Joni 9

Sa Vakabula o Jisu e Dua ka Sucu Mataboko

1Ia ni sa lako tu yani o Jisu, sa raica sara e dua na tamata ka a sucu mataboko. 2E ratou a qai tarogi koya na nona tisaipeli, ka kaya, “Vakavuvuli, o cei sai valavala ca, ka mani sucu mataboko kina na tamata oqo, o koya se oi rau na nona qase?”

3Sa qai sauma o Jisu ka kaya, “E a sega ni valavala ca o koya oqo, se oi rau na nona qase, ia sa mataboko ga me na vakatakilai kina na kaukauwa mana ni Kalou ena vukuna. 4Sa dodonu me da cakava tiko na cakacaka i koya sa talai au mai ni se siga toka; sa voleka mai na bogi, ena sega ni cakacaka rawa kina e dua na tamata. 5Ni'u sa tiko e vuravura, au sa rarama kei vuravura.”#Maciu 5.14; Joni 8.12

6Ni sa vosa oti vaka o ya, sa qai kasivita na qele o Jisu ka ulia vata na soso kei na kasivi, ka boroya kina na mata i koya na tamata mataboko. 7Sa qai kaya vua, “Mo lako ka la'ki savata na matamu ena i Sisili o Sailoama.” (Na yaca o ya e kena i balebale, “Sa Talai”.) Sa qai lako yani o koya, a sa savata na matana, ka sa rai rawa na matana ni sa lesu mai.

8Era sa qai kaya na lewenikoro kei ira ka a raica na nona dau kerekere tu e liu, “E sega li ni o koya oqo na tamata ka dau kerekere voli ni dabe toka?”

9Era sa kaya eso, “O koya dina oqo.” Eso tale era kaya, “E segai, e vakataki koya ga.”

Sa qai kaya tikoga o koya, “Sa i au dina ga oqo.”

10Era sa qai kaya vua, “O sa qai rai rawa ga vakacava?”

11Sa qai sauma o koya, ka kaya, “Na tamata ka yacana o Jisu, a sa ulia na soso, ka boroya kina na mataqu, ka kaya vei au, ‘Lako ki Sailoama, ka la'ki tavoi kina.’ Ia ni'u sa tavoi oti, ka'u sa qai rai rawa.”

12Era sa qai kaya vua, “Ia sa evei ga oqo o koya?”

Sa qai kaya o koya vei ira, “Au sa sega ni kila.”

Era Vaqaqa Matua na Farisi na Nona Vakabulai

13Era sa qai kauti koya ka a mataboko tu e liu vei ira na Farisi. 14Ia na siga ka a ulia kina na soso o Jisu, ka vakabulai koya mai na nona mataboko, a sa Siga ni Vakacecegu. 15Era sa qai tarogi koya tale na Farisi se a qai rai rawa vakacava. Sa qai kaya vei ira o koya, “E a boroya na mataqu o koya ena qele, ka'u tavoi, ka'u sa mani rai rawa.”

16Era sa qai kaya eso vei ira na Farisi, “E sega ni lako mai vua na Kalou na tamata oqo, ni sega ni vakatabuya na Siga ni Vakacecegu.”

Era sa qai kaya eso tale, “E cakava rawa ga vakacava na cakacaka mana vakaoqo e dua na tamata i valavala ca?” Era sa mani veidre kina.

17Era sa qai kaya tale vua na tamata mataboko, “Me vaka ni a vakabulai iko o koya mai na nomu mataboko, a cava sara mada sa kaya o iko me baleti koya?”

Sa qai kaya o koya, “O koya e dua na parofita.”

18Ia era sega tikoga ni vakadinata o ira na nodra i liuliu na Jiu ni a mataboko e liu o koya ka ni sa qai rai rawa oqo, me yacova ni ra sa kacivi rau na nona i tubutubu 19ka tarogi rau, ka kaya, “Oqo li na luvemudrau, o drau kaya ni a sucu mataboko? Ia sa qai rai rawa vakacava oqo?”

