Saŋ 4
4
Ka Yensa ajellihinne bigokunom a didiirahu Samareya
1Afúrumi na, ayikyik m’andék anlób ingi índiigeeno m’angune a dayrahu ñanfarasiyaŋo. Bampút anyéjeeniŋ maro m'anyicaane k'anguy a dayrahu Yensa, immereŋ anfaŋi n'anrumun mi Yaya ayicne k'anguy a dayrahánam. 2Agida Yensa faŋo gara ayicimeh. Ñantaalibehinem ganyicehne jamaŋo. 3Angu, Yensa bayennehini jamaŋo n’anlóbohne hómár, anfúror a didiirahu Júde k'andék aŋŋoolin ba a didiirahu Galile ingi ñantaalibehinem. 4Agida, a hadéko aññantay andékum si didiirahu Samareya.
5Angu andék f’andék ampút a saariŋo n’aretuhne Sikar. Agida Sikar, saariŋo nómár agune a didiirahu Samareya. Agida na atéejateeja guraho gu Yankuba anahne úbárám Isuf. Angu bampúti na, ñantaalibeŋo andék gútibilahu guyaahálaŋo a marseŋo. 6Kanda Yensa, úmár n'ayohne dáde, anooh bi koloŋo n'aretuhne kolonku Yankuba, agida ni bísibaŋo abáári. 7-8Banoohiinooh udikaam úduk afúror ba búdiino. Úmár ummu Samareya. Agida ni ñantaalibeŋo anroŋor b’andékne gugilahu guyaahálaŋo. Udikaamo bapút a koloŋo, alahun na Yensa n’anooh. Yensa ayéjem:
- Gúdiini unaham k’iruuh!
9Úmár aŋoyind Yensa ayéj:
- Kanda fi Uyahud, neeraŋ gupirenkinehne ukiina me ummu Samareya baaruŋo?
Nim udikaamo ayéjne Yensa. Agida Ñanyahudo garanyennehinayeh ingi ñamhu Samareya. 10Yensa ayéjem:
- Hey! Aji úpápájuler ho Díino asíibane búneken ingi wúuro m’akiinahenne baaruŋo, fi ugumb ukiinaham k'anaho baaruŋo b'anéerumehne kanjébo!
11Udikaamo aŋoyindem ayéjem:
- Kanda arafaŋ! Fi lahuro gubaag, te koloŋo aŋantinŋantin, angu neeraŋ gunahorunkunumne baaruŋo b'úyejne? 12Fég baŋ, koloŋo inno maamankint Yankuba awóojne k'abéndur mint. Úmár ingi imberenkinem ingi kooreŋenkinem nip baarukunom ganruuhohne. Karo fi ulahlah karo fi ufaŋi úmár Yankuba?
13Balóbi nim Yensa ayéjem:
- Ingah! Baaruku koloŋo inno, moŋon moŋon aruuhne, damiñ baaru afak alaham. 14Kanda, ingah! Baaruŋo ba me ídekehne bunakánam, aruuhdir bámár, baaruh dafak aŋoolinkin alaham. Baaruŋo bámár aguyhuneh a binaanam ininkaman baaruku koloŋo b’abuturohne abena, b’anéerumehne kanjébo ka bandór.
15Yensa balóbi nim udikaamo ayéjem:
- Kanda arafaŋ! Naham baŋ baaruŋo bámár ki nim baaruh dafak alahaharaam ki nim diŋooliner nanka ba búdiin.
16Yensa ayéjem:
- Inini, déker huyulo údiigenken!
17Udikaamo aŋoyindem ayéjem:
- Me yikiri údiigeen.
Yensa ayéjem:
- F'óyejne yikuro údiigeen, marigeno gúlobne. 18Kanda índiigeen ímákila ujahayeŋjahay ki ummu m'uguyayeŋne inini, jahuro. Úloblob gu marigen.
19Úmár aŋoyindem ayéjem:
- Kanda arafaŋ! Inini, ífefeg maro fi anabiyoŋ. 20Angu horaŋ akanne ninkinan Ñanyahudo úyejeŋ jamaŋo aññantay andék antúy Díino beŋen Jerusalem, agida mint Ñansamareyaŋo, nanka a montaaño inno gituyohomiŋne, ka maamaamankint antúyohomne káriman fam?
