Génesis 6
6
Naaxwiinyëtë ja'ayëty y'ëxëëktu'un y'ëxëëkkajpxënëty
1Ko yë naaxwiinyëtë ja'ay ojts ëka'any jyuuky'ajtsoontë yaa naaxwiiny. Ets tyajmëxu'unk'ajtë y'u'unkëty to'oxytyëjkpë ets jëtu'un yä'ktë pyäjtë. 2Yë Tios yë tyuunpëtëjk ko t'ijxtë ya'atë to'oxy'ëna'këty janty'oy janty tsujëtypë. Ënät ojts twin'ixtë aakjä'ä oyëtypë ets mëët pyëjktë y'uktë, mëti'ipë ënäty tyimtsojkën'ajtëpën. 3Ënät yë Wintsën ojts y'ënä'äny: Ëjts ka'apës jëtu'un nkupëkëty ets naaxwiinyëtë ja'ay jyuuky'atëty xëmëkyëjxm, jä'ä ko yë'ë, xixy yë je'eyë. Paaty je'eyë jyuuky'atëty mëko'px ja i'px jëmëjt.
4Jää ojts ëka'any jya'të yë ja'ayëty mëti'ipë yajtijtëpën ja'aypyajkyeny ko ja Tios ja tyuunpëtëjk nyämyujkëtë mëët ja to'oxy'ëna'këty mëti'ipë ënäty yi'iyë myëmaay myëët'ajtëpën yääyëpë naaxwiinyën. Ko myiintë jyajtë ja y'u'unk y'ëna'këty, yë'ë jëtu'un ojts jotmëk y'itë ko ijty ja tsip tyunyë jeky'äjty.
5Ko jëtu'un ja Tios t'ijxy ko ja naaxwiinyëtë ja'ay tyëkooynyë ets je'eyë xëmë tmëmaay tmëët'ajnë wi'ix pyokytyunëtyën. 6Mëk ja Wintsën tja'awëy jä'ä ko kë'ëm ënäty të t'ëkyajkojy ja ja'ay. Mëët ja mëkjotmay, 7ojts y'ënä'äny: Nyajkutëkoyëpës ënät yë ja'ay naaxwiinypë mëti'ipës të nyajkojyën ets näjyëtu'un yë jëyujkëty mëti'ipë jëën ëkë'ëy tëjk ëkë'ëy ijtëpën tsënaaytyëpën; näjyëtu'un yë mëti'ipë myox tyukye'eytyëpën ets joon jëyujk mëti'ipë kääkjëtijtëpën. Mëkës tyam njawë koos ojts kë'ëm nyajkojy.
8Yë Tios ojts tni''ijxkëtä'äky tu'uk yë ja'ay mëti'ipë xyëëwajtën Noé, yë'ë oy ënäty yë Tios tmëtuny.
Yë Noé kyepytyëjk nëëwinye'epyë
9Ya'atë jëtu'un nyimëtyä'äky'äjtyp yë Noé.
Ko yë Noé jyuuky'äjty, jëtu'un ojts winë tuny ijxtëm ja Tios y'ëne'emyën. Yë'ë tu'uk ojts oy jyuuky'äty ma ja naaxwiinyëtë ja'ayëtyën. 10Noé nitëkëëk ijty yë myaank, jä'ä xyëëwajtëp Sem, Cam ets Jafed.
11Ma ja Tiosën ujts ënäty ja naaxwiinyëtë yajpaaty mëët ja ëxëëktu'un ëxëëk kajpxën. 12Jä'ä ko ja naaxwiinyëtë ja'ayëty tëë ënäty wyinma'anytyëkoytyë. Ko ja Tios t'ijxy ko yaa naaxwiiny naaxkëjxy mëj këjää ënäty ja ja'ay pyokytyuunë. 13Ënät yë Tios t'ënëmaay ja Noé: Tyam tëëjës ntuknipëjktaakë koos yë naaxwiinyëtë ja'ay tu'kë'ëyë nyajkutëkooytya'aja'any. Jä'ä ko yë'ëjëty mëj këjää të pyokytyuntë. Paatykyëjxm ëxëëk yë ja'ayëty nyätyuun nyay'ënëmaayënëtë. Nyajkutëkooytya'ajäämpyës tu'kë'ëyë winë mapaat yë naaxwiinyëtë y'ëwtityën. 14Paaty mijts yakoj tu'uk yë kepy nëëwinye'epyë, yë'ë juunëtypë kepy jootjoty mpëjkta'akëp, kanaak yë nyi'akojtuk, e ko ënäty jëtu'un të xykyoj'apatëtyä'äy, ënät nëjkx xy'atsi'tstujkta'ay maajaty y'ëwa'atsëtyën mëët yë o'tsn ëkë kepy'u'pky këtiipë ja nëë tyëkëty. 15Ko nëjkx xyajkojy yë kepy nëëwinye'epyë, yë'ë ya'atë kijpxëny nëjkx xyajtuny: jä'ä xyaj'ayeny'atëty tëkë'px majkmokx xajpk ets jä'ä xyajmëjjwiin'atëty majkmäjtsk xajpk ja kujkm ets xyajkëjxm'atëty wëxtujk xajpk ja kujkm. 16Tëkëëk nikë'ë xy'oytyunëty ets xypyëjkta'akëty tu'uk yë nyi'ëwa'atsajtën itkujky ma nyawopën, jä'ä xytyukkukä'äkëty yë nyikë'ë mëët yë nyawop tu'k'kë'ënuux ets mëët yë nyitëjk'aaw pa'apa'a. 17Nkäxäämpyës yë mëjkomtuu mëti'ipë nyikoonpatëpën yë naaxwiinyëtë ets tëkokyë winë kyutëkooytya'ajëty, mëti'ipë juukyajtënmëëtën yaa naaxwiiny. Tu'kë'ëyë jënu'un naaxkëjxy winë yajpaatyën o'kta'atëp. 18E mëët mijts ntunäämpyës tu'uk yë käjpxytyu'unën. Mijts jap nëjkx mtëkë ma kepytyëjkën nëëwinye'epyë ets m'u'unk m'ëna'k ets mto'oxytyëjk ets mtsu'utëjk. 19Näyjyëtu'un yë jëyujkëty nëjkxëp jap xypyëjktä'äky ma kepytyëjkën nëëwinye'epyë, aaktu'kyä'äy tu'kto'oxyëty, yä'äypyë ets to'oxypyë. Wä'än timmyëti'ipë jëyujkëty jënu'un yajpaatyën yaa naaxwiiny ets yë'ëjëty näjyëtu'un nëjkx wyë'ëmtë juuky'ajtpë yaa naaxwiiny ijxtëm mijtsën. 20Aaknimäjtskjaty nëjkx yë jëyujk mpaatëkëty jap ma ja kepytyëjkën nëëwinye'epyë, oy tyimmëti'ipë jëyujkëty, yë joon jëyujk ets jëyujk mëti'ipë tsënaaytyëpën ma jëën tëjkën, mëti'ipë myox tyukye'eytyëpën ets jëtu'un jyaak juuky'ajtkojtëty naaxwiiny. 21Nipëjkpät näjyëtu'un yë jë'kxy pëky may mëti'ipë nëjkx xyjyi'kxy xypyikën ets mëti'ipë nëjkx tjë'kx tpëktën yë jëyujkëty jap ma ja kepy nëëwinye'epyën.
22Ënät yë Noé ojts jëtu'un tkuuytyuunta'ay ijxtëm ënäty yë Tios të y'ënë'ëmxëtyën.
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process