Debtere ba'ad waa ba'ad voo nɔ 5
5
Ananía vu̵ kan Safíra wu̵
1A̧máa nán tóó ká du̵u̵lı̵́, yéé woo Ananía, kȩ́ȩ́ yéé woo Safíra, gí hág woo, 2gɛ sɨɨde woo ka' tóó 'yɛ́ daa ma pa̧ŋ kéélı̵́ woo ya 'yɛ́ waa ba'ad Yesu woo voolı̵́ nagá; vu̵ sú̵g mbɔ́g moo woo kan kȩ́ȩ́ woo á̧ḿ.
3Ka yaa máa, Piɛ́r vigi: “Ananía, moo ȩn Seeɗán ka dɔ́m zó̧ó̧lȩ́, káḿ kɔ́d yigid Tayɨɨ woo vbád, káḿ gɛ sɨɨde káḿ nuŋ hág móólȩ́ yȩ ka' tóó 'yɛ́ daa yȩlá? 4Hág yȩ ká hág móó nɔ, a̧máa káḿ gígi yȩ á̧ḿ, sɨɨde woo ká móó nɔ. Ɨ́ yo̧go̧ pɛ́láa? Kɔ́ née káḿ mbɔ́g moo bi kɔ́ hȩn ı̵́ yo̧go̧lá? Mɔ́ kɔ́n nánán vu̵ yu̵ vbád yȩ nɔ né, a̧máa mɔ́ kɔ́d Tayɨɨɨ.”
5Sey Ananía ka ki la moo yȩ ná' máa, wá̧á̧ nɔɔ daa.
Nán 'waapád ku̵u̵ ki moo yȩ máa, dú̵ú̵ gbo̧o̧ tóó kɔ́ vu̵. 6Náásaa tóó vu̵ ya go̧o̧wo̧ kan sa̧a̧m, vu̵ gaŋ la dɔddu̵.
7Zamndi ta̧a̧nɔ́ ku̵u̵ ya̧a̧ daa sú̵'ú̵ máa, Ananía kȩ́ȩ́ duu dɔ́ ya, gaan woo hȩn ka kɔ́y yȩ né á̧ḿ. 8Ma Piɛ́r vigi: “A̧m o̧nnɔ́, ba vín hɨ hág víí máa, sɨɨde woo dɨ ı̵́ yɔgaa?”
Safíra hí̧í̧: “Ee, dɨ ı̵́ yo̧go̧.”
9Ma Piɛ́r duu vigi: “Kɔ́ née ví su̵g ya̧g ya víílí bi gu̵g yigid ı̵́ 'yɛ́lı̵́ Tayɨɨ woo nɔlá? A̧m ki doo nán ku̵u̵ la dɔd wə̧́ə̧́m máa, vu̵ dɨ ya̧gníimí yȩlȩ́. Vú̵ń gaŋ la dɔm á̧ḿ.”
10Vaŋná Safíra wá̧á̧ nɔɔ daa doo Piɛ́r woolı̵́. Náásaa pee ku̵u̵ dɔ́ la máa, vu̵ maawo̧ nɔɔ sú̵'ú̵. Vu̵ duu gaŋŋɔ la dɔd dáŋ́ wə̧ə̧ woolı̵́.
11Nán sú̵ggı̵́ vu̵ 'waapád kan nán tóó ku̵u̵ ki moo yȩ máa, dú̵ú̵ gbo̧o̧ duu kɔ́ vu̵ kɔ́lı̵́ mɛ́ń.
Hȩn sa̧ga̧ kɔ́lı̵́ tóó vu̵ kə́dkə́d
12 Waa ba'ad Yesu woo vu̵ kɔ́ hȩn sa̧ga̧ tóó vu̵ kan hȩn zálı̵́ tóó vu̵ ɓu̵u̵lı̵́ na'a zig yȩ voolı̵́. Nán sú̵ggı̵́ vu̵ 'waapád vu̵ sú̵g dii to̧nné na'a ya̧gníim faan ı̵́ Súlemáánu woolı̵́. 13Nán tóó ya̧nna voolı̵́ né sá̧ḿ, moo dú̵ú̵ kɔ́ vu̵ ú̵, a̧máa nán vu̵ dəm vu̵ mbaa ná'. 14Dúú vu̵ baa há'ay ya voo há'ayné mɛ́ń. Wayée kan wakȩ́ȩ́ vu̵ á̧ḿ, vu̵ 'yɛ́ zó̧ó̧ voo ı̵́ 'yɛ́lı̵́ Yesu woolı̵́. 15Ma nán tóó vu̵ gaŋ ho̧o̧ vu̵ yaan, vu̵ 'yée vu̵ píggí píggí, tə́ḿmé á̧ḿ, moo Piɛ́r a ya̧a̧ vu̵ daa tée, yigid woo a fii tóó vu̵ ú̵. 16Dúú vu̵ yaa kaa tóó vu̵lı̵́ dáŋ́ Yerúsalemmé á̧ḿ, vu̵ gáŋ́ ho̧o̧ voo vu̵ yaan, vu̵ pá̧ŋ́ nán hȩn hó̧g ka kɔ́ vu̵ yaan á̧ḿ. Ho̧o̧ ka̧' vu̵ 'waapád.
