Joni 10

Na Vosa Vakatautauvata ni Bai ni Sipi

1Sa qai kaya o Jisu, “Au sa tukuna vakadodonu sara oqo vei kemudou, o koya e sega ni curu ena matamata ni bai ni sipi, ka kaba cake ga ena dua na sala tani, sai koya oqo na daubutako ka daukocokoco. 2Ia o koya sa curu ena matamata, sai koya oqo na i vakatawanisipi. 3Sa dau dolava vua na matamata o koya na kena i vakatawa; ka ra sa vakarogoca na domona o ira na sipi. Sa dau kacivi ira na nona sipi ena yacadra, ka liutaki ira ki tautuba. 4Ni sa kauti ira na nona sipi ki tautuba, sa liu tiko o koya ka ra sa muri koya na sipi, ni ra sa kila na domona. 5Ia era na sega ni muria e dua na vulagi, ka ra na dro tani ga mai vua, ni ra sega ni kila na domo ni vulagi.”

6E a tukuna vei ira na vosa vakatautauvata oqo o Jisu, ia era a sega ga ni kila na i balebale ni veika sa tukuna tiko vei ira.

O Jisu na i Vakatawa Vinaka

7Sa qai kaya tale vei iratou o Jisu, “Au tukuna vakadodonu sara vei kemudou, oi au na matamata ni bai ni sipi. 8O ira kece ka ra a liu mai vei au, era tamata dau butako ka dau kocokoco, ia era a sega ni vakarorogo vei ira o ira na sipi. 9Oi au na matamata. Kevaka ena curu kina e dua na tamata, ena vakabulai, ka na dau curu mai ka dau curu yani, ka na kune kakana. 10E sega ni dau lako wale tu ga mai na daubutako, e lako ga mai me mai butako, ka ravuravu, ka vakarusa. Au sa lako mai me rawa vei ira na bula, na bula e maucokona vinaka sara.

11“Oi au na i vakatawa vinaka; sa solia na nona bula na i vakatawa vinaka ena vukudra na sipi.#Sr 18.13 12Ia o koya e cakacaka saumi ga, me vaka ni sega ni vakatawa, ka sega ni taukeni ira na sipi, ena laivi ira tu ga na sipi ka dro ni sa raica na olifa ni sa lako tiko yani; sa na qai toqovi ira na sipi na olifa, ka veiseyakitaki ira. 13Sa dro o koya me vaka ni cakacaka saumi ga, ka sega sara ni dua na ka vua o ira na sipi. 14Oi au na i vakatawa vinaka: ka'u sa kilai ira na noqu, ka ra sa kilai au talega o ira na noqu; 15me vaka ga na nona kilai au na Tamaqu, kei na noqu kilai koya. Au sa solia na noqu bula ena vukudra na sipi.#Maciu 11.27; Luke 10.22 16Eso tale na noqu sipi era sa sega ni tiko ena bai oqo: sa dodonu me'u kauti ira tale mai, ka ra na vakarorogo ki na noqu vosa. Ena qai duabau ga na qele ni sipi, ka duabau ga na i vakatawa.

17“Sa lomani au o Tamaqu ena vuku ni noqu sa solia tu na noqu bula ka me'u na qai taura lesu tale e muri. 18E sega ni dua e mai kauta tani vei au, ka ni'u sa solia vakai au ga. Sa tu vei au na kaukauwa me'u solia, ka tu talega vei au na kaukauwa me'u taura lesu tale. Oqo na i vakaro sa vakarota vei au o Tamaqu.”

19Sa qai tubu tale e dua na veileti ena kedra maliwa na Jiu ena vuku ni veivosa o ya. 20Era kaya e lewe vuqa vei ira, “E curumi koya tiko e dua na tevoro, ka sa lialia; a cava o ni vakarogoci koya kina?”

21Eso tale era kaya, “Na tamata e curumi tevoro e sega ni vaka tu oqo na nona vosa; e rawata beka e dua na tevoro me vakabula na mata ni tamata mataboko?”

