Cakacaka 7

Na Vosa i Sitiveni

1Sa qai kaya na Bete Levu, “E vakaevei, e dina li na veika oqo se segai?”

2Sa qai kaya o Sitiveni, “Oi kemuni na veiwekani kei kemuni na qase, mo ni rogoci au mada! E a rairai na Kalou lagilagi vei Epara-ama, na noda qase, ni a sa tiko o koya mai na vanua o Mesopotemia, ni bera ni la'ki vakaitikotiko ki na koro o Arana.#Vteki 12.1 3E a kaya vua, ‘Biuta na nomu vanua kei ira na wekamu ka lako ki na vanua ka'u na vakatakila vei iko.’ 4Sa qai biuta na nodra vanua na kai Kalidia o koya ka la'ki tiko mai Arana. Ni sa mate na tamana, sa qai kauti koya maikea na Kalou ki na vanua o ni sa qai mai bula tiko kina oqo.#Vteki 11.31; Vteki 12.4 5Ia sa se sega mada ni solia kina vua e dua na tikina me taukena, e sega mada ga ni solia vua na vanua e butuka tu. Ia e sa yalataka tu ga me na qai solia vua me taukena kei ira talega na nona kawa mai muri. Ena gauna e yalataka kina na ka oqo na Kalou vei Epara-ama, e se sega kina ni dua na luvena.#Vteki 12.7; 13.15; 15.18; 17.8 6Oqo na ka sa kaya vua na Kalou, ‘Era na tiko vulagi na nomu kawa ena dua na vanua tani, ka ra na la'ki vakabobulataki ka vakararawataki kina me 400 na yabaki.#Vteki 15.13,14 7Ia au na qai lewai ira na lewe ni matanitu era na vakabobulataki kina. Ni oti o ya era na qai lako tani mai kina ka mai qaravi au ena vanua oqo.’#Lako 3.12 8E tarava o ya na nona sa qai solia vei Epara-ama na Kalou na i valavala ni veicilivi me i vakatakilakila ni nona veiyalayalati. O koya oqo, ni sa sucu mai o Aisake na luvena, sa cilivi koya sara ena i kawalu ni siga. Sa qai tama i Jekope o Aisake, ka tamadra na qase e tinikarua o Jekope.#Vteki 17.10-14; Vteki 21.2-4; Vteki 25.26; Vteki 29.31–35.18

O Iosefo

9“E ratou a mani vuvutaki Iosefo o iratou na qase ka volitaki koya ki Ijipita. Ia sa sega ni biuti koya na Kalou.#Vteki 37.11; Vteki 37.28; Vteki 39.2,21 10E a vakabulai koya mai na nona veileqa kece sara, ka solia vua na veivakalougatataki kei na vuku ena mata i Fero, na tui Ijipita. A mani lesi koya o Fero me kovana, me lewai Ijipita kei ira kece talega na lewe ni nona matavuvale.#Vteki 41.39-41 11“E a qai tubu e dua na dausiga kei na leqa levu mai Ijipita taucoko kei Kenani, ka ra a sega ni kunea rawa e dua na kakana o ira na noda qase.#Vteki 42.1,2 12Ia ni sa rogoca o Jekope ni tiko na sila mai Ijipita, sa mani talai ira kina na noda qase ena kena i matai ni gauna. 13Ena kena i karua ni gauna sa qai vakatakilai koya kina o Iosefo vei iratou na tuakana, ka sa qai kilai kina vua na Fero na vuvale i Iosefo.#Vteki 45.1; Vteki 45.16 14Sa qai talatala o Iosefo me lakovi o Jekope na tamana kei ira talega na nona vuvale taucoko; era lewe vitusagavulu ka lima kece.#Vteki 45.9,10,17,18; Vteki 46.27 (LXX) 15Sa mani lako sobu ki Ijipita o Jekope, ka la'ki mate kina. E a mate o koya kei ira talega na noda qase.#Vteki 46.1-7; Vteki 49.33 16Sa qai kau cake ki na koro o Sikemi na yagodra ka ra la'ki vakotori ena i bulubulu ka a volia o Epara-ama ena so na tiki ni siliva mai vei ira na luve i Emori mai Sikemi.#Vteki 23.3-16; 33.19; 50.7-13; Josua 24.32

O Mosese

17“Ni sa voleka mai na gauna me vakayacori kina na yalayala, ka a bubului kina na Kalou vei Epara-ama, sa tubu vakalevu na kedra i wiliwili na noda mai Ijipita,#Lako 1.7,8 18ka yacova na gauna e buli kina e dua tale na tui Ijipita, ka a sega ni kilai Iosefo. 19E a veidabuitaki ira na noda o koya, ka vakasaurarataki ira na noda qase me ra biuti ira na nodra gone lalai ki tautuba, me ra kakua kina ni bula.#Lako 1.10,11; Lako 1.22 20Sa i koya na gauna o ya ka a sucu kina o Mosese, e dua na gone mata vinaka. A sa susugi voli ena vale nei tamana me vula tolu.#Lako 2.2 21Ia ni sa biu tani mai na nona vale, sa qai kauti koya na luve i Fero yalewa ka susuga me luvena.#Lako 2.3-10 22A vakatavulici Mosese ena nodra kila-ka kecega na kai Ijipita, ka sa yaco me tamata kaukauwa ena vosa kei na cakacaka.

