Saŋ Gudoyahu m’andékehne gukaranku líibáro inno n'ayéjuhne Injilo no Saŋ
Gudoyahu m’andékehne gukaranku líibáro inno n'ayéjuhne Injilo no Saŋ
Gúbido ungu gu Gúloku Díino: «Injilo no Saŋ» garetuhne. Agida utaalibehu Yensa m’aretuhne Saŋ, úmár añaañne gúbido ungu gu Gúloku Díino. Ganyéji Injilo, gúmár ingine Kúmbuuñaamo Kúnsuuminno ingi guñaamolo. A Injilo no Saŋ, Saŋ añañaañ na Kúmbuuñaamo Kúnsuuminno a nintiku ni jégenenku wúuro ingi Díino apirenne ajóonininkinaa.
Ayikyik índukoŋo mees m’aññaañne h'ayéjuhne Injileŋo. Na aññañaañ misaalhu Yensa ingi a nintiku Kúmbuuñaamo Kúnsuuminno ku Yensa adootne mintor. Kanda Injilo no Saŋ amburayburay ingi Injileŋo ámáráŋ. Úpájuli, Saŋ añañaañ ho Yensa akawandinne afaŋ ho índukoŋo aññaañne. (Índukoŋo immereŋ aññañaañ anwusulin Saŋ a gubaarhu ho Yensa akanne).
Uliirehineh a Injilo no Saŋ ni Yensa ayéjne «Me ingine jiyaaŋo j'awúnnurohne k'ampiren anfég hóbun a duniyaŋo inno. Wúuro m'atifeemne daguyahar a bumurul. Afúnnhunuh a bumurulo k'aŋanaa a jiyaaŋo j'anéerumehne kanjébo.»
Yensa afak ayéj: «Ikarakáneh jamaŋo arinkum ki nim anyikum na kanjébo ka bandór.» Kanda fo Yensa alóbne nim na sinfacálayo atoŋumne imbi m’aŋŋane bujantendikinem, maro ñanlabahi pájiireŋeŋ h’asíibane balóbo. Angu hómár akanne índukoŋo ambénn butifilinkinem. Kanda índukoŋo mungu anyéj Yensa: «Ídekemiŋ imbi hantaŋ? Eke fi bareŋ gúneerumehne halóbo h'anéerumehne kanjéboyer?! Mint ii, ifiyummiŋfiyum k'ípájulmiŋ maro fi ugune M'arennáne M'afúruntne imbi Díino.» (Sapitáro 6.68-69)
Angu, Saŋ aféfeg ho Yensa akanne ingi h’alóbne maro ingi úmár gankokayehne. Saŋ asíibáásiib bujellihinku jamaŋo k’arennumeeniŋ fet maro Yensa agune Úbáku Díino, Upahunku duniyaŋo. Gúmár akanne añaañi Injilo inno.
Guŋay gukaraŋo wola bujanteno kant na bulaahan k’upiren uyennehin halóbo h'anéerumehne kanjébo ka bandór.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Saŋ Gudoyahu m’andékehne gukaranku líibáro inno n'ayéjuhne Injilo no Saŋ: GD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Copyright Vision Intégrale, Senegal