Era sa Besetaki Jisu o ira na Jiu

22Sa donuya na vula i liliwa, ka sa marautaki mai Jerusalemi na Solevu ni Vakatabui ni Valenisoro.#1M 4.36,52-59; 2M 1.18; 10.5 23Ni sa lako voli o Jisu ena Varada i Solomoni ena Valenisoro, 24era sa qai vakasoqoni yani na Jiu ki vua ka tarogi koya, “Na cava o laiva vakadede tiko kina me keimami lomatarotaro tiko vakaoqo? Tukuna mai na ka dina: o iko li na Mesaia?”

25Sa qai sauma vei ira o Jisu, ka kaya, “Au a sa tukuna oti vei kemuni, ia o ni qai sega ni vakabauti au. Na veicakacaka ka'u sa cakava ena yaca i Tamaqu era sa vakadinadinataki au; 26ia o ni sa sega ga ni vakabauta, baleta ni o ni sa sega ni noqu sipi. 27Era sa rogoca na domoqu o ira na noqu sipi; au sa kilai ira, ka ra sa muri au. 28Au sa solia vei ira na bula tawamudu, ka ra na sega sara ni mate. Ena sega ni dua me na kaliraki ira tani rawa mai ligaqu. 29Sa uasivi cake mai na ka kecega na veika sa solia vei au o Tamaqu, ka sa sega ni rawa vua e dua me kaliraka tani mai na liga i Tamaqu.#Ym 3.1 30Keirau sa duabau ga kei Tamaqu.”

31Era sa qai tomi vatu tale o ira na Jiu me ra vakaviriki koya. 32Sa qai kaya vei ira o Jisu, “Au sa vakaraitaka oti vei kemuni e vuqa na cakacaka vinaka mai vei Tamaqu. Ia evei vei ira na cakacaka oqo o ni sa via vakaviriki au kina?”

33Era sa qai kaya vua o ira na Jiu, “Keimami sa sega ni via vakaviriki iko ena vuku ni cakacaka vinaka, ia ena nomu vosa vakacacataka ga na Kalou! O iko o sa tamata walega, ia o sa qai via cakava vakaoqo mo Kalou!”#Vsoro 24.16

34Sa qai kaya vei ira o Jisu, “E sega li ni volai tu ena nomuni Lawa ni sa kaya na Kalou, ‘Dou sa kalou’?#Same 82.6 35Kevaka sa vakatokai o ira era sai dewadewa ni vosa ni Kalou me ra ‘kalou’, ka sa dina tikoga na i Vola Tabu, 36mo ni qai kaya rawa li vakaevei ni sa vosa vakacacataka na Kalou o koya ka sa vakasavasavataka ka tala mai ki vuravura na Kalou, baleta ni'u sa kaya, ‘Oi au na Luve ni Kalou’? 37Kevaka au sa sega ni cakava tiko na cakacaka i Tamaqu, mo ni kakua ni vakabauti au. 38Ia kevaka ka'u sa vakayacora tiko, ka dina ga ni o ni sega ni vakabauti au, ia mo ni vakadinata mada ga na noqu cakacaka, mo ni kila rawa kina ka vakadinata ni sa tiko vei au o Tamaqu, ka'u sa tiko vei Tamaqu oi au.”

39Era a tovolea tale me ra vesuki koya; ia sa lako tani o koya mai na nodra sasaga.

40Sa qai lako tale o koya ki na tai kadua ni Joritani, ki na vanua ka a dau veipapitaisotaki kina e liu o Joni; ka la'ki tiko kina.#Joni 1.28 41Era sa qai lako yani vua na lewe vuqa. Era sa kaya, “E a sega ni cakava e dua na cakacaka mana o Joni, ia sa dina kecega na veika sa kaya me baleta na tamata oqo.” 42Era sa lewe vuqa era sa vakabauti koya mai kea.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Joni 10: FNVDC12

Highlight

ಶೇರ್

ಕಾಪಿ