Luke 18

Na Vosa Vakatautauvata Baleta na Yada kei na Turaganilewa

1Sa qai tukuna o Jisu vei iratou na tisaipeli e dua na vosa vakatautauvata me vakatavulici iratou me ratou dau masu tikoga ka kakua ni yalolailai. 2A sa kaya, “E a tiko voli ena dua na koro e dua na turaganilewa ka sega ni dau rerevaka na Kalou se dokai ira na tamata. 3A tiko talega ena koro o ya e dua na yada ka dau lako wasoma yani ki vua ni sa dau valataka na nona dodonu, ena nona kaya vua, ‘Mo ni vukei au mada ena noqu veisaqasaqa kei na noqu meca!’ 4Ena dua na gauna balavu sa sega ni via cakava kina na turaganilewa e dua na ka, ia sa qai kaya vakaoqo e lomana e muri, ‘E dina ga ni'u sega ni rerevaka na Kalou se doka na tamata, 5ia ena vuku ni nona sa vakasosataki au tikoga kina na yada oqo, au na raica me soli vakaidina vua na nona dodonu. Kevaka e segai, ena vakaocai au ga baleta ni na lako tikoga mai vei au.’ ”

6Sa qai vakuria na Turaga ka kaya, “Dou rogoca vinaka na ka e kaya na turaganilewa i vakarau ca o ya. 7Ena qai sega li ni vakatauca na Kalou na lewa dodonu ka vinaka vei ira na nona digitaki era sa dau tagi vua ena siga kei na bogi? Ena berabera li na kena yaco mai na nona veivuke?#Sr 35.19 8Au sa kaya oqo vei kemudou, ena yaco vakatotolo vei ira na nona vakataulewa dodonu ka vinaka. Ia ni sa lako mai na Luve ni Tamata, ena kunea li e vuravura na vakabauta?”

Na Vosa Vakatautauvata Baleta na Farisi kei na Daukumuni i Vakacavacava

9Sa qai tukuna talega na vosa vakatautauvata oqo o Jisu vei ira eso era vakabauti ira ga vakai ira ni ra sa tamata dodonu, ka beci ira na tani. 10“E rau a lako cake ki na valenisoro e lewe rua na tamata me rau la'ki masu: e dua e Farisi, ka dua e daukumuni i vakacavacava.

11“A sa tucake vakatikitiki tu na Farisi ka masu vakai koya vakaoqo, ‘Kemuni na Kalou, au vakavinavinaka vei kemuni ni'u sa sega ni tamata kocokoco, se dauveivakaisini, se dauyalewa, me vakataki ira na vo ni tamata. Au sa vakavinavinaka ni'u sa sega ni vakataki koya na daukumuni i vakacavacava o ya. 12Au dau lolo vakarua ena veimacawa, ka'u dau solia na i katini ni veika kece au rawata.’

13“Ia o koya na daukumuni i vakacavacava, ni sa tucake vakayawa sara tu yani, ka sa sega mada ga ni via tacake ki lomalagi, ia sa tavitavia ga na lomaserena ka kaya, ‘Kemuni na Kalou, ni qai lomani au mai, ni'u sa tamata i valavala ca! 14Au sa tukuna oqo vei kemudou, a sa vakadonui mai vua na Kalou o koya na daukumuni i vakacavacava ni sa suka lesu ki na nona vale, ka sega ni o koya na Farisi. O ira kece sa vakalevulevui ira era na vakayalomalumalumutaki, kei ira kece era sa vakayalomalumalumutaki ira era na vakalevulevui.”#Maciu 23.12; Luke 14.11

Sa Vakalougatataki Ira na Gone Lalai o Jisu

(Maciu 19.13-15; Mari 10.13-16)

15Era a qai kauti ira yani na gone lalai eso na tamata kivei Jisu me tarai ira. Ia ni ratou sa raica na tisaipeli, e ratou sa qai karalaki ira. 16Ia sa kacivi ira ga vua na gone o Jisu, ka kaya, “Laivi ira na gone lalai me ra lako mai vei au, ka kakua ni tarovi ira, ni sa nodra na gone vakaoqo na matanitu ni Kalou. 17Au sa kaya vakaidina vei kemudou, o koya ena sega ni ciqoma na matanitu ni Kalou me vaka na gone lailai ena sega ni curu kina.”

Na Tamata Vutuniyau

(Maciu 19.16-30; Mari 10.17-31)

18A sa tarogi Jisu e dua na nodra turaga na Jiu, “Vakavuvuli vinaka, na cava me'u cakava me'u taukena kina na bula tawamudu?”