Vu̵ duun waa ba'ad Yesu woo vu̵ kan moo
17A̧máa ı̵́ nii hȩn ha"ı̵́ kan nán tóó ku̵u̵ mbaa kannɔ 'waapád máa, vu̵ nán sadukée vu̵ yu̵, vu̵ moo sɨg yúú waa ba'ad Yesu woo voolı̵́. 18Vu̵ ma' vu̵ tú̵' lig púúsina ŋgó̧ḿna woolı̵́.
19Viddí máa, maleeka ı̵́ 'yɛ́lı̵́ woo tóó ya tu̵'u̵ ya̧gníim lig púúsina pee, vud waa ba'ad pee vu̵, o̧d vu̵: 20“I la dii lig hȩn ha"ı̵́lı̵́, ví pad zig yȩ moo vágád ı̵́ káákáá Tayɨɨ woo wu̵lı̵́ 'waapád.”
21 Waa ba'ad ku̵u̵ ki moo yȩ máa, vu̵ daa laa lig hȩn ha"ı̵́lı̵́ ya̧g ka̧'a̧m hí̧m, vu̵ dəŋ moo tú"í wu̵lı̵́.
Ɨ́ nii hȩn ha"ı̵́ kan nán ku̵u̵ sú̵g mbaa kannɔ máa, vu̵ su̵g ı̵́ nii moo sə̧"ȩ́ vu̵ kan ı̵́ nii Yúúda vu̵ 'waapád, bi mbɔ́g mooɨ. Vu̵ ba' la lig púúsinalȩ́ moo u̵u̵ la pa̧ŋ waa ba'ad pee vu̵ yaanɔ́.
22Só̧ó̧ze ku̵u̵ ya̧ la máa, vu̵ nugun vu̵ sı̵́ né, vu̵ vȩ́' ya 23o̧d vu̵: “Vɔ́ la maa ya̧gníim lig púúsina tú̵'u̵y mbaa ŋgə́ŋ́gə́ŋ́. Ɨ́ ya̧gníim tu̵lı̵́ vu̵ dii mbaa dɨ voo wu̵lı̵́, a̧máa kóó tu̵'u̵ dɔ́ la máa, vɔ́ maan sı̵́ nán tóó tíŋ́ woolı̵́ né.”
24Sey ı̵́ nii só̧ó̧ze ı̵́ lig hȩn ha"ı̵́ ka ki moo yȩ máa, vu̵ kan gbanaa hȩn ha"ı̵́ vu̵ á̧ḿ, vu̵ gaan moo tóó u̵u̵ o̧n sı̵́ yúú waa ba'ad Yesu woo voolı̵́ né; kóó hȩn ka ya̧a̧ wu̵lı̵́ á̧ḿ. 25A̧máa nán tóó ya o̧d vu̵: “I ki lée! Nán kíí tú̵' vu̵ lig púúsinalȩ́ pee, vu̵ dɨ lig hȩn ha"ı̵́lı̵́, vu̵ dɨd nán vu̵ moo tú"í wu̵lı̵́.”
26Ɨ́ nii só̧ó̧ze ı̵́ lig hȩn ha"ı̵́ pee vu̵ laa kan nán woo vu̵, vu̵ la pa̧ŋ ya waa ba'ad Yesu woo pee vu̵. A̧máa vu̵ duu kɔ́n vu̵ sı̵́ kɔɔgná né, moo vu̵ ndɔg dúú ba vú̵ń gbóo bi kan 'yɛgɛɨ.
27Ku̵u̵ pa̧ŋ vu̵ ya sú̵'ú̵ máa, vu̵ tú'ud vu̵ kan ı̵́ nii moo sə̧"ȩ́ vu̵, ma ı̵́ nii hȩn ha"ı̵́ vi vu̵ moo, 28o̧d vu̵: “Vɔ́ há' ví moo tú"í kan yɛ́g Yesu woo ú̵. Ɨ́ yo̧go̧ pɛ́láa? Ma kíí dəŋ moo tú"í víí yȩ palı̵́ kaa Yerúsalemmé yɛlı̵́ 'waapád máalá̧! Ví hí̧í̧ bi tii moo ɓı̵́d yúú nɔm nán yȩ woolı̵́ yȩ yaan yúú vóólı̵́ á̧ḿma!”
