MARK 12
12
Drakha Aberi Ketiki Atum Alamlir
(Mat 21.33-46; Luk 20.9-19)
1Ansi Jisu halatum aphan lamlir hei hei pen kepuji pangcheng-lo. “Ahut isi inut amonit drakha arikang esi la pai ingkaichenlo. Alangli drakha alang kesor ahilikta tuk-lo, lapen kehonji aphan ahemtapta kimlo. Ansi alangli la drakha ketiki atum aphan pektekangsi adet kaprek damjuilo.#Isa 5.1-2 2Drakha athe kepangrumji abotor nanglesi, alanglipharman adrakha athe alangli halatum pen kelongji aphan ketiki atum along inut aban nangtoilo. 3Bonta hala ketiki atum labangso aban aphan nepcheksi chok-lo, lapen thangta pidundepinsi toijuilo. 4Ansi alangli aban kaprek aphan nangtoithulo. Halatum la aphan aphu along thengsi amek padolo, lapen patherak-lo. 5Alangli puthot anut kaprek aban aphan toithulo. Halatum la aphan pathilot-lo. Lapusonthotsi halatum akaprek penang atum aphanta klemlo; manene atum aphan ke chok-lo, lapen akaprek atum aphan ke pathilo. 6Alangli anut kaprek inutnat dolang. Lake alangli kechinghon asopolo. Kepadusi ke alangli, ‘Halatum nesopo aphan ke aman piji,’ pu mathasi amethang asopo aphan halatum along nangtoilo. 7Bonta hala ketiki atum chepulo, ‘Lake kechepahemphuji abang-lo, vangnon, la aphan pathilonang. Anke alang kechepahemphuji amar an etum chepahemphu longpo. 8Lasi halatum la aphan nepsi pathilot-lo, lapen abang arpum ke drakha aberi angtan varchorlo.
9“Tangte drakha aberi ahemphu pisi klempoma?” Jisu arjulo. “Alangli vangsi ketiki atum aphan pavirji, lapen drakha aberi anut kaprek atum arideng pitekangji. 10Chenamsi nangtum labangso ahastro alam porhelongtang-lo, kalima? Atheke hastro along tok-lo,
‘Hem kekim atum kekhindetang a-arlongsi hem kepathir-i,
akenangsotnei a-arlong cheplangtang-lo.
11Lake Hemphusi klemlo;
la kelang ko-an akemanghumemelo!’ ”#Lun 118.22-23
12Jihudi atum angbong keja atum alangliphan kenepji abidi rilo, pima alangli halatum pen apotsi labangso alamlir thanlo pu halatum chinilo. Bonta halatum armu atum aphan pherelo; lasi halatum alangliphan otekangsi damjuilo.
Midu Kepi Alam
(Mat 22.15-22; Luk 20.20-26)
13Jisu aphan adai kenepjisi alang-liphan kopinene alam keparjuji aphan alangli long manene a-Pharisi lapen Herod abe manene atum aphan toilo. 14Halatum alangli long vangsi alangliphan pulo, “Kuru, netum chinilo, nanglike kaiketa ahokpet abang-lo, lapen badu aphanta phererelo; pima nanglike monit amahang langle, bonta Arnam atovar ahokpetsi thanlo. Tangte Rom a-Recho aphan ili midu kepi nangji aron doma avema? Nelitum halatum aphan la pinangjima, pinangnema?”
15Bonta halatum aning arlo akematha abidi alam chinisi Jisu halatum aphan pulo, “Nanglitum kopi apotsi neliphan adai kenepji bor-iloma? Rup atangka isi vantha, neli la langlang.”
16Halatum la vanlo, lapen alangli halatum aphan arjusi pulo, “Lake komat arjanlo, lapen la komat alamjirsi tok-lo?”
Halatum thakdunsi pulo, “Recho arjan lapen amenlo.”
17Ansi Jisu halatum aphan pulo, “Recho amar Recho aphan, lapen Arnam amar Arnam aphanle pinon.”
Ansi halatum alangli kepu alam pen apot manghuphrong-lo.
Kethi Pen Kethurthu Alam
(Mat 22.23-33; Luk 20.27-40)
18Ansi Saduki atum Jisu along vang-lo. Halatum ke kethitang atum thurthe pusi pulo.#Akam 23.8 Halatum alangliphan eson alam arjusi pulo, 19“Kuru, Moses etum aphan labangso aron tok-lo, atheke ‘Inut amonit jongsi apiso pamotekangsi thilot-lo, lapen aso inutta avelo tangte, akorte akebi abang la atepi aphan patengsi akorte apoton paplangvek nangji.’#Keth 25.5 20Ahut isi korte bang throksi dolo. Akleng abang piso enlo, lapen asomar avepin pen alangli thilot-lo. Akorte adakvam abang la a-ik apiso aphan pateng-lo, lapen alanglita asomar ave pin pen thilot-lo. 21Lapen akorte adakvam adun abangta lasonthot plang-lo; lapen korte bangthroksita labangpi aphan enlo, lapen asomar avepin pen thilo. 22Kadokave aphi arloso abangta thilot-lo. 23Tangte mo kethi pen rengthusi kethurji ahut labangpi halatum angbong komat apiso plang poma? Pima halatum bangthroksita labangpi aphan enpet-lo.”
