Dyénésis 4
4
Kain na Abél
1Na tasatlamin ale Adam na Iba. Na di là mlo mlalu kenen na mngà ale lagi, dnagitla Kain. Na man Iba, “Fagu di ktabeng i Amugu Dwata, tamngà agu i tingà lagi.” 2Kafnge én, lêman mngà Iba i galwe tingaan lagi, dnagit ku Abél.
Kafnge én, Abél mbaling to fulung mifat dad bilibili, na Kain kenen fulung mimò di tanà. 3Satu duh, gafat dad fule Kain, taman nun blén di Amun Dwata. 4Kabay Abél kenen, nalékan i tingà bilibili i muna sut, na tnatéan na neben i fye ungad du mlé di Dwata. Na too lehew Dwata i Amu ku Abél na i gablén. 5Kabay là lehew Dwata ku Kain na i gablén. Taman too blat i baweh Kain du too flabè.
6Taman man Dwata i Amu di kenen, “Tan i duenam flabè, na too blat i baweham? 7Ku matlu i nimoam, lehew agu ge. Kabay ku là matlu i nimoam, i salà kaflingengu dun salngad i labè lmanaf fan mlaab ge. Hae, du gambet i sasè tulus tagatlagad fagsalà ge, na nimoan ge fasakan, bay toom kenen fnisan.”
8Kafnge én, man Kain di flanekan Abél, “Magin ge deg di nligo.” Kakella di nligon fnatin i flanekan.
9Na snalek Dwata i Amu, Kain, manan, “Tanè sa i flanekam Abél?”
Tmimel Kain, manan, “Làgu gadè dun. Kan dé, agu kè gal mifat i flanekgu?”
10Man Dwata i Amu di kenen, “Kan ku mimò ge i too sasè nimò ani? I litè i flanekam sadi tamlo deg mdà di tanà, du mni i balas. 11Na mdà ani fanlayamta ge. Talà ge fakay mimò di tanà, du tanà ani nsafan litè i flanekam i fnatim. 12Ku lêman ge mule, là munge i fulem. Talandè too gumneam, alò ge lamngab di tah tanà ani.”
13Na man Kain di Dwata i Amu, “Too blat i flayamam deg ani, na làgu gagan tmayud dun. 14Neyem, mdà di duh ani laam agu faloh mimò di tanà, na dekam agu fawag di ge du agu lamngab di tah i tanà ani. Na balù simto mite deg, mati deg.”
15Kabay tmimel Dwata i Amu kenen, manan “Là mkel di ge i manam ani, du ku nun mati ge fanlayamgu fitu dulê di kaflayamgu ge.”
Taman nimò Dwata i Amu ilè di ku Kain, du fye là fnati i balù simto mite kenen. 16Kafnge én, fawag Kain di muna Dwata i Amu, na mnè ditù di banwe Nad mdadong di Idén gsen di gusut i duh.
Dad bel Kain
17Kafnge én, tasatlamin Kain na yaanan. Na kafnge én, maltien yaanan na mngà kenen tingà lagi, dnagit ku Inok. Na di bang én, mimò Kain i bong banwe, na dnagitan i banwe ani Inok, dagit i tingaan. 18Na Inok ani i mà Irad. Na Irad ani i mà Méhudyaél. Na Méhudyaél i mà Lamék.
19Na Lamék ani nun lwe yaanan, dunan Adah na Silah. 20Na Adah ani i yê Dyabal, na mbaling Dyabal mà i kdee dad mifat dad lmanaf, na gal mnè ale di dad slung. 21Na Dyabal ani nun twalin lagi dnagit ku Dyubal, na Dyubal mbaling mà i kdee gal fulung magaf dad slali, na i nun tafas dnagit alfa. 22Na Silah i yê Tubal Kain, na mbaling kenen fulung msel i tabaga na tek. Na nun flanekan libun dnagit ku Naamah.
23Na man Lamék di lwe yaanan,
“E Adah na Silah, flinge gamu deg dad yaangu,
du ani i mangu di gamu.
Gfatigu i lagi du bnunalan agu.
Du là too tua i lagi munal deg, too nun galan,
knean tagfatigu kenen.
24Ku fitu dulê i ksasè kaflayam Dwata di balù simto to mati ku Kain,
salngad di to mati deg.
Kabay mangu di gamu, i kaflayaman là alò fitu dulê,
bay fitu falò fitu dulê i ksasean.”
Sét na Inos
25Na lêman mngà ale Adam na yaanan Iba lagi. Na man Iba, “Banlé agu Dwata tingà lagi i tlas Abél i fnati Kain.” Taman dnagitan i tingaan ani ku Sét. 26Kafnge én, gamwè yaan Sét na mngà ale lagi, na dnagitan ku Inos.
Na di bang ani, tambù i dad to dmasal na mangamfù di Dwata.
© 2014, Wycliffe Bible Translators, Inc. All rights reserved.
