GENESIS 8
8
Tuichim Tawpna
1Huan Pathian in Noah leh long sung a akiang a thil hing chiteng leh ganta om tengteng atheigige a; Pathian in leitung ah huih anungsak a, tui ahong dai panta hi. 2Tui thukpi nakte leh van tohlette hong kikhakta ua, van a kipan vuah leng theusak ahita. 3Lei a kipan tui akiam giaigiai a; ni za-le-sawmnga nung in tui hong tawm deuhta a, 4akha sagihna ani sawm-le-sagih ni in Ararat tang ah long ahong kinga hi. 5Akha sawmna tan in tui akiam giaigiai zel a; akha sawmna ani khat ni in mualvumte akimuta hi.
6Ni sawmli nung in hichi ahong hi a, Noah in abawl long tohlet ahongta hi. 7Va-ak khat akhahkhia a, leitung a kipan tui akan khit masiah huai va-ak avial lenlen hi. 8Leitung ah tui atawmta hia, tawm nai lou, chih theihna ding in vakhu khat akhahkhe nawn hi. 9Himahleh vakhu in tukna ding himhim amu kei a, akiang ah long ah akik nawn a; tui lah leitung pumpi ah a-om lai ngal a. Polam ah akhut agolhkhia a, long sung ah akiang ah ana lalut nawn hi. 10Ni sagih dang angak lai a; long a kipan vakhu akhahkhe nawn hi. 11Nitaklam in akiang ah vakhu ahong lut nawn a; ngai in, amuk in olive nah khat ahon tuah hi. Noah in leitung ah tui atawmta chih atheita hi. 12Ni sagih dang angak nawn a; vakhu akhahkhe nawn a; akiang ah hong kik nawn kei hi.
13Huan hichi ahong hi a, akum zaguk-le-khatna, akha khatna, ani khat ni in, leitung a kipan tui akangta hi. Noah in long khuhna akoihsuan a, a-en a; ngai in, leitung ahulta hi. 14Akha nihna ani sawmnih-le-sagih ni in leitung ahulta hi.
15Pathian in Noah kiang ah thu agen a; 16“Long a kipan nang pawt inla, na zi leh na tapate leh na tapate' zite leng na kiang ah pawt uhen. 17Sa tengteng lak a thil hing chiteng na ompihte, vasate, gante, leitung a bokvak a pai ganhing chitengte toh na kiang ah pikhia in, leitung a chiphatak a chi tampi suang a ahong puntheihna ding un,” achi hi. 18Noah apawt a, atapate leh azi leh atapate' zite leng akiang ah apawt uhi. 19Sa chiteng, ganhing chiteng, vasa chiteng, leitung a tang thei peuhmahte amau chi omdan dungzui zel in long a kipan apawtta uhi.
Noah Kithoihna
20Noah in Toupa a ding in maitam adoh a; sa siang chiteng lak leh vasa siang chiteng lak a kipan ala a, maitam ah halmang pumpiaknate alanta hi. 21Toupa'n huai gim namtui aza a; Toupa'n alungsim in, “Mite ziak in leitung ka hamsiat nawn kei ding, mite lungsim ngaihtuahnate lah tuailai ahih a kipan gilou ahi ngal ua. Tua ka gawt bang in thil hing chiteng leng ka gawt nawn kei ding.
22“Leitung a-om lai teng
buhtuh leh buhlakte, khovot leh kholumte,
nipi leh phalbite, sun leh zante
abei kei ding,” achi hi.
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.