मत्ती 15
15
लुक्सुकी तेन्दोकला येशूकी सुङ्गुप
(मर्कूस ७:१-१३)
1तमा फरिसीतिवा ताङ यहूदी छ्योकी गेकेनतिवा यरूशलेम नेसुर येशूकी चाला वानी खोला 2“च्यिला ख्योरे लोमातिवी दाक्पी हङ्गावातिवी तोङ नेज्युनी तेन्दुप लुक्सु मातेन्दुप यिन? तिवा याङ समा साप गोमाला लाक्पा मुटुनोक।” सिनी सिक्यासुङ। 3तमा येशूकी तिवाला सुङ्सुङ, “तुकै यिन्सिन ख्यिराङ च्यिला रङगी लुक्सु तेन्दुपकी थोक्ला कोन्छ्योककी क मेङ्येन्दिवी? 4च्यिलासिसिन कोन्छ्योककी ‘रङगी पपाआमाला ताङ्देन की। सी खोरो पपाआमी तेन्दोकला ताम्ङे दुक्टा लप्किवे, ती ति से राङ गोकिवी।’ सिनी सुङ्सुङ। 5यिने ख्यिरा याङ मी ललाइकी खोरो पपाआमाला ‘ङे ख्यिराङला शब्ज्यी कि गोवु ति कोन्छ्योकला बुल्वा पुलिन।’ सिसिन 6ती मी तीकी खोरो पपाआमाला शब्ज्यी कि मोगोवी सिनी सिवी। तुक क्यानी ख्यिरा रङगी लुक्सु तेन्दुपकी थोक्ला कोन्छ्योककी सुङ ति मेतेन्वी। 7ओ खोनक्पुतिवा, कोन्छ्योककी लुङ्तेम्बा यशैयाकी ख्यिरा थोक्ला दुक सिनी नम्दर शेतुप ति टेके यिन,
8‘दी मीतिवी ख नेमा तिराङ ङला ताङ्देन किवी,
यिने तिवी सेमला ति ङला ङ्याम मिकिनोक।
9तिवी ङला सोवा देकुप ति तेर्मे यिन,
च्यिलासिसिन तिवी लापुप येन्देन ति मी जोवु ठिम तिराङ यिन।’”#यशैया २९:१३
10ती ज्युक्ला येशूकी मी माङ्छ्योकला खोरे चाला कताङ्नी दुक सुङ्सुङ, “ख्यिराङ ङे ताम्ङे ङ्येना, तमा ल्यामो क्यानी हाक्कोवा किसा। 11ख नेमा शुकुप तीकी मीला मेचेङ्गा मोजोवी, यिने ख नेमा थेन्दुप तीकी मीला मेचेङ्गा जेवी।” 12तमा येशूकी लोमातिवा खोकी चिप्ला वानी, “चोवोकी दुक सुङ्गुप ताम्ङे थोसिमा फरिसीतिवा ङ्यिर्मु लावु ति चोवोला छ्या वे?” सिनी खोला टिसुङ। 13यिने खोकी सुङ्सुङ, “देवाच्येनला ज्यु वोतुप ङे पपी माचुवु दोङ्बुतिवा तेरी पल्नी क्युर्किवी। 14तुक क्यानी तिवाला ङ्याम माकी। तिवा खोरुङ मिक शर्वा यिन्सिनाङ यम्बा मिक शर्वाला गोमा कितुप मी यिन। मिक शर्वाकी मिक शर्वाला टिसिन ङ्यिकर मुक्तुमला ख्येल्गिवी।”
15ती थोसिमा पत्रुसकी येशूला “दी पेकी तेन्दोक ति ङ्यिराङला सुङ्नी।” सिनी गोङ्बा शुसुङ। 16तमा खोकी सुङ्सुङ, “ख्यिरा तरोङ साङ दीकी तेन्दोक ति हाक्माको? 17मी ख नेमा शुवु काङ साङ खोकला लेप्सिमा जु नेमा थेन्नी डिवी सिरुप ति ख्यिराङला छ्या मे? 18यिने ख नेमा थेन्दुप ति सेम नेमा थेन्गिवी, तीकी राङ मीला मेलोवा जेवी। 19च्यिलासिसिन सेम नेमा नासाम दुक्टा थेन्गिवी। तिवा ति मी सेतुप ताङ शम्डेन कितुप ताङ छ्येवु छ्येमु कितुप ताङ कुन कितुप ताङ पङ्बु मेटेङ्बु तेरुप ताङ मीला मारे तोङ्गुप यिन। 20ती ताम्ङेतिवी राङ मीला मेचेङ्गा जेवी, यिने लाक्पा माटुवा क्यानी समा सोनी मीला मेचेङ्गा मोजोवी।”
कनानी पुम्पेजी तेपा
(मर्कूस ७:२४-३०)
