Madiu 24
24
Yesu manuwa-tafalolo ana lauyawela fa'ina gilukahihi.
Maki 13:1-2; Luke 21:5-6
1Tu Yesu manuwa-tafalolo lakahine gihobu, ada ginauna tu ana tomuliya Bana againe hi'ela be higa manuwa-tafalolo ana aiyogona tulina tulina vewaga hinavehawalena. 2#Lu 19:44Bana gigayo, “Wadema manuwa ana ita vewaga fa'ina ganagahe. Kabala againe hikivetalana tu aimo keke tamo kabala kabalahiyana tabone ginada, au moya'aina hinatutuyauyaulena.”
Tova mulina aulolo tagiya lakahina babiya ginalakayemu.
Maki 13:3-20; Luke 21:7-24
3Tu Yesu gina oya Olive againe gilaka givetoga tu ana tomuliya adikaibe'uyanina Bana againe hi'ela hitoliyena higayo, “Unavenuwa'atama gava tova manuwa-tafalolo ana lauyawela ulukahihiyena-ma ginalakayemu? Ya yewa'ela-havagi kadu hida tova ana lauyabu ginaluveda'ufo againe, gava aituha ana'ita-yo anahalamane-hagihagiyeni?”
4Yesu gigayo, “Aituha hidede amine. Taumiyao wana'itave'avimi be keke tamo hakwadi yana fwaya againe ginanuwa'abiyemi. 5#Md 24:23-24; 1Yn 2:18Fa'ina aimo kaliva moya'aidi hina'ela aku egana hinayakahina hinagayo, Iya'eku Keliso higa Yaubada yana Tovegida. Hidedemi hinagahe be kaliva moya'aidi yadi fwaya againe hinanuwa'abiyedi. 6Kadu aituha sa'eyana ma gaviya moya'aina ginalakayemu ada kaliva yadi ve'amunumunuga butudi wananogalina, kadu hai lauveya hinalulugaviya medema valeyadi wananogalina. Atu wanogali! Keke ase'asemi gina'akolukoluni. Mena gaitomai-dina anafaiweya hidalakayemu tu tova ana lauyabu au aimo muliya-mo'ane ginalakayemu. 7Yo'o sa'eyana mali yo'o buye hinave'amunumunuga, kadu fafali sa'eyana mali fafali buye hinalulugaviya. Loka ada li'uli'u lakahina fafali tulina tulina agaidiya hinalakayemu. 8Venatuna ana tova ginaluveda'ufo againe, kwamayoku hinavefahedi-yo yadi aulolo ginavebutu. Meda anafaiweya mena gaitomai-dina galukahihiyedi-ma hinalakayemu againe, aulolo tagiya lakahina ginavebutu.
9 #
Md 10:22; Yo 16:2 Tova ana lauyabu ana aituha kadu sa'eyana ma au hinakive'avimi hinahegenauwemi be vita lakahina kadu alika wananuhagana. Kadu Iya wavetumaganeku fa'ina yo'o moya'aidi omi agaimiya hinavenivenibaina. 10Ada medema tovai-nadi tufoidi moya'aidi yadi vetumagana hinahegena be hinanuwayewa. Ada tobohiyadiyao nibaidiyao agaidiya hinahawavemogataledi kadu hinavenikohiyedi. 11#1Yn 4:1Ada falofita fwayafwayadiyao moya'aidi hinalakayemu be kaliva moya'aidi yadi fwaya againe hinanuwa'abiyedi. 12Ada koyona tulina tulina ginave'aliyahega fa'ina, tovetumagana tufoidi moya'aidi yadi hawahega tobohiyadiyao fa'idiya ginahavaina. 13Atu hai kaliva gina'atuvefa'ila be Yaubada againe ginamiyamiyave'avina tu alika ana maka, medema ganakibababalena. 14#Md 28:19Ada yaku kaliva hida Venuwa'ata Yamumuna yo'o tulidi tulidi agaidiya hinalumamalena be babi matatabuna hinaluyabuna. E, kaliva hinavenuwa'atadi be higa Yaubada yana itave'avina againe adifaiweya hinamiyami be ase'asediya ginavehivehimeya. Hidedemi yo'o moya'aidi hinavenuwa'ata-'owodi tu muliya tova ana lauyabu ginalakayemu.” Hidedemi Yesu tova ana lauyabu fa'ina gilukahihi.
