Juan 14
14
So Jesús nachiso so nqa'aic mayi taÿa'a ñi qadta'a
1Sa ishit qome da huo'o ca tatapigui qadvilli. Chaqdata da qaupi'iÿa'ai ñi Dios, nataq'en aÿim. 2Cha'ayi yi lma' ñi ita'a ÿataqta qalota na nma'pi. Qaq da sa ishit da 'eetec de'eda, nachi sa ishíttaxa da qami' sa'axattapeguema. Qaq ÿoqo'oyi aÿim ashic, da yaqto' saqataxanai' ca qadmayi. 3Qaq qom mashi ime da ashic da saqataxanai' ca qadmayi, nachi qaltaq ñi'iguelaq da qami' saue'c, yaqto' qami' nachi 'eetai' da aÿim qoviita'aguet que'eca soota'a. 4Qaq qami' mashi qauaÿajñi da saigue, qataq mashi qauaÿajñi so nqa'aic.
5Nachi 'enapego' so Tomás, 'eeta':
–'Am ÿataxala', qomi' sa saÿajnaq cam 'auataigue; ¿ca 'éeteco' da sauanaxa ca nqa'aic?
6Nachi so Jesús 'enapega somayi, 'eeta':
–Aÿim mayi nachaÿim nqa'aic, qataq nachaÿim 'eesa lataxac, qataq nachaÿim nca'alaxa. Saqca ca lÿa ñigueuo da qainoxoneu'a ñi ita'a, nachaqaÿimta. 7Qaq da qami' aÿim qauauattoñi, nachi nataq'en qauauattoñi ñi ita'a. Qaq nagui mashi sogote da qauauattoñi, cha'ayi mashi qauloito'ot ñimayi.
8Nachi so Felipe 'enapeco':
–'Am qadataxala', ña qomi' 'aualloxonaxanguilo qome ca qadta'a, yaqto' nachidata qome 'oonolec da shi'iguelaxasoxolec.
9Nachi so Jesús 'enapego' somayi, 'eeta':
–Felipe, aÿim mashi huo'oi soua na'axa'te da qami' soota'agueta, ¿qalaq ñaq saxanoxo' da aÿim 'auauatton? Cha'ayi ca aÿim ila'a, camayi nataq'en ila'a ñi ita'a, qaq ¿tá'ainco' yi aÿim 'auÿaxaatacot da qami' salloxonaxanguilo ñi ita'a? 10Qaq ¿sa ishito' peta'a da 'au'amaqten da ñi ita'a aÿim hueta'aguet qataq aÿim soota'aguet ñimayi? Naua i'aqtaqa mayi ñanoldeec, naamayi sa ishit da maichi ñalligoxottrela't, cha'ayi ñi ita'a mayi aÿim nachattaigui, nachiñi ñim i'ot cam maichi l'onataxanaxac. 11Qaq qau'amaqchiñi qome da aÿim soota'aguet ñi ita'a, qataq ñim ita'a aÿim hueta'aguet, huo'otaq qau'amaqchiñi aÿim souaxat dam so'ottac i'onataxanaxac. 12Qaq ÿataqta 'eesa de'eda qami' sa'axatema, da ca aÿim i'amaqten, nachi camayi ishit nataq'en da i'ot nam so'otpi, qataq ishit da ÿataqta ÿacteec da lta'adaic cam i'ot. Cha'ayi aÿim nagui saÿa yi netaña ñi ita'a. 13Qaq 'enauac qome nam qauÿaxañiÿaique da qoviilec da i'enaxat, nachi aÿim so'ot, yaqto' ne'ena llalec ñi Dios ishit da ÿachaxan da lli'oxoyic ñi lta'a. 14Nachi aÿim so'ot qome ca camachaqca qauÿaxañiÿaique da qoviilec da i'enaxat.
