उत्पत्ति 11
11
बाबेलया धरहरा
1उबलय् पृथ्वी न्यंक मनूतय्सं छगू हे भाय् व छगू हे कथंया खँग्वः छ्यलीगु खः। 2पुर्बपाखे न्ह्यज्याज्यां वंबलय् इपिं शिनार देशया छगू मैदानय् थ्यन। अले अन हे च्वन।
3इमिसं थःथवय् खँ ल्हात, “आः झीसं अप्पा दय्काः मिइ छुये।” अले इमिसं ल्वहंया थासय् अप्पा व चाया थासय् अलकत्रा छ्यल। 4अले इमिसं धाल, “आः छगू शहर दय्के, अले स्वर्ग तक थ्यनीगु धरहरा दय्काः झीगु नां तये। थुकथं झी पृथ्वी न्यंक छ्यालब्याल जुइ मखु।”
5परमप्रभु मनूतय्सं दय्काच्वंगु शहर व धरहरा स्वयेत कुहां झाल। 6अले वय्कलं धयादिल, “थुपिं फुक्क छगू हे जातियापिं व छगू हे भाय् ल्हाइपिं जुयाच्वन। थ्व ला इमिसं यायेत्यंगु ज्याया शुरु जक खः। आवंलि थुमिसं मनंतुंगु न्ह्यागुं याये फइ। 7कुहां वनेनु, अले झीसं इमिगु भाय्यात ल्वाकःबुकः याये। अले इमिसं थवंथवय् धाःगु खँ थुइ मखु।”
8थुकथं परमप्रभुं इमित पृथ्वी न्यंक छ्यालब्याल यानाबिल। अले इमिसं व शहर दय्केगु ज्या त्वःतल। 9अथे जुयाः उगु शहरयागु नां बाबेल#११:९ बाबेल हिब्रू भाषाय् थ्व धयागु खँग्वः ल्वाकःबुकः खँग्वः लिसे ज्वः लाः। च्वन। छाय्धाःसा परमप्रभुं अन मनूतय्गु भाय्यात ल्वाकःबुकः यानादीगु खः, अले इमित पृथ्वी न्यंक छ्यालब्याल यानादीगु खः।
शेमया सन्तान
10शेमया सन्तानया खँ थथे दु –
खुसिबाः वःगु निदँ लिपा सच्छिदँ दुबलय् शेमया अर्पक्षद धाःम्ह काय् बुल। 11अनंलि व मेगु ५०० दँ म्वात। वया मेमेपिं काय्पिं व म्ह्याय्पिं बुल।
12अर्पक्षद स्विन्यादँ दुबलय् वया शेलह नांयाम्ह काय् बुल। 13अनंलि व मेगु ४०३ दँ म्वात। वया मेमेपिं नं काय्पिं व म्ह्याय्पिं बुल।
14शेलह स्विदँ दुबलय् वया एबेर नांयाम्ह काय् बुल। 15अनंलि व मेगु ४०३ दँ म्वात। वया मेमेपिं नं काय्पिं व म्ह्याय्पिं बुल।
16एबेर स्वीपेदँ दुबलय् वया पेलेग नांयाम्ह काय् बुल। 17अनंलि व मेगु ४३० दँ म्वात। वया मेमेपिं नं काय्पिं व म्ह्याय्पिं बुल।
18पेलेग स्विदँ दुबलय् वया रऊ नांयाम्ह काय् बुल। 19अनंलि व मेगु २०९ दँ म्वात। वया मेमेपिं नं काय्पिं व म्ह्याय्पिं बुल।
20रऊ स्विनिदँ दुबलय् वया सरूग नांयाम्ह काय् बुल। 21अनंलि व मेगु २०७ दँ म्वात। वया मेमेपिं नं काय्पिं व म्ह्याय्पिं बुल।
22सरूग स्विदँ दुबलय् वया नाहोर नांयाम्ह काय् बुल। 23अनंलि व २०० दँ म्वात। वया मेमेपिं नं काय्पिं व म्ह्याय्पिं बुल।
24नाहोर निइगुदँ दुबलय् वया तेरह नांयाम्ह काय् बुल। 25अनंलि व मेगु ११९ दँ म्वात। वया मेमेपिं नं काय्पिं व म्ह्याय्पिं बुल।
26तेरह ७० दँ दुबलय् वया अब्राम, नाहोर व हारान नांयापिं काय्पिं बुल।
तेरहया सन्तान
27तेरहया खँ थथे दु – व अब्राम, नाहोर व हारानया बौ खः। हारानया काय् लोत खः। 28हारान वया बौ तेरह म्वानाच्वंबलय् हे थः बूगु थाय् ऊरय् सित। थ्व थाय् कल्दीतय्गु खः। 29अब्रामं साराईलिसे ब्याहा यात। नाहोरं हारानया म्ह्याय् मिल्कालिसे ब्याहा यात। हारान यिस्काया नं बौ खः। 30साराई थारिम्ह मिसा खः। वया मस्त मदु।
31तेरह थःकाय् अब्राम, हारानया काय् थः छय् लोत, अब्रामया कलाः थः भौ साराईयात ज्वनाः कनानपाखे वनेत कल्दीतय्गु शहर ऊर त्वःतावन। तर इपिं हारान शहरय् थ्यनाः अन हे च्वन। 32तेरह २०५ दँ दुबलय् अन हे मन्त।
© 2024 Nepal Bible Society, Newa Christian
Literature Center and Wycliffe Bible Translators, Inc.
