LUKE 11
11
Sa vakavulici ira na nona tisaipeli ko Jisu me ra daumasu, 1—13. Sa vakaseva tani e dua na tevoro galu, 14—28. Sa vakavulici ira na tamata, ka vunauci ira na Farisi, kei ira na vunivola, kei ira na vu-ni-vunau, 29—54.
1Ia ni sa masu ko koya e na dua na yasana, ni sa qai tinia, sa kaya vei koya e dua na nona tisaipeli, Kemuni na Turaga, mo ni vakavulici keimami me keimami masu, me vaka sa vakavulici ira talega na nona tisaipeli ko Joni.
2A sa kaya vei ira ko koya, Ni dou sa masu, dou kaya, Tama i keimami mai lomalagi, Me vakarokorokotaki na yacamuni. Me yaco na nomuni lewa. Me caka na lomamuni e vuravura me vaka sa caka mai lomalagi. 3Mo ni solia mai vei keimami e na siga yadua na kakana e yaga vei keimami. 4Ia mo ni kakua ni cudruvi keimami e na vuku ni neimami valavala ca: ni keimami sa sega talega ni cudruva e dua sai valavala ca vei keimami. Ia mo ni kakua ni kauti keimami ki na vere; ka mo ni vakabulai keimami mai na ca.
5A sa kaya vei ira ko koya, O cei vei kemudou kevaka sa dua na wekana, a sa lako vua e na lomaloma-ni-bogi, ka kaya vua, Na wekaqu, au kerekere mo solia mai vei au e tolu nai buli madrai; 6ni sa dua na wekaqu sa mai vakacegu vei au ni sa lako tu, ia sa sega e dua na ka vei au me’u tauca vua: 7Ena qai vosa ko koya mai vale, ka kaya Kakua ni vakaocataki au; sa sogo tu na katuba, ka keitou sa davo kei iratou na luvequ e nai mocemoce; au sa sega ni tu cake rawa me’u solia vei iko. 8Au sa kaya vei kemudou, Kevaka e bese ni tu cake ka solia vua, ni sa wekana; ia ni sa cikeva tiko ko koya, ena tu cake ka solia na ka ena rauti koya. 9Au sa kaya talega vei kemudou, Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou: 10ni sa rawata ko koya yadua sa kerekere; ka sa kunea ko koya sa vakasaqara; ia ena dolavi vua sa tukituki.
11E dua li vei kemudou na tama ni gone kevaka sa mai kere madrai vei iko na luvemu, ena solia vua e dua na vatu? ia kevaka sa kere ika, ena solia beka vua e dua na gata mei sosomi ni ika? 12ia kevaka ena kere yaloka, ena solia beka vua e dua na batibasaga? 13Ia kevaka dou kila, koi kemudou sa tamata ca, mo dou solia na ka vinaka vei ira na luvemudou; sa qai dina vakalevu cake, ni na solia na Yalo Tabu ko koya na Tamamudou vakalomalagi vei ira sa kerekere vua.
14A sa vakaseva tani tiko e dua na tevoro ko koya, a sa galu. Ia ni sa lako tani na tevoro, sa vosa na galu; a sa kurabui ko ira na lewe vuqa. 15A sa kaya eso vei ira, Sa vakasevi ira na tevoro ko koya e na kaukauwa i Pielisipupi na nodra turaga na tevoro. 16Ia ka so tale, era sa vakatovolei koya, ka taroga e dua nai vakatakilakila mai lomalagi. 17Ia ko koya, ni sa kila na nodra nanuma, sa kaya vei ira, A matanitu yadua sa veisei vakai koya, ena vakarusai; ia na vale sa veisei vakai koya, ena bale: 18kevaka sa veisei vakai koya ko Setani, ena tu dei vakaevei na nona matanitu? ni dou sa kaya ka’u sa vakasevi ira na tevoro e na kaukauwa i Pielisipupi. 19Ia kevaka ka’u vakasevi ira na tevoro e na kaukauwa i Pielisipupi, era vakaseva e na kaukauwa i cei ko ira na nomudou? o koya era na lewai kemudou kina ko ira oqo. 20Ia kevaka ka’u vakasevi ira na tevoro e nai qaqalo ni Kalou, sa qai yaco dina vei kemudou na matanitu ni Kalou.
21Ni sa dua na qaqa sa vakaiyaragi tu sa vakatawa na nona vale, sa tu vinaka na nonai yaya: 22ia ni sa dua tani sa uasivi vei rau e na qaqa sa lako vakaukauwa, ka rawai koya, sa kovea na nonai yaragi ni valu kecega sa vakararavi kina, a sa vota nai toki mai vua. 23O koya sa sega ni totaki au, sa to tani: ia ko koya sa sega ni kumuna vata vei au, sa duibiubiuta.
24Ni sa lako tani e na tamata na yalo velavela, sa daulako voli e na vanua dravuisiga me qara nai vakavakacegu: ia ni sa sega ni kunea, sa kaya, Au na lesu tale ki na noqu vale ka’u a lako tani maikina: 25ia ni sa tadu, sa kunea sa tataviraki ka vakaiukuukutaki. 26Sa qai lako ko koya, ka kauta vata kaya e lewe vitu tale na yalo sa uasivi vei koya e na ca; a ratou sa curuma ka tiko kina: a sa ca vakalevu emuri na tamata ko ya, ka ca vakalailai eliu.
