LUKE 15
15
A vosa vakatautauvata kei na sipi sa yali ka kune tale, 1—7; kei na tiki ni siliva sa yali ka qai kune tale, 8—10; kei na gone sa biuti tamana ka qai lesu tale mai, 11—32.
1Sa qai toro voleka mai vei koya ko ira kecega na kumuna nai vakacavacava, kei ira na tamatai valavala ca, me ra rogoci koya. 2A sa vosakudrukudru ko ira na Farisi kei ira na vunivola, ka kaya, Ko koya oqo sa veilasamaki vata kei ira na tamata ca, ka kana vata kei ira.
3A sa tukuna vei ira ko koya na vosa vakatautauvata oqo, ka kaya, 4Ko cei vei kemudou na tamata, sa dua na drau na nona sipi, kevaka sa vakayalia e dua vei ira, ena sega beka ni biuta laivi tu na ciwasagavulu ka ciwa e na veico, ka laki vakasaqarai koya sa yali, me kunea mada? 5Ia ni sa kunea, sa viribale ki domona, ka reki. 6Ia ni sa tale ki nona vale, sa kacivi ira vata na wekana kei na lewe ni koro, ka kaya vei ira, Tou mai reki vata, ni’u sa kunea na noqu sipi ka yali. 7Au sa kaya vei kemudou, ni sa levu vakakina na reki mai lomalagi e na vuku ni tamatai valavala ca e le dua bauga sa qai veivutuni, ia ka lailai ga e na vukudra na tamata yalododonu e le ciwasagavulu ka ciwa, sa sega ni yaga vei ira na veivutuni.
8Se ko cei na yalewa sa tini na nona tiki ni siliva, kevaka sa vakayalia e dua na tikina, sa sega beka ni tutuvaka na cina, ka taviraka na vale, ka vakasaqara matua, me kunea mada? 9Ia ni sa kunea, sa kacivi ira vata na wekana kei na lewe ni koro, ka kaya, Tou mai reki vata, ni’u sa kunea na tikina ka’u a vakayalia. 10Au sa kaya vei kemudou, Sa tubu vakakina na reki e na matadra na agilose ni Kalou, e na vuku ni tamatai valavala ca e le dua bauga sa qai veivutuni.
11Sa kaya tale ko koya, E dua na tamata sa lewe rua na luvena-tagane: 12ka sa kaya vei tamana ko koya sa gone vei rau, I Tamaqu, solia mai vei au nai votavota ni yau sa vota me noqu. A sa vota vei rau nai yau. 13A sa bogi vica mada, sa qai kumuna vata na ka kecega na gone, ka lako tani ki na dua na vanua vakayawa, ka sa vakayalia kina na nonai yau e nai valavala vakamarau ca. 14Ia ni sa vakaotia kece, sa qai tubu na dausiga levu e na vanua ko ya; a sa qai dravudravua sara ko koya. 15A sa laki tiko kei na dua na lewe ni vanua ko ya; a sa talai koya ki na nona veiwere me vakani ira na vuaka, 16A sa garova na qana era daukania na vuaka, me mamau kina na ketena; a sa sega e dua sa vakani koya.
17Ia ni sa kila yalona tale, sa kaya, Sa le vuqa na tamata nei tamaqu sa voli na nodra cakacaka, era sa mamau e na madrai ka vo tu yani, ia koi au ka’u sa mate e na viakana! 18au na ia, ka lako vei tamaqu, ka’u na kaya vua, Tamaqu, au sai valavala ca ki lomalagi, vei kemuni talega, 19ka’u sa sega kina ni yaga me’u vakatokai tale me luvemuni: lesi au me’u vakataka e dua na nomuni tamata sa voli na nona cakacaka. 20A sa ia, ka lako vei tamana. Ia ni sa yawa sara, sa raici koya ko tamana, a sa lomana, ka cici, ka mokota, ka reguca. 21A sa kaya na luvena kivei koya, I Tamaqu, au sai valavala ca ki lomalagi, vei kemuni talega, ka’u sa sega kina ni yaga me’u vakatokai tale me luvemuni. 22A sa kaya na tamana vei ira na nona tamata, Dou kauta mai nai sulu vinaka sara, ka vakasulumi koya; daramaka talega e dua na mama ki ligana, kei nai vava ki na yavana; 23ia dou kauta mai na luve ni pulumokau sa uro, ka vakamatea; ka me datou kana, ka marau; 24ni sa mate na luvequ oqo, ka sa qai bula tale; sa yali, ka sa qai kune tale. A ra sa vakatekivu me ra marau.
25A sa tiko e na were na luvena ka qase vei rau; ia ni sa tale mai ka toro voleka ki vale, sa rogoca na bitu-ni-vakatagi kei na meke. 26A sa kaciva e dua vei ira na tamata, ka taroga na kenai balebale ni ka oqo. 27A sa kaya vua ko koya, Sa lako saka tale mai na tacimu; ka sa vakamatea ko tamamu na luve ni pulumokau sa uro, e na vuku ni rau sa veikune tale ka sa bula vinaka. 28A sa cudru ko koya, ka bese ni curu; sa qai lako mai kina ki tautuba ko tamana, ka vakamasuta. 29Sa qai vosa ko koya, ka kaya vei tamana, Raica, e vuqa na yabaki oqo ka’u sa qaravi iko kina, ia ka’u sa sega sara ni talaidredre ki na nomu vosa: ia ko sa sega sara ni solia vei au e dua walega na luve ni me, me keitou marau vata kina kei ira na wekaqu: 30ia ni sa lako mai na luvemu oqo, ko koya sa vakaotia na nomui yau vei ira na yalewa dautagane, ko sa vakamatea me kena na luve ni pulumokau sa uro. 31A sa kaya vua ko koya, Na luvequ, edaru sa tiko vata vakadua, ia na ka kecega sa tu vei au sa nomu. 32Ia sa dodonu ga me da reki, ka marau; ni sa mate na tacimu oqo, ka sa qai bula tale; sa yali, ka sa qai kune tale.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKE 15: FOV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