So Jesús ÿachaxanapec da namaq ca Espíritu Santo
15Qaq da qami' aÿim qauauochiic, qaq qaualaqailguete naua ÿamaxasoxonaxaco. 16Nachi aÿim ñachoxonnot ñi ita'a, da yaqto' qami' namaxalo cam lÿa mayi qami' itaua'n qataq qami' i'añaqchi't, yaqto' camayi nachi 'eetai' da qami' hueta'agueta, 17cam Espíritu mayi ÿoqta 'eesa. Qaq nam shiÿaxauapi mayi huetalec ana 'alhua, namayipi qome sa ishit da ÿaconguet camayi, cha'ayi sa ishit da ila'a, qataq sa ishit da ÿauatton. Qami', qalaxayi qauauattoñi, cha'ayi qami' hueta'agueta, qataq camayi nachi 'eetai' qome da qami' hueta'agueta. 18Aÿim sa ishit da qami' sala't; aÿim ñi'iguelaq qome, da yaqto' qami' soota'agueta. 19Qaq mashi yaqta'a da ivita yi laloqo' da na shiÿaxauapi qome sa ishit da aÿim ila'a, qalaxayi qami' qome qalaq aÿim qauloita'a. Cha'ayi qanca'alliitauec, cha'ayi aÿim ñica'altauec. 20Nachi que'eca na'a'q ishit qome da qauloÿa'a da aÿim sooto'ot ñi ita'a, qaq qami' nataq'en aÿim qoviita'aguet, nataq'en aÿim qami' soota'agueta. 21Qaq ca ÿaÿateeteguet qataq ÿalaxaguet na ÿamaxasoxonaxacpi, camayi yi'oq da ÿataqta 'eesa da aÿim ÿauotec. Qaq ñim ita'a ÿataqta ÿauotec cam aÿim ÿauotec, qaq aÿim nataq'en ÿataqta sauotec camayi, qataq ñachaxana.
22Qaq som Judas (som l'enaqteua so Iscariote) 'enapeco':
–'Am qadataxala', ¿tá'ainco' da nachiqomaqta da qomi' 'anachaxanalo, qaq sa ishit da nataq'en 'anachaxana nam shiÿaxauapi mayi huetalec ana 'alhua?
23Nachi so Jesús 'enapeco':
–Ca aÿim ÿauotec, camayi ÿalaxaguet cam shinapec; nachi ñi ita'a ÿauotec camayi. Nachi ñi ita'a qataq aÿim ñanaguenaq da souaqta'aguet camayi. 24Qaq cam sa ishit da aÿim ÿauotec, camayi sa ishit da ÿalaxaguet cam shinapec. Qaq de'eda i'aqtaxanaxac mayi qan'axaÿaxañiitega, damayi sa ishit da ÿalamaxat; damayi chigoqo'ot ñi ita'a mayi aÿim namaq.
25Qaq qami' sa'axattema nagui 'enauac de'eda, llaxatemallaxa da ña qami' soota'agueta. 26Qalaxayi cam Espíritu Santo, mayi ñi ita'a qami' namaxalo qome, nactaigui naq'en da i'enaxat, da yaqto' qami' itaua'n qataq qami' i'añaqchi't, camayi qome qami' ÿapaxaguenque 'enauac na lataxaguesat, qataq qami' iuennataxanaxanque 'enauac na i'aqtacpi mayi qami' sanoiguilo.
27Nagui qami' shica'aisalo, qalaq nda'a't da nlagaxayic. Qaq de'eda ilagaxayic qami' sanema, qalaxayi sa ishit da qami' sanema da huo'otaq shiita'am da 'eetec nam huetalec ana 'alhua da huo'otaq ÿan da l-lagaxayic. Qaq sa ishit qome da huo'o ca tatapigui yi qadvilli, qataq sa ishit da qayi'iitac. 28Qaq mashi aÿim qau'aqaitega da aÿim ashic, qataq ñi'iguelaq, da yaqto' qaltaq qami' soota'agueta. Qaq da ÿoqta 'eesa da aÿim qauauochiic, nachi ishit da qauamaichiguiñi, da qauaÿajñi da aÿim saÿa ñi ita'a; cha'ayi ñimayi aÿim napacalec da l'amaqchic. 29Qaq aÿim nagui qami' sa'axatema de'eda, yaqto' qom ivita da ipacchigui, nachi ishit da aÿim qau'amaqchiñi.
30Qaq nagui sa ishit da qalota na sa'axat da qami' sa'axatema, cha'ayi mashi anac nam damaxasoxonapec ana 'alhua. Qalaxayi namayi sa ishit da huo'o ca l'añaxac da aÿim ÿaconeu'a. 31Qalaxayi damayi nachi lliquiaxac, yaqto' nam huetalec ana 'alhua ishit da ÿaÿaten da aÿim ÿataqta sauotec ñi ita'a, qataq da salaxaguet da so'ot ca aÿim ÿamaxalec ñimayi. Qaq qoñiishiguem qome. Qolqa'ai ne'ena.
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
