav zeurdanr danr-awr nymr tsov-euq zaqsiq tsawrganr anr-eu tiq ghaq-anr dur-eu mae. 25Uqyaer yaerle-awr, irjeuq jeuqle-eu uqtaf, jaqlaer bawlar-awr ciqtanq ciqtuv lar-eu khawf, nymr khoernymr, khaqlo-euq khoertav tsovtaq-euq mirnae maqcoq-ir-aq.
26“Ngar maeq-eu dawq heudeuq gaq-euq khawf maq mrcaw-eu aqsur ghaq maqkaq, kharshuif-euq khoertav nymr tsov-euq aqdzawq argan tiq ghaq-anr dur-eu mae. 27Uqyaer yaerle-awr, irjeuq jeuqle-eu uqtaf, jaqlaer bawlar-awr ciqtanq ciqtuvlar ngae, nymr khoernymr coq-ir-awr, coqpyav coqshav jir-euq mae.”
28Yeqsur khoerlof-aer maeqnaeq tsovnaeqghaq ngae, aqyawf nae maeq-awr tsov-euq gar yagaq-euq tsawrhaq dawqtawvluf zanq duidui ler-euq mae. 29Aqjeq mirnae aernar-aq, Yeqsur-aq, zanr maeq-eu deuq lof-aer maqngeurni, aryaq jav-eu tiq ghaq lof-aer maeqnaeq tsovnaeq-eu mae.
2018 ©
Bibles International ®
The Bible Society of Baptist Mid-Missions
