Cɑ̈gø 17
17
Ngølø, A Bɑ Ngïji Lwöbø
1Keny-ɑ ɑ́göög runni Abrɑm ki pyɑ̈r ɑ́bïngwen wïdɑ́bïngwen, kɑ Jwøng-ɑ Ácwɑ̈ɑ̈j ocwöbø kì bøle, ɑkööbe kinni, “Bene yɑn Jwøk Áyïmø. Lïngí kwøbbɑ, kɑ yï gøggí dyër. 2Kwøbbee ónywɑg yi wɑ, o yï ógwøg yi yɑn yïn ɑ́ kweyi ji mø ngenyø.” 3Codhe, kɑ Abrɑm ree bøødhe wïje kuule’ piny. Aköbbii yi Jwøk kinni, 4“Møgɑ ɑ köbbɑ yïn dicyɑ̈ɑ̈ng èn, pɑ wil yi yɑn, yï ógwøg yi yɑn yïn ɑ́ wïyi jurrì mø gïïr. 5#Röm 4.17 Nyingí kinni Abrɑm ceg yi yɑn kɑ wilø ɑ́ Abrɑhɑm,#17.5 Abrɑhɑm: Nyingɑni lïngi nɑ “Wïyi Pödhh” ki dhøg Ibru mɑ́ yï gwøgɑ’ gwøgø yïn ɑ́ wïyi jurrì mø gïïr. 6Yï ónëngɑ ki kwɑrr mø gïïr. Ódi rɑ̈nhì møg-ɑ ókɑ̈ɑ̈l rií.
7 #
Lk 1.55
“De kwøbbee ceg kɑ rebø yi wɑ; yïn wuki kwɑrrí kì tuung, kí yɑn kì tung-ɑ kyeelø, cɑg ɑnɑn ceth gïti ɑtheer, Yɑ óbëëdø yɑn ɑ́ Jwøgí, o Yɑ óbëëdø yɑn ɑ́ Jwøøg kwɑrrí. 8#Gwøg 7.5 Wu bëëd ɑ piny Kɑnɑɑn ɑnɑn, wu nɑ wëdhh, de piny men bëne mëggɑ’ yïn, wuki kwɑrrí gïti ɑtheer. O yɑ ógöögø yɑn ɑ́ Jwøøg kwɑrrí.”
9Codhe, kɑ Abrɑhɑm köbbi yi Jwøk kinni, “Yïn, wuki kwɑrrí, mïdhi wun møg-ɑ ɑ́nywɑg yi wɑ dicyɑ̈ngtïn ceth, ge ko wiy wun gïti ɑtheer. 10#Gwøg 7.8; Röm 4.11 Yïëëy wuki kwɑrrí ki ngøli ji møg-ɑ bɑ cwøw bënn kì kelli wun. 11Ngøl wun ceth, ɑ́ nyuudhi kinni wu ɑ́yïëy ki cyɑ̈dhø kì kömi kwøbb-ɑ ɑ́nywɑg yi wɑ. 12Cɑg ɑnɑn ceth, keløg nyel-ɑ jɑlø pɑ̈dh-ɑ piny, ngøl ceth kì bïdɑ̈ɑ̈g cyɑ̈ng. Ji møg-ɑ nywøl kì gølí, kí bɑ̈ngg-ɑ ngew gɑ tyëngpɑth, ngøl gen. 13Ngøl gen bënn, gen ɑ møg-ɑ nywøl kì gølí ki møg-ɑ ngew. Keny-ɑ óbëëde kinøw møg-ɑ ɑ́nywɑg yi wɑ ónënni ɑ́ ngïji kì dëlli wun; ngïji me pɑ lɑ̈ɑ̈ny gïti ɑtheer. 14O keløg e dɑ jɑlø me nuti ngølø, pɑ kwɑɑn kelli jiɑ, mɑ́ kwøbb-ɑ ɑ́nywɑg yi yɑn ki wun nuti mïdhø yi en.”