21-24Yensa ayéjem:
- Udikaam, fiyum baŋ h’édekehne búteekinken. Waat inno bim n'adékireh, adasridas deh, n’ófekineŋne maro kantígo fankánam k'ótuyohoŋne Díino yikireŋ nafa.#4.21-24 Biriman biniirohu Yensa ingi jankenghinem ba arjanna ingi waato no Díino akucundutne Jamméejhinem Jarenninno imbi ñanfiyinkinem, ñanfiyinkinem ampiren anramun Díino bigurumaaren. Karo ninkinan útuyohomoŋ a montaaño inno, karo Ñanyahudo antúyohom a bukoku Jerusalem. Kantígo kámár fankánam yikireŋ nafa. Ayikyik h’afaŋunumne n'ayik nafa imbi Díino, hómár agune n’íntuyorunku wúuro Díino. Nómár afaŋumne buyikhu nafa.
Abocin ayéjem:
Ingah! Díino jamméej. Angu, gúmár akanne aji wúur asíibay bútuyhunom bútuy b'apút a hafithinem, fo Jamméejhu Díino akááñinahinem. Agida Díino gatíbetib m’antúyohomne bútuy bu marigen a sabaabhu Jamméejhinem Jarenninno. Úpájuli, ninkinan Ñansamareyaŋo pájiiroŋ Díino n’útuyohoŋne. Agida mint Ñanyahudo ípájulemmiŋpájul. Faka a gubaarhu mint Ñanyahudo, Díino apahununkunehne jamaŋo.
25Yensa balóbi nim, udikaamo ayéjem:
- Ípápájul mara m'ayéjuhne Umaasaŋo Mu Díino Acaabenne adék adékekineh. Inini, úmár apútodir, adék akeekir mintor inho Díino arenn nip.
26Yensa ayéjem:
- Me igune maŋ úmár, m'iŋane balóbo ingi fi.
27Balóbi nim ñantaalibeŋo ampútor, m'andékne a marseŋo. Banfégi ni Yensa aŋŋane balóbo ingi udikaam abineeniŋ.#4.27 Mara imbi immereŋ údiigeeno úmánduko ñantaaraŋ awonn ingi udikaam. Kanda haani utaalibe úmánduk bollendeŋ gumiku Yensa ayéjem: «Horaŋ gúsiibane imbi úmár?» wola: «Horaŋ gúlobhoŋne ingi úmár?»
28Ñantaalibeŋo bampútri, udikaamo anink na bihano k'agír ba a saariŋo. Bapúti ayéjeh ñammi saariŋo:
29- Índek índokoonuŋ k’úduk úfegeŋ údiigeeno m’alóbne h’ekanne nip ni wúur téekindom! Karo úmár agune Umaasaŋo Mu Díino Acaabenne?
30Fo udikaamo alóbne nim, jamaŋo anfúror a saariŋo aŋŋay bujonnaŋo bi Yensa agune. 31A waato nómár agida ni ñantaalibehinem anyéjeh:
- Arafaŋ, yaahar!
32Úmár aŋoyindeeniŋ ayéjeeniŋ:
- Me iyaahálayaahála guyaahála gu ninkinan pájiiroŋ.
33Angu Yensa balóbi nim ñantaalibeŋo ammiihayeh anyéjeh: «Karo úduk adohutemne guyaahálaŋo angu?»
34Yensa akir akeekireeniŋ h’asíibane búyejo, ayéjeeniŋ:
- Me, ii, a búdetálinku dohohu m'abúuñureemne ingi bukaano h'asíibane mees, hómáráŋ nip asúumeemsuum, te faka akankaan k'ihay. 35-36Eke ninkinan gúyejheŋyej, «Afallay júunoŋ arenekeŋ ki jafaco abár.» Iyoo! Inini k'íteekinoonuŋ: Maanoŋo abábár jafac! Ningilinteŋ baŋ! Jamaŋo imme na n'ampare horoŋ búdomhu Gúloku Díino. Wúur m'afac maanoŋo#4.35-36Wúuro m’aŋane jafaco apiren aguy Yensa, wola ugurumaareŋ m’atéekinehne jamaŋo Gúloku Díino. acaamaacaam deh! Ingah! A waato inno m'aññantane anyik kanjébo ka bandór ambábár jafac. Angu, uworhu maanoŋo ingi ufaco, immereŋ anfégdir maanoŋo n’anfacne ansewohuneh dáde.
Yensa abocin ayéjeeniŋ:
37Fégeŋ baŋ, funaareŋo marigen gafak alóbne: «Wúur aworhuneh maanoŋo. Gabohi uburo adék afac.» Eke nim funaareŋo alóbne? 38Úpájuleŋ, me íbuuñoonuŋbuuñ jafac bi ninkinan wodoŋ bi índukoŋo andóolne.#4.38 Apirenpiren aguy anabiyoŋoŋo ingi Yensa fankánam anworne «maanoŋo» nómár, te ñantaalibehu Yensa ba jafaco na gandékehne. Kanda ninkinan ufachánaŋ maanoŋo no índukoŋo anworne.
