Mattayo 8
8
Yeesu ghoahaap siida
(Mark 1:40-45; Luk 5:12-16)
1Iiduw nea ghwararang'aana giijeeda, ghwaat geeshta emeetuw; 2hean ghwahidu siida bearji udamusuura ak gwatkuyi aba madeadaannyi ak gwayeeshsha, “Ng'uttamiida iigasayi gimmuusi amminnaan.” 3Ghoahakta geadi ak ghawaasa nea gwayeeshsha, “Geagasayi; miinni.” Deagheatta ghahaabwa udamusuura. 4“Adaaha, adiiduw giruksi sih gil; ng'eada una, ak gihimsi geaw ashoohoochcheanda, ak giidaydi haleanjeeda sisappa geadi bea ghadoweeda gawuurji gida ghayi rukuteayda Muusa, ak abeeda ghwanal buuneeda.”
Yeesu ghoahaap soomjeanda shirikkarajeanda haw bea Ruumi
(Luk 7:1-10)
5Iimuchchu nea gawa Yeesu jeeda mujiineeda Gapernaumu, gawa headaannyi shirikkarajeanda haw bea Ruumi, 6ak gamearmearani nea gwayeeshsha, “Ng'uttamiida soomjeandeanyu gwalil aba ghoah goobittu damealga nea gwasawana muuchchi.” 7Gwayeeshsha niny, “Gaydoan dahaap.” 8Gwayeeshsha shirikkarajeandida hawiin, “Ng'uttamiida aniini mammisean gideaba gaynyuunyi jeedeaba gheenyu; ang'iing'i rukuni ng'asheanda akghwahit, ak gayghahaap soomjeandeanyu. 9Aba gideaba eara aniini geewoschi siida ghayi mida hing'eadayda gheambalmeeda, mida hing'eadaydeanyu shirikkara, ama eayeeshshi nii, ‘Una,’ gawa, ghana nii ‘Beenni,’ ghwaan, ak eara soomjeandeanyu iyeayeeshshi ‘Sina gili,’ gwasin.” 10Iiy Yeesu ng'asheesu, ghahamng'eanyi ak gwayeeshsha fukwachchi aat geeshta, “Aba huumwa geayeeshshineegwa, miidadaah aba jeeda ng'eanyiida Israeeli siida mideawa masaweega uurji nih. 11Asi geayeeshshineegwa, gayghapka fuga saang'a jea gwaleabu heeda ghayeawa ea heeda biyeara ak gaygoobiitpiit ak gweagiischi sea Abrahaamu, ea Isakka, ea Yakkobo aba jeeda sugoochcheandumeeda humng'eeda, 12amaduw balloojiga sugoochcheandumeeda gajeehisa jeeda misaneeda jarooda; heeda jeagwanda shookka ea giwirrooda geeshatka.” 13Ng'atta gwayeeshsha Yeesu shirikkarajeandida hawin, “Una; ak gagasa ghoaw gitta imwasiin.” Ghahaap soomjeandaannyi bea gadiyeeda aba damandida.
Yeesu ghoahaap fuga saang'a
(Mark 1:29-34; Luk 4:38-41)
14Iiduw nea gawa Yeesu jeeda gheeh Betro, ghwadaa gheamatta agweaji Betro nea gwalil aba badayda bulaliida nea gabearji sheagheeda; 15ghawaasa Yeesu geattindaannyi, ak goosha sheagheeda, ak ghang'eat gagadiyeesa. 16Iiduw nea niiw shing'ada geeyeassa fuga saang'a bearji meangeenda; gooruutta meangeenda aba ng'asheanda, ak ghoahaap buuneessean miyeani. 17Nii abeeda gayghoahiit ng'asheanda ghayi rugu sibaneeda suguura Isaaya nea gwayi, “Ghwasar niny munyasnachcheakkaasa ak gageanda miyeannyeakkaasa.”
Fuga gasa ghwaat geeshta Yeesu
(Luk 9:57-62)
18Hean ghwadaa Yeesu emeetuw nea gwaneaweesa, ghwanung' ghoaghaaw ginealanga. 19Gaweesa Ng'orshoochcheanjagi ak gwayeeshsha, “Ginealshoochcheanda, gaydeadu geashtaang'u heechea una sean.” 20Gwayeeshsha Yeesu, “Fureayoonga gwandeawa shoomeanga, dariidakka gwandeawa ghoorajeega; nea Balleanda Siida ea mandeawana heechea ghwayiin uhuudannyi.” 21Gwayeeshsha nuut aba jeeda giinealangaaschi, “Ng'uttamiida, goonean beatta ghannyi dawa dabuy Bwaabwa.” 22Ak gwayeeshsha Yeesu, “Eanni geeshteanyu, nung'waada fuga nimeewa gabuy muscheekka nyaawa.”
Yeesu ghwanung' ghahawda siilakghta basooda
(Mark 4:35-41; Luk 8:22-25)
23Hean nea gwading'da maleambooda gamaseaw giinealangaaschi. 24Deagheatta, ghwahidu siilakghta ng'waan bea basooda, ak gooyuuk maleambooda laweajajeega; nea abeeda gwalil. 25Gaweay heeda giinealangaaschi ak ghwaheat nea geeyeeshsha, “Ng'uttamiida laalneasa sishsheali.” 26Gwayeeshsha Yeesu, “Anda nung'udeagwa muuwda, Ea fuga mwanang' masawi.” Ghang'eat ak gwareekusa jeammeeda ea basooda ak ghahawuda basooda ea gwayi saw. 27Ghahamng'eanyi buuneeda nea gwayi, “Siisi siidurjiini, awal gheang'da basooda ea jeammeedean?”
Yeesu ghoahaap fii iyyeenya bearji meangeenda
(Mark 5:1-20; Luk 8:26-39)
28Iiduw nea nuwa gigheawda mida ng'eanyiida Gadarene gwaroonnyi fii iyyeenya bearji meangeenda, nea gwaleabu heeda subunnyiisa buuneeda. Fiisu abeeda ea ng'weani ea eeyi bwak ea ghoawal buuneeda sigoodeaba naweetta. 29Ng'ulla Goojuur nea gwayeena, “Geendeayeesi naaha sea ang'iing'i, Ea Balleanda Aseetta? Guwuni sawaneasa nea miighwahidu damandeanya?” 30Abeeda gwanda hawannyeanda ukkurmajeega nea sheagi nea ghoajeada. 31Gamus meangiga bea endean nea gwayeeshsha, “Iiruuttaneasa ginung'waadi eeweaya eappitta jeedeaba hawandida bea ukkurmajeegean.” 32Gwayeeshsha, “Aweayeena;” Gwaritteawa fukka. Gaweay ak ghoabitta jeeda ukkurmajeega; ak ghoabuuttaawa geat rakghraghooneeda ak gwajaksa geat basooda ak goosha sean. 33Ghwahal geat haghweadoodiga ak gaweay mujiini ak ghoadaarda iitteaba ng'asheesu seaniin sea iitteaba fukka bearji meangeendean. 34Hean gaweay Buneassean bea mujiineetteani roonyeeda Yeesu, geeyi bwak amadaah geemus gideaba ng'amwana ng'eanyiideanya.
Datooga New Testament © Bible Society of Tanzania, 2009.