15 #
Dan 11:31
Kadu gigayo, “Au aimo abakivekoyo koyo-mo'ena abaga tafatafalolona againe ginamidi-ma wana'itana. Medema tuwai-mo'ena Yaubada bonana ana to'awatalatalaina ana egana Daniyela gigaheye-vagahina. (E, omi tohawa wana'itanuwenuwena.) 16Abakivekoyo koyo-mo'ena abaga tafatafalolona againe wana'itana againe, omi Yudiya ana fafali againe wanamiyami-ma au oyeya wana'ota. 17Hai kaliva yana tolameya ginamiyami, medema keke yana manuweya ginaluku be higa yana lokoloko ginavaini. Au ginamadu'ota. 18Hai kaliva yana faheya ginamiyami, medema keke melaleya ginayewani be higa ana lifi ginavaina. Au ginamadu'ota. 19Hoiyoi vevine wahifugadiyao kadu vevine aimo hivehuvehuhu amanadi! Mena ota ana toveya vita lakahina hinanuhagana. 20Yaubada againe wanave'o'ola be higa mena gaitoma koyona keke wehi ana tova o sabati againe ginalakayemu. Naudadana sabati againe hawata gidadauda fa'ina, ka'i sabati o wehi digo gavaimi be oyeya wada'ota? 21#Dan 12:1Kadu medema tovai-nadi vita lakahi-mo'ena ginalakayemu. Mena vitai-nadi ma boi tuwai-mo'ena babi ana abave'inuba againe kadu tova hinafane keke hidanuhagani. Kadu aimo tova mulina keke hidede amine hinanuhagani. 22Tu Yaubada mena tova vita-mo'ena galukahihiyena-ma ana aiyeta gidabana be ginakali'uho. Ka'i keke gidadabani digo, kaliva moya'aidi hidabwavi. Atu Tauna yana kaliva giluwafadi be yana yo'ogaga agaidiya hiluku-ma adi lugolagola fa'ina mena tovai-nadi ginadabana hinafane be ginakali'uho.
Yesu keliso-fwayafwaya fa'idiya givenuwa'ata.
Maki 13:21-23; Luke 17:23-24
23Tu ka'i tamo hakwadi ginagahemi ginagayo, Wa'ela hida kalivai-nadi givekeliso-ma wa'ita, o ka'i ginagayo, Wanana yuwa kaliva givekeliso-ma wa'ita. Ka'i hidede amine ginagahe o keke bonana wanavetumaganeni. 24#2Te 2:9; Ha 13:13Au tova mulina tove'alololo hinalakayemu be hinagahe vaita hidavekeliso o ka'i hidavefalofita. Aituha fifiwaladi ada abaveyaulowoga badi hinafaisewadi be hinagaluvaluva vaita Yaubada yana kaliva ka'i yadi fwaya againe hinanuwa'abiyedi. E, kaliva vevine Yaubada giluwafadi be yana yo'ogaga agaidiya hiluku-ma hinagaluvaluvadi vaita hinanuwa'abiyedi. 25Wanogali! Tove'alololo yadi dewa fa'ina gavenuwa'ata-vagahimi.
26Kadu'e, ka'i tamo hakwadi ginavenuwa'atami ginagayo, Wanana bana yuwava'ama givekeliso be wala'aiya gimimiyami-ma wana'itana, ka'i hidede amine ginagahe o keke wanana wana'itani. O ka'i ginagahe ginagayo, Bana givekeliso-ma mene vetawaneya gimimiyami, au keke bonana wanavetumaganeni. 27Keke wanavetumaganeni fa'ina Iya Tohobu'ela nama gisinamana amine ganahobu'ela-havagi. Nama gisinamana be auhe'ama lobama fafalina fafalina gituvemahali-'owona amine, meda Iya kaliva moya'aidi matadiya ganahobu'ela-havagi. 28Hai ubula siyona gilakalaka, medede againe manusiyo hinavaga'auta.” Hidedemi Yesu gigahe.
Tohobu'ela yana yemuna-havagi fa'ina.
Maki 13:24-31; Luke 21:25-33
29 #
2Fi 3:10; Ha 6:12-13 Tu Yesu kadu gigayo, “Mena tovai-nadi ana vita lakahi-mo'ena ginahavaini-yo kauwana gina'uyuyu kadu vaikohi ana mahalina ginakwe'u. Ibadibadi lobameya gina'akolukoludi be hinabe'u ada lobama ana gaitoma fifiwaladiyao adi iviya gina'atuliyeliyedi.
30 #
Ha 1:7; Md 26:64 Hidedemi lobama ana loi hinahuluva tu Iya Tohobu'ela aku aituha lobameya ginalakayemu, ada tomiyababi adi yo'o tulina tulina yadi watagiya kumidi hinahobe'uwana. Ada Iya Tohobu'ela buhibuhi tabone lobameya gayewayewa'ela-ma hina'itaku. Yaku wafaiwala kadu yaku wamahalina ve'akinamanamalina gayewayewa'ela-ma hina'itaku. 31#1Ko 15:52; 1Te 4:16Yaubada yana tovenuwa'ata ganavehimeyena be hiulega ginayuvedonena, ada yaku tovenuwa'ata moya'aidi gana'iveninisedi be kaliva vevine Yaubada giluwafadi-yo yana yo'ogaga againe hiluku-ma hinavaga'auhidi. Fafali tulina tulina wabolimaneya wayavalaseya walaube'uya wa'oyeya, lobama inubane kadu ana lauyabu againe hinavaga'auhidi be Iya Tohobu'ela agaikuya hinavega'auledi.
