Luke 17
17
Na i Valavala ca
(Maciu 18.6-7,21-22; Mari 9.42)
1Sa qai kaya vei iratou na nona tisaipeli o Jisu, “Ena yaco dina ga na veivakacalai, ia sa na kalouca o koya e vakavuna! 2Ena vinaka cake vua kevaka sa vakarubeci e domona e dua na vatu i qaqi levu, ka biu ki wasawasa, ka ca ni vakacala e dua vei ira na lalai oqo. 3Dou qarauni kemudou vinaka!
“Kevaka e cala vei iko e dua na wekamu, vunauci koya; ia kevaka sa veivutuni, kakua ni cudruva.#Maciu 18.15 4Ia kevaka e cala vakavitu vei iko o koya ena dua na siga, ka saumaki vakavitu vei iko, ka kaya, ‘Au sa veivutuni,’ ia kakua ni cudruva.”
Na Vakabauta
5E ratou sa qai kaya na i apositolo vua na Turaga, “Ni vakalevutaka na neitou vakabauta!”
6Sa qai kaya na Turaga, “Kevaka e tu vei kemudou na vakabauta lailai sara me vaka na sore ni musita, e rawa mo dou kaya ki na vunilolo oqo, ‘Cavu i vuvu mai, ka la'ki tei ena loma ni wasawasa,’ ena talairawarawa vei kemudou na vunilolo.
Na i Tavi Vakadauveiqaravi
7“O cei beka vei kemudou ena tukuna vakaoqo vua na nona dauveiqaravi ka se qai lesu tikoga mai na siviyara se vakatawa sipi, ‘Lako sara mai vakatotolo ka dabe mo kana?’ 8Sa segai sara! Ia, o na kaya beka ga vua, ‘Mo vakarautaka mada na kequ i vakayakavi, ka daramaka na nomu i sulu ni veiqaravi ka qaravi au me'u kana mada ka gunu; ni sa oti o ya, mo qai kana o iko’ 9E sega ni dau vakavinavinakataki na dauveiqaravi ena vuku ni nona muri lewa, se vakaevei? 10Me vaka talega kina oqo vei kemudou; ni dou sa vakayacora na ka kecega sa vakaroti vei kemudou, mo dou qai kaya, ‘Keitou sa tamata dauveiqaravi ga; keitou sa cakava ga na neitou i tavi.’ ”
Sa Vakasavasavataki Iratou e Tini na Vukavuka o Jisu
11Ena i lakolako i Jisu ki Jerusalemi, sa lakova kina na loma i Samaria kei Kalili. 12Ia ni sa curu o koya ki na dua na koro, sa sota kina kei na lewe tini na tamata vukavuka. E ratou tu vakayawa tu yani; 13ka ratou kaci vua ka kaya, “I Jisu, na Turaga, ni yalololoma mai vei keitou!”
14A sa raici iratou o Jisu ka sa kaya vei iratou, “Dou lako ka la'ki raici ira na bete me ra vakadikevi kemudou.”#Vsoro 14.1-32
Ni ratou se lako tikoga, e ratou sa qai vakasavasavataki sara. 15Ni sa raica e dua vei iratou ni sa vakabulai, sa lesu tale vua, ka vakacaucautaka na Kalou ena domo levu. 16A sa bale sobu ki na qele ena mata i Jisu, ka vakavinavinaka vua. A sa kai Samaria na tamata oqo. 17Sa qai kaya o Jisu, “E sega li ni lewe tini e ratou a vakasavasavataki? Sa evei ga o iratou na lewe ciwa? 18A cava na vuna e lesu duadua ga mai kina na kai tani oqo me vakavinavinaka vua na Kalou?” 19Sa qai kaya vua o Jisu, “Tucake, ka lako; sa vakabulai iko na nomu vakabauta.”
Na Lako mai ni Matanitu ni Kalou
(Maciu 24.23-28,37-41)
20Ena dua na gauna era a tarogi Jisu kina na Farisi se na yaco mai ena gauna cava na matanitu ni Kalou. E a qai sauma vei ira o koya, ka kaya, “Ena sega ni yaco mai na matanitu ni Kalou ena sala eso me laurai kina. 21Ena sega ni rawa vua e dua me kaya, ‘Raica, sai koya oqo!’ se, ‘Sa tu mai o ya!’; baleta ni sa tu ga na matanitu ni Kalou ena lomamudou.”
22Sa qai kaya vei iratou na tisaipeli, “Ena yaco mai na gauna dou na gadreva kina mo dou raica e dua na nona siga na Luve ni Tamata, ia dou na sega sara ni raica. 23Era na tiko eso era na kaya vei kemudou, ‘Raica, ena vanua o ya!’ se, ‘Raica, ena vanua oqo!’ Ia dou kakua sara ni lako ka vakasaqaqara. 24Me vaka na livaliva sa tibi kosova na lomalagi ka vakararamataka mai na dua na yasana ki na dua tale, ena vaka talega kina na Luve ni Tamata ena nona siga. 25Ia ena vosota mada e liu o koya na veika rarawa e vuqa, ka ra na besetaki koya na i tabatamata oqo. 26Me vaka sa yaco ena gauna i Noa, ena vaka talega kina ena gauna ni Luve ni Tamata.#Vteki 6.5-8 27Era a kana tiko, ka gunu, ka vakawati, ka veimusumusuki me ra vakawati, ka yacova na siga sa vodoka kina na waqa o Noa. Sa qai lako yani na waluvu ka vakarusai ira kecega.#Vteki 7.6-24 28Ena tautauvata talega kei na gauna i Loti. Era a kana tiko, ka gunu, ka veivoli; era a teitei, ka tara vale.#Vteki 18.20–19.25 29Ia ena siga sa biuti Sotoma kina o Loti, sa tau mai lomalagi na bukawaqa kei na sulifure ka vakamatei ira kecega. 30Ena vaka o ya ena siga ena vakatakilai kina na Luve ni Tamata.
31“Ena siga o ya, o koya e tiko ena dela ni vale, ka tu na nona i yaya e loma ni vale, me kakua ni lako sobu me la'ki kauta mai; ka vakakina o koya e tu mai na vanua ni teitei, me na kakua ni lesu tale ki vale.#Maciu 24.17,18; Mari 13.15,16 32Dou nanuma na wati Loti!#Vteki 19.26 33O koya yadua sa via saga me maroroya na nona bula ena vakayalia; ia o koya sa vakayalia na nona bula ena maroroya.#Maciu 10.39; 16.25; Mari 8.35; Luke 9.24; Joni 12.25 34Au sa tukuna vei kemudou, ena bogi o ya, e rau na davo tu e lewe rua na tamata ena dua na i davodavo: ena kau tani e dua, ka biu tu mai na kena i karua. 35E rau na qaqi sila vata tiko e lewe rua na yalewa: ena kau tani e dua ka biu tu na kena i karua. 36E rau na tiko ena i teitei e rua na tagane, ena kau tani e dua ka biu tu mai na kena i karua.”
37E ratou sa qai kaya vua, “Turaga, ki na vanua cava?”
Sa qai sauma o Jisu ka kaya, “Ena vanua sa koto kina na yago ni tamata mate, era na soqoni talega yani kina na vulituri.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luke 17: FNVDC12
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