23“Ni sa yabaki vasagavulu o Mosese, sa qai tubu mai e lomana me la'ki sikovi ira mada na wekana, na luve i Isireli.#Lako 2.11-15 24A sa raica sara e dua vei ira na Isireli ni vakararawataki koya tiko e dua na kai Ijipita. Sa qai la'ki vukei koya o Mosese ka sauma lesu na veivakararawataki o ya, ka sa vakamatea na kai Ijipita. 25E nanuma ga o koya ni ra sa na kila tiko na wekana ni na vakayagataki koya na Kalou me ra sereki kina, ia era sa sega ga ni kila. 26Ena siga ka tarava, sa raica ni rau veivala tiko e rua na Isireli, ka mani via la'ki vakameautaka na nodrau leqa, ka kaya, ‘Kemudrau na turaga, oi kemudrau o drau Isireli vata ga, a cava o drau qai veivala tiko kina?’ 27Sa qai biliraki Mosese tani o koya ka a mokulaka tiko na wekana, ka kaya, ‘O cei e sa lesi iko mo i liuliu ka mai vakatau lewa vei keimami? 28O via vakamatei au beka me vaka o a vakamatea na kai Ijipita o ya ena noa?’ 29Sa qai dro o Mosese ena vuku ni vosa o ya, ka la'ki tiko vulagi voli ena vanua o Mitiani, ka mani sucu kina e rua na luvena tagane.#Lako 18.3,4

Sa Vosa vei Mosese na Kalou

30“Ni sa oti e vasagavulu na yabaki, sa qai rairai vei Mosese e dua na agilosi ena vanua lala volekata na Ulunivanua o Saineai. E rairai vua ena yameyame ni buka ena dua na vunikau.#Lako 3.1-10 31E a kurabui o Mosese ena ka e raica, ka mani lako voleka kina me vakaraica vinaka. Ia sa rogo vua na domo ni Turaga ni sa kaya, 32‘Oi au na nodra Kalou na nomu qase, na Kalou i Epara-ama, i Aisake, kei Jekope talega.’ A sautaninini na yago i Mosese, ka sa rere ni rai kina. 33Sa qai kaya vua na Turaga, ‘Luvata tani na nomu i vava mai na yavamu, ni sa qele tabu na vanua o sa tu kina. 34Au sa raica, au sa raica dina sara, na nodra vakararawataki tiko na noqu tamata era tiko mai Ijipita. Au sa rogoca na nodra vutugu, ka'u sa lako yani oqo me'u vakabulai ira. Lako mai me'u na mai talai iko ki Ijipita.’

Era sa Biuti Ijipita na Isireli

35“O Mosese o ya, o koya era a besetaka, ka kaya, ‘O cei sa lesi iko mo i liuliu ka mo mai vakataulewa vei keimami?’ sai koya ga ka a qai talai koya na Kalou me liutaki ira ka vakabulai ira, ena veivuke ni agilosi ka a rairai vua ena vunikau kama.#Lako 2.14 36E a kauti ira tani mai Ijipita o koya, ni sa cakava oti na veika veivakurabuitaki kei na cakacaka mana eso ena vanua o Ijipita kei na Wasa Damudamu, kei na vanua lala ena vasagavulu na yabaki.#Lako 7.3; Lako 14.21; Tiko 14.33 37Sa i Mosese ga o ya ka a kaya vei ira na Isireli, ‘Ena vakatubura na Kalou e dua na nomuni parofita, mai vei kemuni ga vakaikemuni, me vakataki au.’#Vrua 18.15,18 38Sa i koya ga ka a tiko kei ira na i vavakoso lewenilotu ena vanua lala vata kei na agilosi ka a vosa vua kei ira na noda qase ena Ulunivanua o Saineai. Sa i koya talega ka ciqoma na i vunau bula me soli vei keda.#Lako 19.1–20.17; Vrua 5.1-33

Era sa Talaidredre na Isireli Vua na Kalou

39“Era a bese ni muria na nona vosa o ira na noda qase; era a biliraki koya tani ka ra gadreva me ra lesu tale ki Ijipita. 40Ia era a qai kaya vei Eroni, ‘Cakava mada eso na noda kalou me ra mai liutaka na noda i lakolako. O Mosese oqo, o koya ka a kauti keda tani mai na vanua o Ijipita, eda sa sega ni kila se cava sa yaco vua.’#Lako 32.1 41Era sa qai cakava e dua na matakau, a i vakatakarakara ni dua na luve ni bulumakau tagane, ka ra sa vakacaboisoro kina. Era sa qai cakava e dua na kena soqo ni marau me vakalagilagi kina na cakacaka ni ligadra.#Lako 32.2-6 42Sa qai vakanadakui ira kina na Kalou ka laivi ira me ra sokalou ki na veikalokalo ni lomalagi, me vaka sa volai tu ena nodra i vola na parofita:

