Psalmyn 4
4
PSAL. 4.
Cum invocarem.
1Clasht rhym tra ta mee geamagh, O Yee my chairys:
t’ow er choyrt feaysley dooys tra va mee ayns seaghyn; jean myghin orrym, as eaisht rish my phadjer.
2O shiuish vec gheiney, caid nee shiu goltooan my ooashley:
as goaill lheid y taitnys ayns coyrlyn fardalagh, as geiyrt da breagyn?
3Toigg-jee shoh neesht, dy vel y Chiarn er reih da hene yn dooinney ta crauee:
tra nee’m geamagh er y Chiarn, nee eh clashtyn rhym.
4Shass-jee ayns aggle, as ny jean-jee peccah:
smooinee-jee dy-dowin ayns nyn gree hene, as ayns nyn shamyr, as bee-jee ec shee.
5Cheb-jee yn oural dy chairys:
as cur-jee nyn dreishteil ayns y Chiarn.
6Shimmey t’ayn ta gra:
Quoi yeeaghys dooin veg y vie?
7Hiarn, trogg uss seose:
soilshey dt’eddin orrin.
8T’ow er choyrt gennallys ayns my chree:
er dyn traa dy ren yn arroo, as y feeyn, as yn ooïll ocsyn bishaghey.
9Nee’ms lhie sheese ayns shee, as goaill my ea:
son she uss, Hiarn, dty lomarcan, ta coyrt orrym vaghey ayns sauchys.
maintained by the British and Foreign Bible Society