27Ia ni sa vosa tiko vakaoqo, sa dua na yalewa vei ira na lewe vuqa sa tabalaka cake na domona, ka kaya vua, Sa kalougata na kete ko ni a sucu maikina, kei na sucuna ko ni a sucuma. 28A sa kaya ko koya, Ia sa kalougata vakalevu ko ira sa rogoca na vosa ni Kalou, ka vakabauta.
29Ka ni ra sa soqoni vata na tamata ka veidrigidrigi, sa vakatekivu ko koya me kaya, Ai tabatamata ca oqo: era sa dautaroga nai vakatakilakila; ia ena sega nai vakatakilakila me soli kina, nai vakatakilakila ga i Jona na parofita. 30Me vaka sai vakatakilakila ko Jona vei ira na kai Ninive, ena vaka talega kina na Luve ni tamata vei ira nai tabatamata oqo. 31Ena tu cake na radi ni ceva ka vakadinadinataka na nodra cala nai tabatamata oqo, e na veilewai; ni sa lako mai ko koya mai na yasana vakayawa sara e vuravura me rogoca na vuku i Solomoni; ka raica, sa dua eke sa uasivi cake vei Solomoni. 32Era na tu cake na kai Ninive, ka vakadinadinataka na nodra cala nai tabatamata oqo, e na veilewai; ni ra sa veivutuni e na vunau i Jona: ka raica, sa dua eke sa uasivi cake vei Jona.
33Sa sega e dua sa tutuvaka na cina, ka qai vakatikora e na tikina vuni, se e ruku ni vakarau ni sila, e na kenai tutu ga, me ra raica na kena rarama ko ira sa curu mai. 34Na cina ni yago na mata; ia kevaka sa vinaka na matamu sa rarama kina na yagomu taucoko, ia kevaka e ca, sa butobuto kina na yagomu taucoko. 35O koya mo qai vakaraica de sa butobuto mai na rarama sa tu e lomamu. 36O koya oqo, kevaka sa rarama na yagomu taucoko, ka sega na tikina sa butobuto, ena rarama kece sara, me vaka ni sa cinavi iko na cina sa caudre vinaka sara.
37Ia ni sa vosa tiko ko koya, sa sureti koya e dua na Farisi me rau kana vata kaya e nai vakasigalevu: sa qai curu ko koya, ka tiko sobu me kana. 38Ia ni sa raica na Farisi, sa kurabui ni sa vakasigalevu ko koya ka sega ni vuluvulu mada eliu. 39Sa qai kaya vei koya na Turaga, Oi kemudou na Farisi, dou sa qai dauvakasavasavataka na bilo kei na dari etaudaku, ia na lomamudou sa sinai e na daubutako kei nai valavala ca. 40A yalowai koi kemudou, e sega beka ni cakava na tikina eloma ko koya sa cakava na tikina etaudaku? 41Ia mo dou solia na ka ni loloma me vaka dou sa rawata, ka raica, ena savasava vei kemudou na ka kecega. 42Ia e ca vei kemudou, na Farisi! ni dou sa solia nai katini ni botebotekoro, kei na co kecega vakaoqo, ia na lewa dodonu kei na loloma ni Kalou dou sa biuta laivi ga; oqo e kilikili kei kemudou mo dou kitaka, me kakua talega ni biu na veika ko ya. 43E ca vei kemudou, na Farisi! ni dou sa dauvinakata nai tikotiko ni qase e na veivale ni lotu, kei na veikidavaki e na veirara ni veivoli. 44E ca vei kemudou! ni dou sa vaka nai bulubulu sa sega ni rairai, ka sa lako loa voli ko ira na tamata e delana ka sega ni kila.
45Sa qai vosa vei koya e dua na vu-ni-vunau, ka kaya, Vakavuvuli, ni ko sa vosa vakaoqo ko sa beitaki keitou talega. 46Sa qai kaya ko koya, E ca vei kemudou talega, na vu-ni-vunau! ni dou sa vakaocataki ira na tamata e nai colacola e dredre sara ni colati, ia dou sa sega ni tara nai colacola ko ya e na dua na nomudoui qaqalo. 47E ca vei kemudou! ni dou sa tara na kena veivale ni nodrai bulubulu na parofita, era vakamatea ko ira na nomudou qase. 48E dina ga dou sa tukuni kemudou ni dou sa vinakata na nodrai valavala na nomudou qase; ni ra sa vakamatei ira, ka dou sa tara na veivale ni nodrai bulubulu. 49O koya oqo sa kaya kina na vuku ni Kalou, Au na tala vei ira eso na parofita kei nai apositolo, ia eso vei ira era na vakamatea ka vakacacana: 50me ra tarogi kina nai tabatamata oqo, e na kedra dra na parofita kecega ka vakadavei mai nai vakatekivu kei vuravura; 51mai na dra nei Epeli ka yacova na dra nei Sakaraia, ko koya ka vakamatei e na tadrua ni cabocabo-ni-madrali kei na vale ni soro; au sa kaya vakaidina vei kemudou, Ena tarogi kina nai tabatamata oqo. 52E ca vei kemudou, na vu-ni-vunau! ni dou sa kauta tani nai dola ni ka vuku: dou sa sega ni curu kina koi kemudou, ia dou sa tarovi ira talega era sa curu tiko kina.
53Ia ni sa kaya tiko vei ira ko koya na veika oqo, sa vakatekivu me cikeva vakalevu na kere vosa vua ko ira na vunivola kei ira na Farisi me vuqa na ka me kaya; 54a ra sa lawakitaka, a ra sa qara me ra rogoca e dua na ka mai na gusuna, me ra vakaucacataki koya kina.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKE 11: FOV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
