Cakacaka 6

O Iratou na i Vukevuke e Vitu

1Ia ni sa toso tiko na gauna ka sa levu tikoga mai na kedra i wiliwili na tisaipeli i Jisu, era sa qai vosa kudrukudrutaki ira na Jiu itaukei o ira na Jiu era vosa Vakirisi. Era kaya ni ra sa dau guilecavi tiko na nodra yada ena votai ni yau ena veisiga. 2E ratou sa mani vakasoqoni ira vata na tisaipeli e lewe vuqa o iratou na lewe tinikarua, ka ratou kaya vei ira, “E sega ni dodonu me keitou sa laiva na vunautaki ni vosa ni Kalou ka mai ogataka na cakacaka ni lavo. 3O koya oqo, oi kemuni na veiwekani, mo ni vakasaqara mada mai kina vei kemuni e vitu na tamata vinaka era sa sinai ena Yalo Tabu kei na yalomatua, me keitou lesi iratou ki na cakacaka oqo. 4Oi keitou vakai keitou sa na soli keitou ki na qaravi ni masumasu kei na vunautaki ni Vosa.”

5Era a marautaka kece na vakasama o ya, ka ra sa mani digitaki Sitiveni, e dua ka sinai tu ena vakabauta kei na Yalo Tabu, kei iratou o Filipe, Pirokoro, Nikanori, Taimoni, Parimina kei Nikola, e dua ka a vuki ki na lotu vaka-Jiu mai Anitioki. 6Era sa mani vakaturi iratou oqo e matadratou na i apositolo, ka ratou sa qai masu na i apositolo ka tabaki iratou ena ligadratou.

7A sa tete tikoga na vosa ni Kalou. Sa tubu cake vakalevu tikoga na kedra i wiliwili na tisaipeli e Jerusalemi, ka sa lewe vuqa sara vei ira na bete era sa talairawarawa ki na vakabauta.

Na Vesu i Sitiveni

8E a sinai ena loloma-savu kei na kaukauwa o Sitiveni, ka a cakava na veika veivakurabuitaki kei na cakacaka mana lelevu eso ena kedra maliwa na tamata. 9Ia era a qai lako yani eso na lewenilotu ena valenilotu sa vakatokai O ira na Sereki, kei ira eso na kai Kirini kei Alekisadria, kei Silisia kei Esia, ka ra veileti kei Sitiveni. 10Ia sa solia ga na Yalo Tabu vei Sitiveni na vuku, ni ra a sega ga ni vakacalai koya rawa ena nona vosa. 11Era a qai sasagataka lo eso na tamata me ra kaya, “Keimami a rogoca na tamata oqo, ni vosa vakacacataki Mosese kei na Kalou!” 12Sa i koya na sala oqo era a vakauqeti ira rawa kina na tamata, kei ira na qase, kei ira na daunilawa. Era sa qai lako yani vei Sitiveni ka vesuki koya, ka kauti koya ki na Matabose. 13Era sa qai kacivi iratou yani eso na dauveibeitaki vakailasu, ka ratou sa qai kaya, “Na tamata oqo e sega ni mudu ni vosa vakacacataka tiko na noda Vale tabu kei na Lawa i Mosese. 14Keitou a rogoca ni kaya ni na vakarusa na Vale tabu oqo, o Jisu na kai Nasareci ka na veisautaka kece na noda i vakarau ni bula me vaka na veivakaro sa solia mai vei keda o Mosese!” 15A sa gole kece na matadra na lewe ni Matabose vei Sitiveni ka vakaraici koya matua, ka ra raica ni sa vaka na mata ni agilosi na matana.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Cakacaka 6: FNVDC12

Highlight

ಶೇರ್

ಕಾಪಿ