32Wa'ita, lalava ana dewa wananuwenuwena be enohega wanavaina. Lalava ginatafa ma ka'ita-yo kagayo, Kauwana yana tova giluvedaveda'ufo. 33Meda anafaiweya mena aituhai-dina galukahihiyedi-ma wana'itadi againe, au wanahalamanena yaku yewa'ela giluveda'ufo-mo'a. 34Gagahe velemo'ena hida tova ana yo'o keke moya'aidi hina'alika-'owoga tu nagona mena gaitomai-dina moya'aidi hinalakayemu. 35Lobama be babi ginayawowola tu bonaku keke ginayawowola, au ginaduva-vagata.
Yesu yana yewa'ela ana tova keke tamo hakwadi
gidahalamaneni.
Maki 13:32-37; Luke 17:26-27,30-31,35
36 #
Af 1:7; 1Te 5:1-2 Tu yaku tova ka'i gava aiyeta o gava bai ganayewa'ela ma keke tamo hakwadi gidahalamaneni. Badi tovenuwa'ata lobameya keke hidahalamaneni, kadu Iya Yaubada Natuna keke gadahalamaneni. Au Kamaku anakaibe gihalamanena. 37#Aba 6:5-8Boi tuwai-mo'ena Nowa yana toveya kaliva vevine hidewadewa amine, meda anafaiweya Iya Tohobu'ela yaku yewa'ela ana toveya kaliva hinadewadewa. 38Fa'ina boi tuwai-mo'ena mala aimo keke gidatuwa-mo'a kaliva vevine himiyami a'a hi'au'a bwai hiyuyu hinaginagi hivenavenagi au yadi havivila tulina tulina hinunauwena tu Nowa waka againe giyage aiyetai-nadi. 39#Aba 7:6-23Nowa giyage tu gavadi ginalakayemu-ma keke hidanuwenuweni. Au himiyamiya-kawowo tu mala gituwa'afufudi-yo moya'aidi hibwavi-'owoga. Meda anafaiweya Iya Tohobu'ela yaku yewa'ela ana toveya kaliva vevine hinadewadewa. 40Kaliva luhei faheya hinamiyami tu sa'eyana gananauwena sa'eyana ginamiya. 41Vevine luhei gufeya hina'i'ivilavila tu sa'eyadi gananauwedi sa'eyadi hinamiya.
42 #
Md 25:13
Gava tova Iya yami Kaiwabu ganayewa'ela be yaku kaliva gananauwedi ma keke wadahalamaneni fa'ina, ase'asemi wanakidewedewena be wanalulauboda. 43#Ha 3:3Atu hidede amine wanahalamana. Ka'i tonimanuwa tokai'afu yana ela ana kauwana gidahalamanena digo, keke matana gidalowoni au gidalulauboda be tokai'afu keke anafaiweya gidaluku yana manuweya. 44Meda anafaiweya omi taumiyao wana'itave'avimi be wanalulauboda. Fa'ina gava kauwana Iya Tohobu'ela ganayewa'ela ma keke wadahalamaneni. Ka'i wanamiya-kawowo wanagayo, Keke adamoya gina'ela, au medema tovai-nadi ganavefuta'ami.
Tofaisewa bonabona'abina o dibudibutoyogina
ana gahetalahobuhobu.
Luke 12:41-48
45Tofaisewa kahihina ganalukahihiyena be wananuwenuwena. Gavaimi gidewadewa bana fa'ine higahe higayo, Wada tofaisewa bonabona'abina yana wanuwahuya gifififaisewa? Yana kauveya givegidena be gigahena gigayo, Iya ganana tu o aku agetoga una'itave'avidi, aiyeta sa'eyana sa'eyana adiga unaveleveledi. 46Ka'i gavaimi yana taubada givehimeyena medemi ginadewadewa tu yana taubada ginayewa'ela bonana gi'abi'abina-ma gina'itana, au bana tofaisewai-nadi vemwamwala ginanuhagana. 47#Md 25:21,23Gagahe velemo'ena agaimiya kaliva lakahina yana lokoloko matatabuna ana to'itave'avina bana tofaisewai-nadi ginasena. 48Atu ka'i bana tofaisewai-nadi au kaliva koyona o nuwahinagene ginagahe ginagayo, Hima yaku taubada givekwalu lakahina. Ka'i keke ginamadu'ela. 49Ada au ginavebutu tobohiyaneyao higa tofaisewa velugadiyao ginamunumunudi, ada badi gufa koyona ana toyu-fa'ila buye hina'au'a hinayuyu. 50Ka'i hidede amine bana tofaisewai-nadi ginahuluva, au yana taubada yana ela againe ginavefuta'ana. Yana aiyeta o ka'i yana kauwana tofaisewa keke gidahalamaneni tu yana taubada ginayewa'ela. 51Au ginamunukoyokoyona ada ginahegenauwena be badi meyadi luhei adi matahiwadi amine bana ginanuhagana. E, bana badi buye hinatagitagi lakahina, kumidi hinahobe'uwana nuwadi ginavekubokubo.” Au hidedemi Yesu yana yewa'ela fa'ina gigahetalahobuhobu.
© 2003, Wycliffe Bible Translators, Inc. All rights reserved.
