Mattayo 6
6
Ginealshooda weetta fuga barbari
1“Ashageada adiidu goosinnyi alooheedeang'wa aba madeeda buuneeda nea goobaysiini ghwadaheagwa saawa, aba gideaba iyosinindunu ea mwajanyasa giimearda aba heeda Ghweandeang'wa mida humng'eeda. 2Asi ang'iing'i iidaydi haleanjeeda iiweadi fuga barbari adidiing'u geaw ak gisindi gidasinniida fuga ammiitu geat aba jeesinga ghorajeega siinnealshachcheewa ea ghuusiga naweadinga, gagwarsa buuneeda. Aba huumwa, geeyeeshshineegwa suuh ninyas gimearda nyaawa. 3Asi ang'iing'i iidaydi haleanjeeda iiweadi fuga barbari eara geattindaang'u ghaadaam adaghwanal gisiin geattindaang'u bea dugwa. 4Haleanjeedaang'u iiweadi fuga barbari adaydaawana makcheameeda, ak Ghweandaang'u deaha makcheamuutka gay gooheanneey.”
Ginealshooda mooshtta Aseetta
(Luk 11:2-4)
5“Asi iyoamwaashchi Aseetta, ea adoowurjeewi fugiga ammiittu geadiin; saawa ghabwariiy ghamwaash Aseetta nea ghaminaada aba jeesinga ghorajeega siinnealshachcheewa ea ghuusiga naweadinga, ghwadaa buuneeda. Aba huumwa, geayeeshshineegwa, nigeawiit ghwanyas gimearda nyaawa. 6Nea ang'iing'i iimwaashi Aseetta, guwi jeeda ghooriidaang'u hoowa bea gahiin ak giradi gidaghuut ak gimwaashi Aseetta aba heeda Ghweandaang'u mida makcheameeda; ama abeeda Ghweandaang'u deaha makcheamuutka gaygooheanneey. 7Agooga iyoamwaashchi Aseetta ea adoochuurayi awuurjeewana fuga emoojiga; saawa ghaghay gili jea gooleeysiit aba ng'asheega nyaawa saang'a. 8Asi adoowuurjeewi saawa, aba gideaba Ghweandeang'wa ghwanal gidoogasayi nea miyoomsa. 9Asi amwaashtunu Aseetta:
Ghweandeanya mida humng'eeda,
Ghaawungaagu eakghambiida.
10Sugoochcheandumeadaang'u nung' ghwahidu,
Gidigasayi gagasa eesin,
aba hiji bea ng'eanyidean gawuurji gissisinniida aba hoowa bea humng'edean.
11Goaneasa Askweareeni daghwardeanya;
12Samseasa siileenigaasa,
gawuurji gidasisammisiindi fuga mideawa siileenigaasa.
13Adigealleasa jeeda simsimda,
ak gighuhaneasa gitta muyiin.
14Aba gideaba iyoosammiisi gidinyeannyeekka buuneeda, eara Ghweandeang'wa mida humng'eeda gaygwasamseegwa agooga; 15ama moosammisiini gidinyeannyeekka bunneeda, eara Ghweandeang'wa maygwasamseegwa gidinyeannyeekkeagwa.”
Ginealshooda iitta giluuldeaydeaba geaw
16“Gichcha iyoolluuldi geat, ea adoowuurjeewi fuga ammittu geat, saawa iissa gookkaroomnyi gheamamuunatka nyaawa ghoahiimu geat ghwadaa buuneeda gideaba niluudi geaw. Aba gideaba geayeeshshineegwa suuh ninyas giimearda nyaawa. 17Asi iluuldi geaw, giyeashi uhuudaang'u ak gihuuni gheamamdaang'u, 18amwanala buuneeda gideaba giluuldi geaw ak ghwanal Ghweandaang'u mida makcheameeda. Abeeda Ghweandaang'u ammu ghwadaa makcheameeda gayghoamwaarnyi.”
Meanang'oochcheandumeeda humng'eeda
(Luk 12:33-34)
19“Adootiiwsi gheaseedeang'wa badayda ng'eannyida ammu ghwaak muguyga ea girgweatka nea ghapka mareanghooga ak gwanyarja ak gwajagwadiin, 20asi ootiiwa gheaseedeang'wa aba humng'eeda heeda mwoammu ghwaak muguyga ea girgweatka, ghana gwanyarja mareanghooga ak gwajagwat. 21Aba gideaba heeda mida gheaseadaang'u heeda jea gwanda guroroadaang'u.”
Gheabong'nyeanda saseeda
(Luk 11:34-36)
22“Gheabong'nyeanda saseeda gheang'da gil. Ama majeek gheang'daang'u, abeeda eara saseadaang'u sean gajea eesh; 23ama miimajeek gheang'daang'u, abeeda eara saseadaang'u sean gaygwanda jeeda misaneeda. Abeeda weeshindida mida jeadang'uun imisana, ada misaneani gajea mii misaneeda!”
Aseetta ea baruureega
(Luk 16:13; 12:22-31)
24“Manda siida ammu gagadiyeesa fiisu hees iyyeenya. Aba gideaba gayghwasit agi nea ghabwariiy niirja, ghana ghoang'ngwaay geat sea nii ak gafool niirja. Majoammuusa agadiyesiina Aseetta ea baruureega.”
25“Aba sareani geayeeshshineegwa, adoodeawiissi eaweegeagwa, aba gichchea ayaaga ghana gichchea aleaha, ghana gichchea ookwealsiina sasanuukeagwa. Heappi eaweega mwang'ala hamitta, nea saseeda amwang'ala hangweakka? 26Ang'ulla dariidakka mida humng'eeda: mahissiida nea malachcha booga gabiissa ea meaweamsiina gijigoonga, eara saawa ghoarear Ghweandeang'wa mida humng'eeda. Heappi agooga! Moang'ali saawa? 27Ng'eaha gil aba jeedeang'wa ammu goodeawiit geaw ak ghoahaat geawundaannyi eara ea geattinagi gil? 28Ama hang'weakka ghoanung' goodeawideegwa nea naha? Oopkaada deakghweeda mida dareabeetta, gida heettiiideayda; ea masinna gadiyeeda nea mamanmanna; 29ak geayeeshshineegwa, eara Sulemaani aba jeeda miyeenoadaannyi sean miyeekwa muuchchi ea gawuurji deakghweanagi aba jeedeaba suh. 30Asi iinung' Aseetta gookwealsheattunu nyeega mida dareabeetta, mida askwareani ammuchchu ea niyaak beasta, heappi maygookwealshooweegwa muuchchi agooga ea fuga mwanang' masawi?. 31Asi adoodeawiichchi nea gooyeennyi, ‘Gajeayaaga naaha?’ ghana ‘Gajealeaha naaha?’ ghana ‘Gajeekkweala naha?’ 32Aba gideaba haleanjeeni gagaseadayi fuga emoojiga; aba gideaba Ghweandeang'wa bea humng'eeda ghwanal gideaba googasayi suuseaniin. 33Anyoo ghannyi oshsheeda agassa sugoochcheandumeadaannyi ea doobiiwnattaannyi, ak abeeda gajeehheaneegwa haleanjeeni seaniin gajea geagwa. 34Asi adoodeawiissi ng'asheegeaba numuji, aba gideaba numuji gaygwadeawiissa geaw. Giliwas eaweechcha ghoahiit deawiitmeadaannyi.”
Datooga New Testament © Bible Society of Tanzania, 2009.