21तमा येशू ते नेसुर थेन्नी टुरोस ताङ सीदोनकी लुङ्बा नेवा फेप्सुङ। 22ती लुङ्बाला राङ कनानी पुम्पेजा यी येशूकी चाला वानी च्यार ग्यकिन सिरा “ओ चोवो, दाऊदकी गिपा, ङला च्यम्बा किटे की। ङे पुमला डे ग्यप्नी छासे छेटाङ ख्येल्नी वे।” सिनी सिक्यासुङ। 23यिने येशूकी तीला काङ साङ टिलेन मानाङ। तमा खोकी लोमातिवा खोकी चाला वानी खोला “दी पुम्पेजा याङ दाक्पी तिङ्ला च्यार ग्यकिन सिरा गिनोक। तीला डो च्यी।” सिनी गोङ्बा शुसुङ। 24तमा खोकी “ङ याङ तोरुप लुक दोके गलुप इस्राएल लुङ्बी मीतिवाला छोलुपला तिराङ तङ्गुप यिन।” सिनी सुङ्सुङ। 25यिने ती पुम्पेजा ति येशूकी दोङ्ला वानी खवुतुङ्मा देनी, “ओ चोवो, ङला दाल्जा किटे की।” सिनी खोला गोङ्बा शुसुङ। 26खोकी तीला “पेजातिवी साप शुब्ज्याङ लानी कीतिवाला तेरुप ल्यामु मिन।” सिनी सुङ्सुङ। 27यिने ती पुम्पेजा तीकी “चोवो, चोवोकी सुङ्गुप ति टेके राङ यिन। यिने कीतिवी साङ खोरो ज्यिन्दाककी च्योक्ची ख नेमा लुम्बुप पुर्मातिवा सेवी।” सिनी सिक्यासुङ। 28तीकी तुक सिक्यासिमा येशूकी तीला “ओ पुमो, ख्योरो ङला तेपा रम्बु क्यानोक। ख्योरो नो क्यावु दोके च्युङ्शी।” सिनी सुङ्सुङ। ती पेला राङ तीकी पुम ति टेक्नोक।
येशूकी मी बङीला टेक च्यितुप
(मर्कूस ७:३१–८:१०)
29येलुङ येशू तेसुर थेन्नी गालील ग्येम्छोकी गारीला फेप्सुङ, तमा येर पम्दोकला फेप्नी ते राङ ज्युसुङ। 30ते मी माङ्छ्योककी थेङ्बा ताङ मिक मोथोङ्गुप ताङ काङ्बा लाक्पा शोरुप ताङ वोन्बातिवा ताङ यम्बा नेजु वोतुपतिवा बङीला खोकी दोङ्ला टि वासुङ, तमा खोकी तिवा तेरीला टेक च्यिसुङ। 31ते कुवातिवी ताम्ङे लप थुपुप ताङ काङ्बा लाक्पा शोरुपतिवा टेकुप ताङ थेङ्बा युक थुपुप ताङ मिक मोथोङ्गुपतिवा मिक थोङ थुपुप थोङ्सालेन्सिन मी माङ्छ्योक छासे हलेवा कियी सिरा इस्राएलकी कोन्छ्योकला सोवा तेक्सुङ।
मी तोङ्डा ज्यीला येशूकी समा नङ्गुप
32ती ज्युक्ला येशूकी खोरो लोमातिवाला चाला कताङ्नी, “दी मी माङ्छ्योकला ङ छासे ङ्यिङ्ज्ये लासुङ। च्यिलासिसिन दिवा ङे मुला देतुप ति ङ्यिमा सुम गाल। यिने दिवी मुला साप समा काङ साङ मे। दिवाला ल्होतुङ्बा राङ तोङ्गुप ङला सेम मे। ल्होतुङ्बा राङ ताङ्सिन दिवा लामला टेन्बा तोर्किते यिन्दे।” सिनी सुङ्सुङ। 33तमा लोमातिवी खोला “दी दासा ति काङ साङ मेङ्येवु दासा पाङ्थेरी यिन। दोजो मी माङ्छ्योकला लङ्गुप समा ङ्यिरा कनी नेसुर ङ्येतुप्जा?” सिनी सिक्यासुङ। 34यिने येशूकी तिवाला “ख्यिरा मुला शुब्ज्याङ चो वे?” सिनी टि नाङ्सुङ। तमा तिवी “ङ्यिरा मुला याङ शुब्ज्याङ दिन ताङ ङ्या ठेमे ठेमे चेयी तिराङ वे।” सिनी सिक्यासुङ। 35तमा येशूकी मी तेरीला क नाङ्नी सला दे च्यिसुङ। 36ती ज्युक्ला खोकी ती शुब्ज्याङ दिन ताङ ङ्यातिवा लानी कोन्छ्योकला थुचिछे पुल्सिमा च्याक्नी लोमातिवाला नाङ्सुङ, तमा लोमातिवी ती ति मीतिवाला गोनी बिन्सुङ। 37मीतिवा तेरीकी डाता सेक सोसुङ, तमा लोमातिवी ल्हकुप पुर्मातिवा रुक्सालेन्सिन तोलुम दिन क्येङ्सुङ। 38ते सापतिवा ति पुम्पेजा ताङ पेजा टिक्पेतिवा माङोवा क्यानी साङ ख्योक्पेजा नाज्युङतिवा तिराङ तोङ्डा ज्यी चोयी नोक। 39तमा ती मी माङ्छ्योकला ताङ्सिमा येशू टुला जेनी मगादान लुङ्बा नेवा फेप्सुङ।
© 2014, Wycliffe Bible Translators, Inc. All rights reserved.
