MARK 11
11
Jisu Anong Kethe Pen Jerusalem Kelutdam
(Mat 21.1-11; Luk 19.28-40; Jon 12.12-19)
1Halatum Jerusalem arongsopi leji dok dok ahut, atheke Bethphage lapen Bethani arongsopi adung nanglesi Oliv anglong ari ri vang-lo. 2Jisu amethang asangho bang hini aphan toisi pulo, “Hala nangtum kepangno arongle damnon, lapen haladak kelut dam pen mamat baduta kardondepinlang agadha aso ejon kekokdong nangtum thek-longpo. Nangtum la phlok-ra ladak vannon. 3Lapen komane abang jongsi nangtum aphan, kopi apotsi nangtum la klemloma pule nang arjulote, Hemphu la nangji tangho, lapen prapjin pen nang-chethonthudetji pule thakdunnon.”
4Lasi halatum damlo, lapen hem athengno tovar along ejon agadha aso kekokdong thek-long-lo, lapen halatum la phlok-lo. 5Ansi hadak karjapphrong atum angbong pen manene atum halatum aphan pulo, “Nangtum kopi apotsi labangso agadha aso phlok-loma?”
6Jisu halatum aphan kethan asonthotsi halatum thakdunlo, lapen halatum aphan la paponlong-lo. 7Halatum labangso agadha aso Jisu along vansi amethang methang ape labangso agadha athak limlo, lapen Jisu la athak ardonlo. 8Ake-ongpi atum ke amethang methang ape tovar athak bisi sangjirlo. 9Jisu aphrang lapen aphi kedun atum hangjo josi pulo, “Hosana!#Hosana: Labangso alam ke Grik atum Ibri alam pen ke-en alamlo. Labangso alam atheke Arnam aphan ro archonon, puhelo Hemphu amen pen kevang abang ke ahirjume atheng-lo.#Lun 118.25-26 10Ephusar David Recho kevangji arat ke ahirjume atheng-lo! Hosana kangtuinei adim!”
11Jisu Jerusalem nanglesi Kardom-hemthepi arlo damlo, lapen kadokave amar aphan talavir lang-lo. Bonta arni thihek-lo apotsi alangli amethang asangho atum pen pen Bethani arongsopi damjuilo.
Jisu Thebo Arong Aphan Ahirjuno Kepi
(Mat 21.18-19)
12Puthot arni halatum Bethani arongsopi kevang un ahut Jisu an ingchirlo. 13Alangli achar pen arvo kedo-o athebo arong thek-long-lo; lapen la athe dojibon pusi langdamlo. Bonta Alangli adung lesi arvo apar thangta thek-longle-det-lo pima lake thebo athe kepathe abotor kalilo. 14Ansi Jisu labangso athebo arong aphan pulo, “Non pen apara baduta nangthe kaiketa chochedetji.” Asangho atum labangso alam arjudun long-lo.
Jisu Kardomhemthepi Along Kedam
(Mat 21.12-17; Luk 19.45-48; Jon 2.13-22)
15Ansi halatum Jerusalem nanglelo. Jisu ke Kardomhemthepi arlo damsi hadak kejor-kenam atum aphan hadak pen kephlungji pangcheng-lo. Alangli tangka kelar atum atebul hei hei lapen vothung kejor atum anghoi hei hei tharlepi-et-lo, 16lapen badu aphanta Kardomhemthepi angbong thangnat amarta papon longledet-lo. 17Alangli halatum aphan thansi pulo, “Nehemke kadokave adet amonit atum akardom ahem pusi puji pu hastro along tok-lo, kalima? Bonta nangtum lake dokait atum kechepatu alongku pinchongtang-lo.”#Isa 56.7; Jer 7.11
18Kurusar kethe atum lapen aron thekser atum labangso alam arjulong-lo; lasi halatum alangliphan kepathiji abidi ribomlo, pima armu atum alangli kethan alam pen apot manghuhurlo apotsi halatum alangliphan pherelo.
19Arni ingsamtang-lo apotsi halatum rongsopi pen damjuilo.
Thebo Arong Pen Kecharli Nangji Alam
(Mat 21.20-22)
20Puthot adap halatum tovar kedam un ahut halabangso athebo arong angkur penta kethikhrai thek-long-lo. 21Pitor hala keplangtang alam chemathathusi pulo, “Kuru, langtha! Nang ahirjuno kepitekang athebo arong ke thikhraitang-lo.”
22Jisu halatum aphan thakdunsi pulo, “Arnam aphan kroinon. 23Che-namsi ne nangtum aphan nangpulang, labangso anglong aphan, ‘Cherungkok-ra talo along chevardam-chuinon,’ pu kepu abang aling aning bibera alangli kepu alam plangvekji pule kroilote, lake alangliphan klempidetji.#Mat 17.20; 1 Kor 13.2 24La apotsi ne nangtum aphan nangpulang, nangtum kechoningri pen kopine amar kechohang ahut, nangtum la longtang-lo pule kroinon; anke la nangtum aphan nangpidetji. 25Lapen nangtum Arnam kardomjisi karjap ahut sining athak kedo nangtum apota nangtum akelet hei hei kediyajile, nangtum komane aputhak abekethur kopine alam do tangte, alangliphan diyanon.#Mat 6.14-15 26Nangtum jongsi anut kaprek atum aphan diyaje tangte, sining athak kedo nangtum a-Po ta nangtum akelet hei hei diyajedetji.”#Ajehak a Baibel hastro barim along ke labangso alam ave
Jisu Konat Pensi Jakong Kelongma Pu Alam Karju
(Mat 21.23-27; Luk 20.1-8)
27Halatum Jerusalem vangthulo. Jisu Kardomhemthepi arlo kehelatvoi ahut kurusar kethe atum lapen aron thekser atum lapen akesar atum alangli long vangsi, 28arjulo, “Nangli lahei hei keklemji aphan kopi ahukum long-loma? Komatsi nangliphan la keklemji ajakong nangpi loma?”
29Jisu halatum aphan pulo, “Neli nanglitum aphan eson alam nang-arjulang. Nangtum jongsi neliphan la nethanlo tangte, nelita, neli lahei hei keklemji aphan kopi ahukum long-loma, la nangtum aphan nangthanpo. 30Jon baptisom kepiji ajakong konat pensi long-loma? Sining pen ma, mate monit penma?”
31Ansi halatum angbong lam chedanseisi pulo, “Etum kopisi pu apot-loma! Etum jongsi, ‘Sining pen,’ pule pulote alangli pupo, ‘Tangte nangtum kopi apotsi alangliphan kroikredet-loma?’ 32Bonta ilitum jongsi ‘Monit pen, pule pulo tangte...’” (Halatum armu atum aphan pherelo, pima kadokave atumta Jon ke inut Arnam ahok amontrilo pusi mathalo.) 33Lasi halatum Jisu aphan thakdunsi pulo, “Nelitum chinine.”
Jisu halatum aphan pulo, “Tangte neli kopi ahukum longsi lahei hei klemloma, lake nelita nanglitum aphan thanthelo.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MARK 11: KARBIBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