Nim Yensa ayéjne ñantaalibehinem.
39Afúrumi na, Ñansamareyaŋo ñanlabahi anfiyum Yensa a gubaarhu ni udikaamo ayéjne: «Úmár alóblob h’ekanne nip!»
40Angu ñammi Samareya banyennehini ho udikaamo alóbne, andék imbi Yensa. Bampúti, ankomb bunothunom ki nim anooh na ingi immereŋ. Angu Yensa anooh na buruhu ásibaŋ anakaŋ. 41K’angu anfak anyik ñanlabahi m’anfiyumem a gubaarhu h’alóbohne. 42Banfiyumi Yensa, andek anyéj udikaamo:
- Inini ii, mint ídommiŋdom h’otifurne mint k’ifiyummiŋ Yensa. Kanda guyroŋ gubaarhu h’ólobne bareŋ. Biyennehinmiŋ h’alóbohne nip, mint mees ífegmiŋ maro úmár agune Upahunku duniyaŋo.
Ka Yensa ajébunne úbáku uperefeŋo
43Yensa banoohi buruhu ásibaŋ anakaŋ a saariŋo n’aretuhne Sikar, ankeng ingi ñantaalibehinem k’andék a resiyoŋo n’akunaane, n’ayéjuhne didiirahu Galile. 44Agida Yensa ayéjyejer:
- Anabiyoŋo, a saarihinem n’abosaane danlóki buninkhinem anabiyo, k'angu dambúuñaham ininkaman n’aññantane ambúuñaham.
Kanda haani maŋ nim andék ba na. 45Agida, ñammi Galile ñanlabahi andékdek ba busorhu Gújunku Guwusunaamo Jerusalem. F’angune bim, anféfeg tamaseereŋo no Yensa akaanahne. Gújuŋo badéti, aŋŋooliner. Angu gúmár akanne fo Yensa apúturne a bukokunom, ankucunom hóbun.
46Agida Yensa f’agune a resiyoŋo nómár Galile, aŋoolin ba a saariŋo n’aretuhne Kana. Agida saariŋo nómár, nómár agune ka Yensa akúbulerne baaruku koloŋo akaan baaruku reseŋ. Angu, na a saariŋo n’aretuhne Kana, Yensa anrahne ingi uperefeŋo mu úbárám anér dáde. Uperefeŋo úmár, a saariŋo n’aretuhne Kapáneyum gagune, kanda 47f'ayennehinne maro Yensa ummo na Kana, afúrumor Kapáneyum adék alahuntam na. Angu uperefeŋo balahunti Yensa ayéjem:
- Ingah! Bonkerer k’índokoŋ ba Kapáneyum k'újebindeem úbákum.
Nim uperefeŋo akiinane Yensa. Agida kódiigeeno kómár anaman biniiroŋo afallahemne. 48Yensa aŋoyindem ayéjem:
- Ninkinan, umpah aji féguroŋ tamaseereŋo ingi h'ajaahalihoonuŋne, dufiyumeŋ?
49Uperefeŋo aŋoyindem ayéjem:
- Bonkerer k’índokoŋ jandiŋ wolo baniirom.
50Yensa aŋoyindem ayéjem:
- Ingah! Ŋoolint ba na! Úbákán ajébhineh.
Bayéjem nim uperefeŋo adóm gúlokunom k’atuŋul hadéko. 51F'aŋane gúŋuño, anrah ingi ñandóolhánom n'ambúuñanteeniŋ a binaanam. Banrahi, immereŋ anyéjem:
- Ingah! Wolo ayoofayoofa.
52Angu, uperefeŋo amiihála ayéjeeniŋ:
- Waat nooraŋ gakaanemne nim?
Immereŋ anyéjem:
- Déegen, waathu báárigo gúduhunku arino abénnáne.
53Angu bááhu wolo alentála maro kanjébhu wolo agidagida ingi waato no Yensa ayéjemne: «Úbákán ajébhineh.» Angu káriman dam, bááhu wolo ingi jamanku díkinem nip anfiyumne Yensa.
54Angu tamaseero nómár Yensa anakinne a didiirahu Galile f'aŋoolintne a didiirahu Júde.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Saŋ 4: GD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Copyright Vision Intégrale, Senegal