19Sa qai kaya vua o Jisu, “Na cava o vakatokai au kina ni'u vinaka? Sa sega ni dua e vinaka, na Kalou duadua ga. 20O sa kila na i vakaro: ‘Mo kakua ni ia na veibutakoci; mo kakua ni laba; mo kakua ni butako; mo kakua ni veibeitaki vakailasu; mo vakarokoroko vei rau na tamamu kei na tinamu.’ ”#Lako 20.14; Vrua 5.18; Lako 20.13; Vrua 5.17; Lako 20.15; Vrua 5.19; Lako 20.16; Vrua 5.20; Lako 20.12; Vrua 5.16

21Sa qai kaya na turaga o ya, “A veika kecega oqori au sa dau muria tiko mai na gauna au a se gone kina ka yacova mai oqo.”

22Ni sa rogoca o ya o Jisu, sa qai kaya vua, “E dua ga na ka e se vo tiko vei iko. Volitaka na ka kecega era tu vei iko, ka veivotayaka vei ira na dravudravua na kena i lavo; o na qai vakaiyau mai lomalagi. Ka mo qai lako mai o iko, ka muri au.” 23Ia ni sa rogoca na turaga o ya na ka oqo, sa rarawa sara vakalevu na lomana, baleta ni sa rui levu na nona i yau.

24A sa raica o Jisu na nona yalo rarawa, ka sa kaya, “Sa dredre dina sara vei ira na tamata vutuniyau me ra curu ki na matanitu ni Kalou! 25Ni sa rawarawa cake me curuma na mata ni cula na kameli, ka dredre me curuma na Matanitu ni Kalou na tamata vutuniyau.”

26Era sa qai kaya o ira ka rogoca, “O cei beka ga ena qai vakabulai rawa?”

27Sa qai kaya o koya, “Na ka sa sega ni rawa vei ira na tamata, sa rawa vua na Kalou.”

28Sa qai kaya vua o Pita, “Ni raica, keitou sa biuta na veika kecega e neitou ka muri kemuni.”

29Sa qai kaya vei iratou o koya, “Au sa kaya vakaidina vei kemudou, e sega ni dua na tamata e sa biuta na nona vale, se watina, se tuakana se tacina, se oi rau na nona i tubutubu, se o ira na luvena ena vuku ni Matanitu ni Kalou, 30me na qai sega ni rawata vakalevu cake na ka ena bula oqo, ka vakakina na bula tawamudu ena gauna sa bera mai.”

Na i Katolu ni gauna e Tukuna Kina o Jisu na Nona Mate

(Maciu 20.17-19; Mari 10.32-34)

31Sa qai kauti iratou na lewe tinikarua o Jisu, ka kaya vei iratou, “Raica, tou sa vakarau lako cake ki Jerusalemi, ka sa na la'ki vakayacori kina na veika kecega era a vola tu na parofita me baleta na Luve ni Tamata. 32Ena soli o koya vei ira na kai tani, ka na vakalialiai, ka vakamaduataki, ka kasiviti. 33Era na vakanakuitataka ka vakamatea, ia ena tucake tale o koya ena i katolu ni siga.”

34Ia e ratou sa sega ni kila rawa na tisaipeli na veika oqo. E a vunitaki vei iratou na i balebale ni vosa o ya, ka ratou a sega kina ni kila rawa na ka e tukuni.

Sa Vakabula o Jisu na Mataboko Daukerekere

(Maciu 20.29-34; Mari 10.46-52)

35Ni sa volekati Jeriko yani o Jisu, sa dabe toka ena yasa ni sala e dua na tamata mataboko, ka kerekere tiko. 36Ena nona rogoci ira na lewe vuqa ni ra sa lako tiko e yasana, sa taroga sara, “Na cava oqo?”

37Era sa qai kaya vua, “E lako tiko mai oqo o Jisu na kai Nasareci.”

38Sa qai kaci o koya ka kaya, “I Jisu, na Luve i Tevita, ni lomani au mai!”

39Era sa qai vosataki koya o ira na tiko e liu, ka kaya vua me tiko lo; ia sa qai kaci vakalevu cake ga ena domoilevu, “Na Luve i Tevita! Ni lomani au mai!”

40A sa tu vakadua o Jisu, ka vakarota me kau yani vua o koya. Ia ni sa lako voleka yani vua, sa qai tarogi koya ka kaya, 41“Na cava o vinakata me'u cakava vei iko?”

Sa qai kaya o koya, “Turaga, me'u rai rawa tale mada.”

42Sa kaya vua o Jisu, “Mo rai rawa! Sa vakabulai iko na nomu vakabauta!”

43A vakasauri ga ni sa rai rawa tale o koya, ka sa muri Jisu, ka vakacaucautaka na Kalou. Ia ni ra sa raica oqo na tamata kecega, era sa vakavinavinaka kecega vua na Kalou.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luke 18: FNVDC12

Highlight

ಶೇರ್

ಕಾಪಿ