Senesis 17
17
Ahi viles isen Ebram mai vi Ebraham ka san sakien ten vekahoi mini keke vatie lat hatkatien takeih onealu
Sen 17:1-6,9-27
1Navong Ebram, sua onen vesesal vatokol handred tai (99), Iahova kistal veni ka viteni mini vit, “!Inau, navi Ahi ten keihoen! Kilong kat nau ka lises kumon tounah koa mal en metok. 2Num ris hatkatien takeih hetal minuk ka numon vatiamal keil koa hekistal enuk hehi houlu mok.” 3Ebram malingling mini, nan rokol atan. Ka Ahi vit risi mini vit, 4“Inau namumon hatkatien koanek ral minuk: navat kati keke vatiamal keil onom imai ihi mari vangi meatin houlu. 5Sakini, isom hervitei mun ‘Ebram|Ebraham,’ ka hehi ‘Ebraham’ veni numonuk kihi mari avu onen mari vangi meatin houlu.#17:5 En selusien onen Siu, keil ‘Ebram,’ aneite teni vi ‘mari avu.’ Ka ‘Ebraham,’ aneite teni vi ‘avu onen mari vangi meatin houlu.’#Rom 4:17 6Nisakin vatiamal keil koa ikistal ika enuk imai ihi mari kantri keil, ka keil koa imai ihi asuv houlu keil.”
9Ka Ahi vit risi min Ebraham vit, “Hatkatien takeih onak, keik kusil kati, keik hetal min vatiamal onom keil koa ikatau enuk. 10Keik ka onom keil mihemaeni mivoumon vekahoi min ehon vasi keil onami.#Umen 7:8; Rom 4:11 11Ekek, navong mihoumon vekahoi en ehon keil onami, hetie lati keke mimusil hatkatien takeih oralu. 12En avong keil koa hemai, koakeil en kami koa avi meahos iha en vekahoi navong avong one vi oulim (8). Slev onami keil koa mikuri en out sav ral min titae keil koa avasi en teim onami. 13Keil vasi iha en vekahoi. Mukonek, out koa amumon vekahoi eni en avemi hetie lati min meatin keil vasi keke mimusil kat hatkatien takeih onak koa reingeingeni vavus. 14Munak meatin etai hervatei en vekahoi, hervitei mun meatin tai onak, veni kei rolong kattei hatkatien takeih onak.”
15Ka Ahi vit risi min Ebram vit, “Ahin onom, kirvisetei mun en ‘Serae.’ Kosa heha, isen hehi ‘Serah.’#17:15 En selusien onen Siu keil, Serae ka Serah, aneite ten eis keilu enek vi ‘princess,’ atouli onen asuv houlu tai. 16Nitokol kati ka nimaeni hekur ehon tai onamil. Numoni hemai hehi mama ten mari vangi meatin keil ka asuv houlu emun keil ikistal rani.”
17Ebraham malingling ven Ahi, nan rokol atan, ka mul viteai min kei sasen. En rendemien onen vit, “?Meatin kilea vasan ehon min ahin tai navong sua onen rokol handred tai (100)? ?Ka Serah emun kilea veah vakur ehon navong sua onen rokol hanumau ehat ka halualim emun (90) tuai?” 18Kei vis Ahi vit, “?Kosakras kovamaeni li keke Ismael vakur tokolkatien koa kosani minau?”
19Ka Ahi vit, “!Vuo! Ahin onom, Serah, hekur ehon tai onamil, ka kiling isen hehi ‘Aesak.’ Hatkatien takeih koa namumoni ral minuk, num risi hetal mini ka hetal min vatiamal onen lises ka lisenges. 20Ka naraengon asa koa koviteni minau usil Ismael. Hesakini, nitokol kati ka titan keil emun ihi houlu vis ihi houlu mok. Hehi mari tata ten vatiamal teindan elu (12) koa imai ihi mari vangi meatin tai. 21Ka hatkatien takeih onak, numoni hetal min natmali Aesak koa Serah hekuri en avati koanek en sua koa hemai.” 22Navong Ahi selus evus, va rani.
23En avong etin enek, Ebraham long kat Ahi ka mumon vekahoi en meahos vasi keil koa aro ral mini: Ismael, slev keil onen ka meatin sav keil koa amusili. 24Ebraham, sua onen rokol hanumau ehat ka teindan ouhat emun (99) navong va en vekahoi. 25Ka Ismael, sua onen en avong koanek rokol teindan etel (13). 26Ebraham ka natnali, keilu vasi luva en vekahoi avong tas, 27ral min slev keil onen.
Copyright © 2011 Wycliffe Bible Translators, Inc.