‘Oi kemuni na Isireli! Sa sega ni cabori vei au

Na manumanu tabu o ni sa vakamatea me vakacabori

Ena loma ni vasagavulu na yabaki mai na vanua lala.#Emo 5.25-27 (LXX)

43Ia sai koya ga na valelaca i Moloke o ni kauta voli,

Kei na i vakatakarakara i Refani, na nomuni kalou kalokalo;

Sa i ira oqori na veikalou tani o ni sa cakava mo ni qarava.

O koya oqo ka'u na vakatalai kemuni tani kina vakavesu ki na daku ni yalayala kei Papiloni.’

44“O ira na noda qase sa tiko vei ira na valelaca ni Kalou ena loma ni vanua lala. E a caka na vale o ya me vaka na ka sa vakarota na Kalou vei Mosese, o ya me cakava me vaka na kena i vakatakarakara sa vakaraitaki oti vua.#Lako 25.9,40 45E muri, ni sa dewa mai na valelaca vei ira na noda qase era sa qai kauta tiko mai ni ra sa lako vata mai kei Josua ena nodra sa mai tawana na nodra vanua na veimatanitu ka a sa vakasavi ira na Kalou ena nodra sa toso tiko mai na noda qase. Ia sa mani mai tiko ga e kea me yacova na gauna i Tevita.#Josua 3.14-17 46E a kune loloma o Tevita e mata ni Kalou, ka mani kerea me nona i tavi e dua na vale me i tikotiko ni Kalou i Jekope.#2Samu 7.1-16; 1Vei 17.1-14 47Ia na vale o ya sa qai tara o Solomoni.#1Tui 6.1-38; 2Vei 3.1-17

48“Ia e sega ni tiko o koya sa Cecere Sara ena veivale sa caka ena liga; me vaka e kaya na parofita:

49‘Sa noqu i tikotiko vakatui o lomalagi, sa kaya na Turaga,

Ka sai tutu ni yavaqu o vuravura.

A mataqali vale vakacava o ni na tara me noqu?

Se na vanua cava me'u na vakacegu kina?#Aisea 66.1,2

50E sega li ni a cakava na ligaqu na veika kecega oqori?’

51“Ni yavu tamata yalo kaukauwa! Sa duatani na butobuto ni lomamuni kei na didivara ni daligamuni! O ni sa ucui ira vinaka sara ga na nomuni qase, ena nomuni dau vorata na Yalo Tabu!#Aisea 63.10 52E a bau dua li vei ira na parofita me ra a sega ni vakacacana o ira na nomuni qase? Era a vakamatei ira era a mai tukuna rawa tiko e liu na lako mai nei Koya Na Yalododonu, o koya o ni a qai mai bukiveretaka ka vakamatea. 53Sa i kemuni ka soli vei kemuni na lawa ni Kalou, ka ra a mai solia na agilosi, ia o ni a qai sega ga ni muria!”

Sa Vakaviriki ena Vatu o Sitiveni

54Ia ni ra sa rogoca na veika o ya na lewe ni Matabose sa rarawa vakalevu na yalodra ka ra sa vakasequruqurubati vua ena cudru. 55Ia sa sinai tu o Sitiveni ena Yalo Tabu, ka sa qai rai matua ki lomalagi ka raica na lagilagi ni Kalou; sa raici Jisu talega ni tucake tu ena liga i matau ni Kalou. 56Sa qai kaya vei ira o Sitiveni, “Au sa raica ni sa tadola na lomalagi ka raica na Luve ni Tamata ni sa tucake tu ena liga i matau ni Kalou!”

57Era sa qai qoqolou na lewe ni Matabose ka sogota na daligadra ena ligadra. Era sa qai cicivi koya kece yani vakasauri. 58Era sa qai viritaki koya ki na taudaku ni koro ka vakaviriki koya ena vatu. E ratou sa qai biuta tu na nodratou i sulu o iratou na i vakadinadina lasulasu o ya vua e dua na cauravou ka yacana o Saula. 59Ia ni ra sa vakaviriki Sitiveni tiko ena vatu sa qai kaci o koya vua na Turaga, ka kaya, “Turaga Jisu, ni taura yani na yaloqu!” 60Sa qai tekiduru sobu o koya ka kaya ena domo levu, “Turaga, ni kakua ni cudruvi ira ena vuku ni valavala ca era sa cakava oqo!” Ia ni sa cavuta oti na vosa o ya sa qai mai cavuka sara yani na nona i cegu.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Cakacaka 7: FNVDC12

Highlight

ಶೇರ್

ಕಾಪಿ