24Jisu halatum aphan pulo, “Nanglitum kechokdam-i-e ason lahelo, kalima? Pima nangtum hastro alamta chinine, lapen Arnam ajakongta chininelo. 25Pima mo kethitang atum thur lote, halatum pisota en-e, penanta dodedetpo; bonta sining athak kedo apherangke atum asonthak thakpo. 26Kethitang atum rengthusi kethurji alam ke nanglitum hala Moses ketok aloh along, atheke hala ingsu angplum along me kekar-ang alamjir ketok angdeng along nangtum Arnam Moses aphan kepu alam, atheke, ‘Neke Abraham a-Arnam, lapen Isaak a-Arnam lapen Jakob Arnamlo,’ pu hei hei alam porhehelangma?#Keba 3.6 27Alangli ke kethitang atum a-Arnam kali, bonta kereng-et atum a-Arnamlo. Nanglitum kechokche binong-lo.”
Kethenei Ahukum
(Mat 22.34-40; Luk 10.25-28)
28Inut aron thekser abang hadak vangsi halatum lam kechedansei arjudun long-lo, lapen Jisu hala Saduki atum aphan thakdun pamelo, lake alangli thek-long-lo. Lasi alangli Jisu along vangsi arjulo, “Kadokave ahukum angbong akethenei ahukum kolo abangma?”
29Jisu thakdunsi pulo, “Kethenei ahukum lahelo, ‘Arjunon, O Israel atum! Hemphu inutnat, Hemphu helo etum a-Arnamlo. 30Nangtum Hemphu aphan, atheke Arnam aphan nang ning ajakong an pen lapen nang karjong ajakong an pen, lapen nang ning kematha ajakong an penle lapen nang jakong ke do-an penle chinghonnon.’#Keth 6.4-5 31Adun kethenei ahukum lahelo, ‘Nangmethang aphan kechinghon asonthot-le tebok abang aphan chinghonnon.’#Levi 19.18 La sonni apar akethemu ahukum avelo.”
32Aron thekser abang Jisu aphan pulo, “Ahok-lo kuru, nangli ahok pensi pu pamelo, Hemphu helo Arnamlo, alangli pen apar ke akaprek Arnam avelo.#Keth 4.35 33Lapen alangliphan ning ajakong an pen, lapen ning kematha ajakong an pen, kedo-an ajakong pen kechinghon, lapen amethang aphan kechinghon asonthotsi tebok abang aphan kechinghon ke me kephrin-i athok hei hei lapen akaprek athok hei hei apar memulo.”#Hos 6.6
34Alangli abidi pensi thakdun pamelo la thek-longsi Jisu alangliphan pulo, “Nangli Arnam a-Rat pen helolelo.”
Labangso pen aphi ke baduta alang-liphan thang alamta arjuhaihedet-lo.
Khristo Alamjir Kethan
(Mat 22.41-46; Luk 20.41-44)
35Jisu Kardomhemthepi arlo lam kethan un ahut pulo, “Khristo ke David asopolo pu aron thekser atum kopusi keputhekma? 36Karjong Kangthir ketoi atengsi David amethang mamat pulo,
‘Hemphu ne-Hemphu aphan pulo,
nang hotur atum aphan nangkeng pak arum bibetik ke,
nang ne ar-e anat-le ingninon.’#Lun 110.1
37David amethang amatsi alangliphan ‘Hemphu’ pu pulo, tangte Khristo ke kopusonsi David asopo plang unjilangma?”
Aron Thekser Atum Aphan Chere Nangji Pu Jisu Kepu Alam
(Mat 23.1-36; Luk 20.45-47)
Armu ake-ongpi atum aning arong pen Jisu kethan alam arjudunlo. 38Alangli lam kethan un ahut halatum aphan pulo, “Aron thekser atum aphan cherenon, latum choi keding chingchoisi bithe bitha kedamji lapen hithi borwa hei hei along monit atum latum aphan aman kepi pen kardom kepapiji aphan latum aning hang-lo. 39Latum sinagog arlo kethenei anghoi lapen chojun amei along aman kedo anghoi kangni longji aphan aning dok-lo. 40Latum hemepi atum ahem kuruk-et-lo, lapen Arnam aphan palem-lem pensi ardom varet-lo. Latum aphan aduk ahukum so muchotji.”
Hemepi Adan
(Luk 21.1-4)
41Jisu tangka apuru athengno along ingnilunsi monit atum tangka apuru along tangka nangkethap langdun ding bomlo. Keplang-o ake-ongpi atum ke tangka thap-olo. 42Ansi inut kedukdet ahemepita hadak vangsi tam atangka paini thap-lo. Lake poisa isi anta komchet-lo. 43Alangli amethang asangho atum aphan chehangpetsi halatum aphan pulo, “Chenamsi ne nangtum aphan nangpulang, ladak tangka Asinduk along tangka nang-kethap atum angbong la kedukdet ahemepile kethap ongneilo. 44Pima kadokave atum ke amethang kedortang atangka angbong pensi pilo, bonta labangpi ke amethang akedorde angbong pen kedo an atangka, atheke amethang choche selesi pidet-lo.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MARK 12: KARBIBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