29Piɛ́r vu̵ kan waa ba'ad tóó vu̵ hí̧i̧d vu̵: “Séý vɔ́ń kid Tayɨɨ wu̵ tɔ́g mba nánán vu̵. 30Tayɨɨ a ba ví yée voo nim Yesu kíí ga"u̵ nɔɔ la' vbagadı̵́ pee nɔmmé sú̵'ú̵. 31Ɓɛ dɔgɔnɔ dáŋ́ woolı̵́, 'yɛ́gɛ sı̵́ gbanaa kan ı̵́ nán sənné á̧ḿmɔ́, moo zig Izraɛ́l a tii zó̧ó̧, a nuŋ hȩn ɓı̵́d kɔ́lı̵́ woo kéélı̵́ gbɔlı̵́ɨ. 32Vɔ́ mbaa nán ya̧g du̵lı̵́ vu̵ yúú hȩn yȩlȩ́ sú̵'ú̵, kan yigid Tayɨɨ woo ka ba'ad nán ku̵u̵ kiddu̵ tɔ́g yȩ vu̵ á̧ḿ.”
33Sey ı̵́ nii moo sə̧"ȩ́ pee ku̵u̵ ki moo yȩ máa, vu̵ kɔ́ zó̧ó̧ yȩ́ȩ́, vu̵ hí̧í̧ bi nɔɔ waa ba'ad Yesu woo yȩ vu̵ ú̵. 34A̧máa nán farísa tóó ká du̵u̵lı̵́, yéé woo Gamaliɛ́l, ká nán moo Tayɨɨ tú"íi, nán vu̵ kiddu̵ tɔ́g mbaa ná'. Lúú dɔg sa̧a̧m ı̵́ nii moo sə̧"ȩ́ pee voolı̵́, o̧d vu̵ u̵u̵ vud nán yȩ vu̵ la gɔ́ŋ́ pȩ́ń, ma 35o̧d ı̵́ nii moo sə̧"ȩ́ vu̵: “Nán Izraɛ́l yɛ ví, i gág kan hȩn máa kíí dɨ nán yȩ vu̵ kɔ́lı̵́ yȩ ó̧. 36Hȩn tóó kɔ́y ɗii ná né á̧ḿ; Tewdá ká taa ba bin nán gbo̧o̧ȩ, fó̧ó̧ tȩmɛre ndaddú̵ vu̵ duuwu̵. A̧máa ku̵u̵ nɔɔwo̧ máa, nán vu̵n duuwu̵ pee vu̵ hɨ'ɨ 'waa, ba duu kin sı̵́ moo tóó né. 37Pig woo sey ku̵u̵ dɨ yéé nán voo bindigo máa, Yúúdas nán Gálilée tóó duu gbɔ vúd, zo' nán vu̵ laan ka' woolı̵́. Ka nɔɔ sú̵'ú̵ máa, nán vu̵n duuwu̵ pee vu̵ hɨ'ɨ 'waapád á̧ḿ. 38'Ya̧'a̧ yɛ máa, mí o̧d ví, i di̧i̧ moo nán yȩ voo sá, i gbɔ vu̵ u̵u̵ laa la ú̵, moo hȩn voo ku̵u̵ dəŋ, kan ba'ad voo yȩ, a hȩn nánán voo nɔ tée, wú̵ń dɨ si̧"í̧i̧. 39A̧máa a yaa dɨ Tayɨɨ woolı̵́ yȩ́ńná tée, víń kan néélȩ́ lı̵́nné woo pɛ́lı̵́. I gággú̵, moo ka víń kɔ́ ya̧g kan Tayɨɨɨ.”
Ɨ́ nii moo sə̧"ȩ́ pee vu̵ fȩȩ moo Gamaliɛ́l woo yȩ.
40Ku̵u̵ duu bee ya waa ba'ad Yesu woo pee vu̵ máa, vu̵ gbɔ́ vu̵, vu̵ o̧d vu̵ u̵u̵ duu tú' moo kan yɛ́g Yesu woo sá! Ma vu̵ daa kéé vu̵ gbɔ la.
41 Waa ba'ad ku̵u̵ lúú la tíŋ́ ı̵́ nii moo sə̧"ȩ́ pee voolı̵́ ná' máa, zó̧ó̧ dȩ' vu̵, moo Tayɨɨ ka kɔ́d vu̵ hȩn gbo̧o̧, moo u̵u̵ nuŋ hȩn ndɔ́gɔné moo yɛ́g Yesu woolı̵́ yȩ nɔ. 42Zá̧ga̧ 'waapád vu̵ baa tú' moo Tayɨɨ, vu̵ pa moo to̧o̧ 'maŋ yúú ı̵́ nán sənné Yesu woolı̵́ lig hȩn ha"ı̵́lı̵́ kan kíi vu̵lı̵́ á̧ḿ.
Nouveau Testament en Dii © Bible Society of Cameroon, 2001.