15Abrɑhɑm ɑ́köbbi yi Jwøk kinni, “Nyingi cyëgí ko cwøl ɑ́ Sɑrɑy këti, cɑg ɑnɑn, nyinge ócwøl ɑ́ Sɑrɑ̀.#17.15 Sɑrɑ̀: Nyingɑni wɑng-ɑ nyirɑ̈dh ki dhøg Ibru. 16Ógyëdh yi yɑn kɑ yï nëngɑ ki wɑ̈d kì ree. Sɑrɑ̀ óbëëd ɑ́ meyi jurrì mø gïïr. Rɑ̈nhì møg-ɑ ójɑɑg jurrì ókɑ̈ɑ̈l-ɑ ree.”
17Kɑ Abrɑhɑm ree bøødhe wïje kuule’ piny. Kɑ óngedhø, ɑkööbe ki pyëwe kinni, “Jɑlø ócuggø nywølø ki nyir, e runne bɑ miyø? Wɑlɑ̀ Sɑrɑ̀ ócuggø yïddø ki dhɑnhø, e runne bɑ pyɑ̈r ɑ́bïngwen?” 18Kɑ Abrɑhɑm Jwøk pyëje kinni, “Ede Icmɑil ɑ pɑ wiyí, o bëëde ɑ́ ngɑn-ɑ ólɑg jɑmmɑ?”
19Alöggi Jwøng-ɑ Ácwɑ̈ɑ̈j kinni, “Bɑ Sɑrɑ̀ cyëgí, ɑ ónyöddi yïn ki wɑ̈d, kɑ nyinge ócɑɑg ɑ́ Isɑɑk.#17.19 Isɑɑk: Nyingɑni wɑng-ɑ “óngedhø” ki dhøg Ibru. O kwøbbi wøn óthuunh wøn ki en geki kwɑrre kì bɑnge gïti ɑtheer. 20O keløg ɑ́ per Icmɑil, gïn-ɑ ɑ́kwɑjji yi yïn kipere ɑ́løøg yi yɑn. Ógyëdh yi yɑn kidyër, ónywøl kɑ óngënyø ki mendwøng. Óbëëd ɑ́ wïyi jɑgg pyɑ̈rø wïdɑ́ryew. O ógwøg yi yɑn ɑ́ pödhø me dwøng. 21De kwëng møg-ɑ ɑ́köbbɑ yïn ying-ɑ kömi Isɑɑk, nyel-ɑ ónywøl yi Sɑrɑ̀ piny nɑ men run-ɑ óbï.” 22Keny-ɑ ɑ́rum Jwøk ki kwøb geki Abrɑhɑm, ɑdhwödhe kì buti Abrɑhɑm kɑ kedh-ɑ mɑl.
23Codhe, kɑ Abrɑhɑm wɑ̈de Icmɑil kwɑnye, kɑ gø ngøle geki bɑ̈ngg-ɑ ɑ́nywøl kì gøle, kí bɑ̈ngg-ɑ ɑ́ngewe gɑ tyëngpɑth bënn, yɑɑg-ɑ cwøw bënn kì gøl Abrɑhɑm gï ɑ́ngøle kì cyɑ̈ngɑni ceth, ni kɑ ɑ́köbbii yi Jwøk. 24Abrɑhɑm runne ɑ́bëëd gɑ pyɑ̈r ɑ́bïngwen wïdɑ́bïngwen keny-ɑ ɑ́ngølii. 25O wɑ̈de Icmɑil ɑ́bëëd runne bɑ pyɑ̈rø wïdɑ́dɑ̈g keny-ɑ ɑ́ngølii. 26Kinøw, Abrɑhɑm geki wɑ̈de Isɑɑk ɑ́ngøl ɑ dicyɑ̈ngɑni ceth, 27geki jø gøle bënn, bɑ̈ngg-ɑ ɑ́nywøl kì gøle, ki møg-ɑ ɑ́ngëëw yi en kì wɑ̈g, ge ɑ́ngøl kyeel ki en.
Shilluk DC Bible © Bible Society in South Sudan, 2011.