20E rau sa qai sauma na nona i tubutubu ka kaya, “Keirau kila ni luve i keirau oqo, ka kila talega ni a sucu mataboko. 21Ia na nona sa qai rai oqo, keirau sa sega ni kila. Keirau sega talega ni kila se o cei ka a vakabulai koya mai na nona mataboko. Ni tarogi koya ga. Sa tamata bula o koya ka na rawa ni vakamacalataka ga vakai koya.” 22E rau a vosa vaka o ya na nona i tubutubu ni rau rerevaki ira na nodra i liuliu na Jiu; ni ra a sa lomavata oti me na vakatabui ni tiko tale ena nodra valenilotu o koya sa vakabauti Jisu ni sai koya na Mesaia. 23O ya na vuna e rau a kaya kina na nona i tubutubu, “Sa tamata bula o koya; mo ni tarogi koya ga!”

24Era sa qai kaciva tale na tamata ka a mataboko e liu ka kaya vua, “Yalataka mada ena mata ni Kalou ni o na tukuna na ka dina! Keimami kila ni tamata i valavala ca o koya ka vakabulai iko.”

25Sa qai sauma o koya, ka kaya, “Au sega mada ni kila se tamata i valavala ca o koya se sega. A ka ga au kila, ni'u a mataboko e liu, ia oqo au sa rai rawa.”

26Era sa qai kaya tale vua, “A cava sara mada e cakava vei iko o koya? A cava e cakava mo rai rawa kina?”

27Sa qai kaya vei ira o koya, “Au a sa tukuna oti vei kemuni o ni qai sega ni vakarogoca. O ni via rogoca tale ena vuku ni cava? O ni sa via nona tisaipeli tale beka ga?”

28Era sa qai vakalialiai koya, ka kaya, “O iko ga o nona tisaipeli, oi keimami na tisaipeli i Mosese. 29Keimami kila ni a vosa vei Mosese na Kalou. Ia, na tamata ga oqo, keimami sega ni kila se sa lako mai vei.”

30Sa qai sauma na tamata o ya ka kaya vei ira, “Sa qai dua dina na i tukutuku levu oqori! O ni sa sega ni kila na vanua e lako mai kina, ia sa vakabulai au o koya mai na noqu mataboko! 31Eda sa kila ni sa sega ni dau rogoci ira na tamata i valavala ca na Kalou. Sa dau rogoci ira ga era sa rokovi koya ka cakava na lomana. 32Sa sega talega ni se bau rogoci mai na i tekivu kei vuravura ni sa cakava e dua na tamata me rai rawa tale e dua na tamata sa sucu mataboko. 33Kevaka sa sega ni lako mai vua na Kalou na tamata oqo, ena sega ni rawa vua me cakava e dua na ka.”

34Era sa qai sauma vua ka kaya, “O iko o a sucu ka susugi cake mai ena i valavala ca; ia o sa qai mai via vakatavulici keimami li vakaoqo?” Era sa qai vakasavi koya me kakua ni tiko tale ena nodra valenilotu.

Na Mataboko Vakayalo

35Ni sa rogoca o Jisu na veika sa yaco oqo, a sa qai sotavi koya na tamata o ya ka sa tarogi koya, “O sa vakabauta li na Luve ni Tamata?”

36Sa qai sauma o koya, ka kaya, “Ni tukuna saka mai se o cei o koya, me rawa ni'u vakabauti koya!”

37Sa qai kaya vua o Jisu, “O sa raici koya oti, ka sai koya ga o drau sa veivosaki vata tiko oqo.”

38Sa qai kaya o koya, “Turaga, au sa vakabauta!” A sa qai tekiduru sobu ena mata i Jisu.

39A sa kaya o Jisu, “Au sa lako mai ki vuravura me'u veilewai, me ra rai rawa o ira sa mataboko, ia me ra mataboko o ira sa rai.”

40Era a rogoca na ka oqo eso na Farisi era tiko vata kaya, ka ra taroga vua, “E sega ni kena i balebale o ya ni keitou sa mataboko talega oi keitou, se vakaevei?”

41Sa qai kaya o Jisu, “Kevaka dou sa mataboko, sa sega na nomudou cala; ia ni dou sa tukuna oqo ni dou sa sega ni mataboko, sa kena i balebale oqo ni sa tu ga na nomudou cala.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Joni 9: FNVDC12

Highlight

ಶೇರ್

ಕಾಪಿ