Mak 16
16
Da Yensa akengunaane a biniiroŋo
1Afúrumi na, bísibaŋo bi guyohálaŋo bafúri, Mariyama m’afúruntne Magdala ingi Mariyama nunku Jak ingi udikaamo m’aretuhne Salome andék angila kárámánjo k’anyéj ba buhupuno a búgááro. 2-3Dimanso, anfúra tápáro k’antuŋul hadéko ba a búyindo. Baŋŋay hadéko, anjaahinay anyéjeh:
- Inini mintoroŋ, hantaŋ gadékehne búfunndukintor dawaalo d'arokaane a buruhu búyindo?
4Nim gammiihayne maro dámár afufuuh dáde. Angu anyoofun agírenkinin aŋŋanden maro dawaalo arokulaarokul. Bampúti harennaamo, 5aŋŋan a búyindo. Baŋŋani, anlahun hambaani n'anoone na a jiyakánin, úmár ingi bayaah bafer. Banfégem anjuhula. 6Kanda hambaaniŋo ayéjeeniŋ:
- Ninkinan, dahu údewuneŋ! Me ípápájul maro Yensa mu Nasaret gútibheŋne, m’anfaaŋunahinne a dinlihano. Dókuloŋ k’úfegeŋ k’anninkemne. Ningeŋ baŋ! Guyroŋ nanka maro Díino akengunemkengun a biniirohánom ingi bumburunku arinkinem nip. Bakengunaa mees, adék adoona. Guyroŋ nanka! Ningeŋ baŋ k'anninkerne búgááro! 7Inini, ninkinan dékereŋ imbi ñantaalibehu Yensa ingi utaalibehinem Piyer mees. Inini gúputeŋ úyejeeniŋ: «Ambúuñribuuñ mint anyéj úteekinahaŋ maro Umuyhintor akengunkengun Yensa a biniiroŋo ingi bumburunku arinkinem nip. Guyroŋ angu a búyindo. Adékhineh atúyoonuŋ bim a resiyoŋo n’aretuhne Galile. Kuku údekeŋ úduk ulahunamaŋ bim maŋ ni ayéjoonuŋne fam.»
Nim hambaaniŋo m’anoone a búyindo atéekinne indikaamo.
8Angu indikaamo banyennehini hómár, anfúror a búyindo k'angír. Ambenuhbenuh fanfaŋ fo aññaŋunah. Andéwundewun fo bollendeŋeŋ búteekinku wúur h'anfégne a búyindo ingi h’ambúuñameeniŋne.
Fo Mariyama mu Magdala afégne Yensa
[9Inini, Yensa bísibahu dimanso táptápáro gajébunaane k'akeng a biniirohánom ingi bumburunku arinkinem nip. F'akengunaane, ingi udikaam ganohumne anrah. Úmár ingine Mariyama mu Magdala mu Yensa afúnnáne fáguhoŋo fámekilaŋo ingi fanakaŋo. 10Angu bafégem, adék ba búteekinku m'ankokayehne ingi Yensa maro afégemfeg. Bapút, alahuneeniŋ n'ankulohne anwoseneh biniirohu Yensa. Atéekineeniŋ maro ajébjeb, úmár afégemfeg. 11Kanda f'anyennehinne gúmár laháraŋaŋ.
Fo ñantaalibeŋo anfégne Yensa
12Afúrumi na, Yensa afúror anrah ingi ñantaalibe inak m'aŋŋay hadék ba a kanaŋaŋo. Agida Yensa mídeŋ ininkaman n'amíirerne fam. 13Angu f'aŋŋoolintne a saariŋo andék andék antéekin ñantaalibeŋo índukoŋo maro anféfeg Yensa. Kanda immereŋ bayennehini hómár laháraŋaŋ.
Da Yensa abiyamne gúfuro imbi ñantaalibehinem
14Yensa d'abiyamne gúfuro imbi ñantaalibehinem haalaŋo ingi úmánduko, bapútri alahunteeniŋ guyaahálaŋo. Balahunteeniŋ, asekureeniŋ a gubaarhu ni agofonkánin alaalne. Úpájuleŋ, m’anfégemne antéekineeniŋteekin maro úmár ajébjeb kanda ñantaalibeŋo dómároŋoŋ. Gúmár gasekureeniŋne. 15Aŋoolin ayéjeeniŋ:
- Inini, ninkinan, uñantaheŋ údekeŋ beŋen beŋen a duniyaŋo gúteekinku jamaŋo nip Kúmbuuñaamo Kúnsuuminno. 16Aji wúur adómi gúloku Kúmbuuñaamo Kúnsuuminno kúmár k’anyica a gurethum, Díino apahánkánam. Kanda mu dómároŋne, Díino ayehenkinem. 17Ingi faka, aji wúur adómi gúloku Kúmbuuñaamo Kúnsuuminno apiren akaan tamaseereŋo innoŋ: Afúnnhuneh fáguhoŋo f’aŋŋanne jamaŋo a gubaarhu sembehu gurethum. Alóbhuneh halóku siyeŋ adúkoŋ ha hatahadaŋ. 18Apiren alah busumool busaŋari wola aruuh posoŋo, kanda dakaanam nintig. Apiren alóbun silakánam imbi újebireŋ ki újebireŋo úmár ajéb. M'adómne gúloku Kúmbuuñaamo Kúnsuuminno apiren akaan inhoŋ.
Nim Yensa alóbne.
Fo Yensa aŋoolinne ba arjanna
19Balóbi nim, Díino ayoofunom k'adék adoona ba arjanna. Bapút, anooh a jiyaku Díino, kantígo k' abúuñahuhne. 20Badoonay, ñantaalibeŋo antoŋ hadéko beŋen beŋen a duniyaŋo ba gúteekinku jamaŋo Kúmbuuñaamo Kúnsuuminno. Gaŋŋay gukanku dohoŋo nómár, Umuyhintor akááñinahinkeeniŋ. Hómár ingine anéereeniŋneer sembe no gukanku tamaseereŋo n'aséediyahuneeniŋne imbi jamaŋo maro h'anlóbohne marigen.]
Angu, me Mak, nanka gúlokum amukne a letaro inno.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mak 16: GD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Copyright Vision Intégrale, Senegal
